Prishtinë, 06 shtator 2023 – Sot kishim kënaqësinë që në zyret e Lëvizjes FOL të mirëpresim delegacionin e Institutit CEELI, znj. Quinn O’Keefe – Drejtore Ekzekutive e The CEELI Institute, Arlind Puka – Zyrtar i Programit, Natálie Smutná – Online Learning Coordinator si dhe dy Gjyqtarët nga Shtetet e Bashkuara të Amerikës Jonathan Hawley, dhe Anthony Porcelli.

Drejtorja ekzekutive e Lëvizjes FOL, Mexhide Demolli Nimani dhe Menaxherja e Programeve në FOL, Nora Bajrami i njoftuan me punën e FOL-it për gjatë viteve me fokus të veçantë në monitorimin e sistemit të drejtësisë dhe luftes kundër korrupsionit.

Prishtinë, 9 shtator 2023 – Lëvizja FOL, me mbështetjen e Fondit për Zhvillimin e Komunitetit (CDF), dhe të SIDA-s në kuadër të projektit “Mbrojtja e të drejtave të njeriut përmes mbrojtjes së të dhënave: Forcimi i mediave dhe shoqërisë civile në Kosovë”, publikon sot raportin “E drejta e fshirjes së të dhënave personale (E drejta për tu harruar)”.
Ky raport ka për qëllim vlerësimin e zbatimit të së drejtës për t’u harruar, njëkohësisht duke synuar promovimin e kësaj të drejte tek qytetarët e Republikës së Kosovës.

Albana Hasani, Hulumtuese e lartë në Lëvizjen FOL tha se e drejta për tu harruar është e drejtë e re e paraparë në legjislacionin tonë. “Kjo temë është e pa trajtuar më parë, ka mungesë të raporteve, të artikujve e shkrimeve tjera në lidhje me këtë fushë. Pra ky është raporti i parë i bërë në këtë segment të privatësisë”, tha Hasani duke shtuar se ky raport synon të jap informacione tek qytetarët për këtë të drejtë që ju takon, në mënyrë që të shpërfaqet pasqyra e plotë e kuptimit dhe esencës të së drejtës për t’u harruar, si dhe është shtjelluar korniza ligjore kombëtare dhe ndërkombëtare në të cilën mbështetet e drejta e privatësisë dhe e drejta për tu harruar në veçanti.

“Kjo e drejtë, pra, ndërlidhet me të drejtën e individëve për të mos i`u përdorur të dhënat personale kur nuk ka interes publik dhe për shkak se të njëjtat nuk përputhen me qëllimet fillestare të mbledhjes së tyre. Pra është e drejtë që lidhet ngushtë me privatësinë dhe mbrojtjen e të dhënave personale”, tha ajo.
Për herë të parë në mënyrë normative, “E drejta për t’u harruar” u rregullua me 27 prill të vitit 2016 dhe filloj të zbatohet 2 vite më vonë, kur në vendet anëtare të Bashkimit Evropian hyri në fuqi Rregullorja e Përgjithshme për Mbrojtjen e të Dhënave.

Për shkak të rëndësisë që ka, e drejta e fshirjes së të dhënave personale apo e drejta për t`u harruar është inkorporuar edhe në Ligjin për Mbrojtjen e të Dhënave Personale të Republikës së Kosovës, që është hartuar në përputhje me rregulloren e Bashkimit Evropian.
Sipas Agjencisë për Informim dhe Privatësi, që është institucioni kompetent për trajtimin e këtyre ankesave, e drejta për tu harruar është e drejtë pak e njohur nga qytetarët, prandaj edhe numri i ankesave të bëra në këtë institucion në lidhje me shkeljen e kësaj të drejte është tejet i vogël.

Sipas statistikave zyrtare të pranuara nga Agjencia për Informim dhe Privatësi, në vitin 2022 ka qenë vetëm 1 ankesë për përmbushjen e të drejtës për tu harruar. Ndërsa gjatë këtij viti kanë qenë 146 ankesa në lidhje me shkeljen e të dhënave personale në përgjithësi, 33 ndaj institucioneve publike dhe 113 ndaj institucioneve private.
Ndërsa sa i përket vendimeve të nxjerra, gjatë vitit 2022 AIP kishte nxjerrë 172 vendime, 23 vendime ndaj instit
ucioneve publike dhe 149 ndaj institucioneve private. Pra, këtu shihet se shkelja e të dhënave personale është bërë dukshëm më shumë nga institucionet private, se sa ato publike.
Prej këtyre vendimeve, 8 vendime kanë qenë dënime për shqiptimin e gjobave kundërvajtëse, 4 ndaj institucioneve publike dhe 4 ndaj institucioneve private. Vlera e këtyre vendimeve me gjobë arrinte shumën 169 mijë euro.

Për të arritur qëllimet dhe objektivat e këtij raporti, Lëvizja FOL ka intervistuar edhe përfaqësuesit e organizatave të shoqërisë civile dhe mediave në lidhje me atë se sa e shohin të rëndësishme mbrojtjen e të dhënave personale, si dhe se si e vlerësojnë nivelin e tyre të informimit për të drejtën për t`u harruar, në veçanti.
Në përgjithësi, të gjitha organizatat janë shprehur se kanë njohuri për këtë të drejtë, dhe që kanë zhvilluar aktivitete për promovimin e të drejtës së privatësisë, por jo edhe për të drejtën për tu harruar në veçanti.

Në fund, Lëvizja FOL rekomandon që të gjithë qytetarët të cilët pretendojnë se u janë publikuar të dhëna personale nga institucionet apo kompanitë, të dhëna që nuk kanë ndonjë interes publik, apo që e kanë humbur qëllimin fillestar të publikimit të tyre, të kërkojnë nga ta që të njëjtat të fshihen, dhe nëse të drejtat e tyre nuk realizohen, t`i drejtohen me ankesë Agjencisë për Informim dhe Privatësi ne mënyrë që ta përmbushin të drejtën e tyre.

Raportin e plotë mund ta gjeni këtu

Lëvizja FOL do të vazhdojë me monitorimin rreth zbatimit të kësaj të drejte dhe të ankesave eventuale nga qytetarët.

Prishtinë, 05 shtator 2023 – Eshtë mbajtur punëtoria dy ditore e Trajnimit për Trajner të Akademisë së Drejtësisë rreth Gjykimit të Rasteve të Korrupsionit nga trajnuesit nga Shtetet e Bashkuara të Amerikës z. Jonathan Haëley dhe z. Anthony Porcelli prej Federal Judicial Center (FJC) të angazhuar nga The CEELI Institute.

Ky trajnim është duke u realizuar në kuadër të projektit “Lufta efektive kundër korrupsionit” (ECAC) përkrahur nga IFES dhe CEELI Institute, ku FOL është partner për Kosovën.

Kjo është punëtoria e dytë në kuadër të këtij trajnimi i cili është hartuar për të përmirësuar aftësitë e trajnerëve dhe për të përditësuar metodologjinë dhe kurrikulat e tyre ekzistuese.

Prishtinë 1 shtator 2023 – Lëvizja FOL në kuadër të projektit “Lufta efektive kundër korrupsionit” (ECAC) përkrahur nga IFES, ka mbajtur sot “Punëtorinë Rajonale për Strategjinë Kundër Korrupsionit”.
Qëllimi i kësaj punëtorie një ditore ishte identifikimi i boshllëqeve ekzistuese në zhvillimin e strategjive kundër korrupsionit, me fokus në bashkëpunimin rajonal.
Pjesëmarrës në këtë punëtori ishin përfaqësues të institucioneve dhe shoqërisë civile nga vendi dhe rajoni.
Punëtoria u hap me një diskutim mbi rëndësinë e bashkëpunimit rajonal në luftën kundër korrupsionit, sfidat në draftimin e strategjisë kundër korrupsionit dhe shkëmbimin e përvojave dhe praktikave që nxisin transparencën dhe mirëqeverisjen e institucioneve.

Të ftuar ishin: z. Yll Buleshkaj – Drejtor i Agjencia për Parandalimin e Korrupsionit/ Agencija za Sprečavanje Korupcije (Kosovë), znj. Jelena Perovic – Drejtore e Agjencisë për Parandalimin e Korrupsionit (Mali i Zi), znj. Marta K. Gazideda – UNDP Kosovo dhe z. Vedat Sagonjeva – Drejtor i Zyrës për Planifikime Strategjike pranë Zyrës së Kryeminstrit.
Prezent ishin edhe: Nuri Bajrami nga Komisioni Shtetëror për Parandalimin e Korrupsionit (Maqedoni e Veriut), Hener Shanaj – Drejtoria e Përgjithshme Kundër Korrupsionit (Shqipëri), Nikola Lekic – Agjencia për Parandalimin e Korrupsionit (Mali i Zi), German Filkov – Center for Civil Communications – CCC (Maqedoni e Veriut), Jasna Filipovic – Centar za primenjene evropske studije (Serbi), si dhe përfaqësues të organizatave të shoqërisë civile në Kosovë të cilët janë pjesë e grupit punues për hartimin e strategjisë kundër korrupsionit.

Në pjesën e dytë të ditës, është mbajtur sesioni mbi identifikimin e boshllëqeve dhe praktikave më të mira, ku pjesëmarrësit janë ndarë në grupe dhe kanë diskutuar mbi praktikat e suksesshme në draftimin e strategjisë kundër korrupsionit duke përfshirë mënyrat se si të rritet bashkëpunimi mes vendeve të rajonit, vetëdijesimi qytetarë, dhe edukimi në fushën kundër korrupsionit.
Pas kësaj, grupet kanë ndarë perspektivat e tyre mbi kornizën ligjore ekzistuese, nevojën për forcim të mekanizmave që mbajnë institucionet përgjegjëse për implementim të strategjisë kundër korrupsionit.

Rekomandimet e dala nga kjo punëtori do të i prezatohen grupit punues të Qeverisë së Kosovës per hartimin e strategjisë kundër korrupsionit.

Prishtinë, 30 gusht 2023 – Lëvizja FOL, me mbështetjen e IFES në kuadër të projektit “Lufta Efektive Kundër Korrupsionit”, ka publikuar sot raportin “Kapacitetet e Agjencisë për Parandalimin e Korrupsionit në përmbushjen e obligimeve ligjore”.
Në këtë raport, Lëvizja FOL ka analizuar kapacitetet aktuale të Agjencisë për Parandalimin e Korrupsionit mbi mundësitë e përmbushjes së mandatit ligjor, kompetencat dhe përgjegjësit, në raport me rritjen e vëllimit të punëve të paraparë me miratimin e ligjeve të reja që e mbulojnë fushëveprimatarinë e kësaj agjencie.

Albana Hasani, Hulumtuese në Lëvizjen FOL, prezantoj gjetjet e këtij raporti. Hasani tha se dihet se me hyrjen në fuqi të Ligjit për Agjencinë për Parandalimin e Korrupsionit dhe të Ligjit për Deklarimin, Prejardhjen dhe Kontrollin e Pasurisë dhe të Dhuratave, kompetencat dhe përgjegjësitë e Agjencisë për Parandalimin e Korrupsionit janë rritur në masë të madhe.
Kjo rritje e përgjegjësive ndikohet veçanërisht nga rritja e numrit të zyrtarëve publik të cilët obligohen t`a deklarojnë pasurinë. Pra, krahas rreth 5,000 zyrtarëve publik që kanë qenë të obliguar të deklarojnë pasurinë, me dispozitat e Ligjit të ri për Deklarimin e Pasurisë ky numër i zyrtarëve është rritur në rreth 20,000 zyrtarë.

Por sipas Hasanit, pavarësisht shumëfishimit të punëve dhe përgjegjësive, të këtij institucioni të bëra nga Kuvendi i Republikës së Kosovës, organi ligjvënës ka paraparë rritje minimale të buxhetit të Agjencisë për Parandalimin e Korrupsionit për vitin 2023.

Hasani ka theksuar gjithashtu se, sipas Ligjit për Ndarjet Buxhetore për Buxhetin e Republikës së Kosovës për vitin 2023, buxheti i Agjencisë ka pësuar ngritje vetëm për 12.000 euro, apo vetëm 2.21% në krahasim me vitin 2022. Pra, sipas Hasanit, kjo nënkupton se Agjencia për Parandalimin e Korrupsionit, si shkak i kostos buxhetore, do ta ketë të pamundur të realizoj obligimet që i janë shtuar me ligjet e ndryshuara.

Gjithashtu, pavarësisht shumëfishimit të vëllimit të punëve të Agjencisë për Parandalimin e Korrupsionit, numri i të punësuarve në këtë institucion edhe gjatë këtij viti do të vazhdoj të mbetet i njëjtë sikurse në vitin paraprak, pra vetëm 43 të punësuar. Pra agjencia vazhdon punën me stafin që e kishte para plotësim/ndryshimeve legjislative, ndërsa kërkesa e agjencisë për plotësime të stafit vazhdon të mbetet ende e pa aprovuar nga institucionet kompetente.
Pra, planifikimi buxhetor i bërë nga Qeveria e Kosovës dhe i miratuar nga Kuvendi i Kosovës nuk i përmbush nevojat dhe kërkesat e Agjencisë për Parandalimin e Korrupsionit në përmbushjen e obligimeve ligjore.

“Gjithashtu, duhet të theksohet se Strategjia dhe Plani i Veprimit për Parandalimin e Korrupsionit, hartimi i së cilës deri në hyrjen në fuqi të ligjit të ri ishte në kompetencë të agjencisë, e tani ka kaluar në kompetencë të Qeverise (dhe pra agjencia e bën vetëm monitorimin e zbatimit të saj), nuk është hartuar ende. Pra, Institucionet e Republikës së Kosovës edhe pas një periudhe të gjatë kohore, po vazhdojnë të kenë mungesë të Strategjisë dhe Planit të Veprimit për Luftimin e Korrupsionit”, ka thënë ndër të tjera Hasani.
“Pra procesi i hartimit të këtij dokumenti te rëndësishëm është ne fazën fillestare te tij dhe do të shohim nëse i njëjti do te finalizohet brenda kohës se parapare”, ka përfunduar Hasani.

Bazuar në të gjeturat e këtij raporti, Lëvizja FOL ka dhënë disa rekomandime, disa prej të cilave janë:
• Të rritet buxheti i destinuar për Agjencinë për Parandalimin e Korrupsionit në rishikimin e buxhetit për vitin 2023. Kjo rritje buxhetore do t’i mundësonte agjencisë t’i përmbushë obligimet e ngarkuara me ligjin e ri në mënyrë efektive, si dhe të përmbushë objektivat e saj në luftimin dhe parandalimin e korrupsionit.

• Të përmbushen kërkesat e agjencisë për rritjen e numrit të stafit të agjencisë dhe për përmirësim të infrastrukturës së objektit të agjencisë.

• Të ngritën kapacitetet profesionale të agjencisë dhe aspektet tjera të avancimit të zyrtarëve të agjencisë në trajtimin e rasteve të konfliktit të interesit, të sinjalizimit, si dhe të deklarimit të pasurisë përmes trajnimeve.

• Si dhe qe Qeveria e Kosovës të ndërmarrë hapa të shpejtë në drejtim të finalizimit të Strategjisë Shtetërore dhe Planit të Veprimit për Parandalimin dhe Luftimin e Korrupsionit.

Prishtinë 22 gusht 2023 – Lëvizja FOL ka publikuar sot të dhënat nga monitorimi i Planit Vjetor të Punës së Qeverisë, tashmë të quajtur Plani Kombëtar për Zhvillim.
Znj. Mexhide Demolli-Nimani, drejtore e Lëvizjes FOL tha se para se të prezantojmë realizimin e aktiviteteve për secilën ministri, do prezantojmë disa të dhëna sa i përket përmbajtjes së këtij plani. “Plani Kombëtar për Zhvillim është përpjekja e tretë e Qeverisë Kurti 2 për planifikimin operacional të punës së saj, duke ndërruar formën e planifikimin për secilin vit që nga ardhja në pushtet”, tha ajo, duke shtuar se pikërisht për ketë kanë bërë edhe një analizë të shkurtër të këtij plani. Një nga të metat e mëdha të këtij lloji të planifikimit është vështirësia e zyrtarëve publik për planifikim të mirëfilltë dhe kuptim të PKZH-së, e cila përsëritet për çdo vit.

Sipas znj. Demolli – Nimani, Lëvizja FOL ka identifikuar këto të gjetura kryesore:

– Elementet kryesore të Planit Kombëtar për Zhvillim (tani e tutje: PKZh) janë: qëllimet zhvillimore dhe strategjike të shoqëruar me tregues të ndikimit dhe tregues kryesor të rezultateve, masat strategjike të shoqëruara me tregues të rezultateve, veprimet e shoqëruara me tregues të produkteve, peshimi i masave strategjike dhe veprimeve, afatet kohore, buxheti dhe elemente tjera më pak të rëndësishme.
Plani ka një logjikë rrjedhëse, mirëpo pas analizimit të të njëjtit, vërehet së në fakt planifikimi operacional ka mangësi të tepërta të cilat e bëjnë planin të pa lexueshëm, të pa kuptueshëm dhe që nuk tregon asgjë apo edhe e fsheh zbatimin e vërtetë të PKZh.

– Aktivitetet e parapara në PKZh nuk korrespondojnë me Programin Legjislativ për vitin 2023. Për shembull, Ministria e Shëndetësisë në Planin Legjislativ gjithashtu ka paraparë 5 projektligje por asnjëra nuk është përfshirë në Planin Strategjik Kombëtar; Ministria e Drejtësisë në Planin e saj Legjislativ kishte paraparë miratimin e 9 projektligjeve, ndërsa në Planin Strategjik Kombëtare janë paraparë vetëm 8 projektligje; Zyra e Kryeministrit ka parapare miratimin e 5 projektligjeve në Planin Legjislativ por vetëm 1 prej tyre është përmendur edhe në Planin Strategjik Kombëtare.

– Masat strategjike të PKZh-së janë intervenimet të cilat ndërmerren për një periudhë 3 vjeçare, të cilat shoqërohen me tregues, veprime dhe buxhet përkatës. Sidoqoftë, hartimi i masave nga ana e ministrive nuk ka uniformitet. Mungesa e uniformitetit vërehet në nivelin e masës: në disa raste janë jashtëzakonisht specifike ndërsa në disa raste të tjera janë pothuajse të barasvlershme si vet qëllimi strategjik. E njëjta vlen edhe për nivelin e treguesve. Edhe pse për masa strategjike është dashur të caktohen tregues të rezultateve, ato janë përzier me tregues të produkteve, e në raste të caktuara edhe me ato të ndikimit.
Po ashtu, në shumë raste buxheti mungon dhe nuk dihet se sa shpenzohet për një masë të caktuar për arritjen e treguesve të vendosur. Një nga shkaqet për këtë është mungesa e kapaciteteve analitike për lidhjen e buxhetit dhe shpenzimeve me procesin dhe rezultatet e synuara.

– E metë tjetër e planit është mungesa e komunikimit të masave strategjike me qëllimet strategjike apo me treguesit e vendosur në qëllimet strategjike. P.sh., Ministria e Drejtësisë orienton masat e saj në politika si koncept dokumentet, strategjitë apo ligjet, ndërsa treguesit kryesor të ndikimit janë tregues për zvogëlimin e kohës për raste në nivele të ndryshme gjyqësore. Edhe pse politika të rëndësishme për ndryshime, të njëjtat nuk komunikojnë me treguesit e qëllimeve strategjike.
Mirëpo, kjo tregon në veçanti mungesën e kuptimit të PKZh-së nga ana e zyrtarëve publikë dhe planifikimin jo të mirë operacional në metodologji dhe formë.

– Peshimi është zbulimi i ri i Qeverisë në planifikimin operacional, për të cilin nuk ka informacione dhe nuk ka ndonjë shpjegim se pse bëhet apo si kalkulohet. Në këtë plan ne kemi dy raste kur bëhet peshimi: një tek masat strategjike dhe një tek aktivitetet.

Peshimi ka pesë nivele, nga 1 si më e ulëta deri në 5 si më e larta. Mirëpo, edhe në mungesë të shpjegimeve apo formulave/kalkulimeve, vërehet një mungesë e madhe uniformiteti në vlerësime që mund të zbërthehen sipas masave strategjike, veprimeve, institucioneve apo edhe qëllimeve zhvillimore e strategjike.
Ka raste kur një koncept dokument vlerësohet 5 e ka raste kur vlerësohet 3. E njëjta edhe me veprimet tjera më të parëndësishme, ku përfundimi i veprimit nuk ka ndonjë efekt në arritjen e treguesit të rezultateve, e sidomos në treguesit kryesor të rezultateve dhe treguesve të ndikimit. Pra, ka të meta të mëdha në peshim, me aq sa mund të kuptohet nga tabela e PKZh-së.

– Veprimet janë pjesa kryesore operacionale e PKZh-së ku reflektohen intervenimet që ndërmerr Qeveria për arritjen e synimeve. Në shumë raste veprimet janë jo të nivelit të njëjtë: ka veprime të cilat janë të përgjithshme të cilat interpretohen në forma të ndryshme dhe që matet me tregues të ndryshëm, kryesisht të produktit, që shpesh herë janë ngatërruar me tregues të inputit apo me tregues që nuk tregojnë asgjë.
Ndërsa afatet për veprime janë vendosur se kur ato fillojnë dhe kur përfundojnë. Mirëpo një pjesë e madhe e tyre kanë afate të vazhdueshme për 1 vit apo 3 vite. Pra, fillon në janar dhe mbaron në dhjetor të vitit përkatës, apo kështu përsëriten për secilin vit. Ky është edhe një tregues që veprimet janë veprime jo reformuese por rutinore, të cilat edhe po të mos vendosen në plan, ato do të realizohen nga ministritë.
Ndërkaq Albana Hasani, Hulumtuese e Lartë në Lëvizjen FOL prezantoj realizimin e aktiviteteve për secilën ministri:

Pasqyra e realizimit të aktiviteteve të parapara në gjashtë mujorin e parë të vitit 2023 nga ana e dikastereve të Qeverisë:
– MASHT – Nga 10 aktivitete të parapara të përfundojnë në tre mujorin e dytë të vitit 2023, 4 prej tyre nuk janë përfunduar.

– ZKM – Ka planifikuar 47 aktivitete që të përfundohen deri në fund të 3 mujorit të dytë, ndërkaq ka realizuar vetëm 12 prej tyre.

– MPBZHR – ka planifikuar të realizoj 5 aktivitete nga të cilat i ka përfunduar të gjitha.

– MSH – ka planifikuar 14 aktivitete prej të cilave i ka realizuar vetëm 8 aktivitete.

– MKK – ka paraparë vetëm 1 dhe atë e ka realizuar.

– MZHR – ka paraparë vetëm 1 dhe atë e ka realizuar.

– MM – ka parapare vetëm 2 aktivitete prej të cilave vetëm një është realizuar.

– MAPL – ka planifikuar vetëm 4 aktivitete dhe ka realizuar ka realizuar 3 dhe 1 nuk e kanë realizuar.

– MD – ka planifikuar 14 aktivitete të përfundojnë brenda 6 mujorit të parë. Nga to 5 janë përfunduar, 6 nuk janë përfunduar ndërkaq për dy të tjera nuk kanë ofruar përgjigje.

– MPB – ka planifikuar 16 aktivitete, prej te cilave ka realizuar vetëm 2.

– MFPT – ka planifikuar 8 aktivitete prej të cilave i ka përfunduar 6 dhe 2 nuk janë realizuar.

– MINT – ka paraparë 18 aktivitete prej të cilave 7 i ka përfunduar dhe 10 nuk i kanë përfunduar dhe për 1 nuk kanë ofruar përgjigje.

– ME – ka planifikuar 5 aktivitete prej të cilave ka përfunduar vetëm 3 ndërkaq 2 nuk janë realizuar ne afatin e paraparë.
– Ndërkaq këto ministri nuk kanë kthyer përgjigjje: MMPHI(e cila i kishte të planifikuara 15 aktivitete për këtë periudhë), MPJD(e cila i kishte të planifikuara 7 aktivitete) dhe MKRS(kishte paraparë 8 aktivitete). Prandaj aktivitetet e tyre nuk janë përfshire fare në kalkulim.

Në tërësi, në 6 mujorin e parë të vitit 2023 në Planin Kombëtar për Zhvillim është paraparë realizimi i 175 aktiviteteve, prej të cilave kanë arritur të realizohen vetëm 60 nga to brenda afatit të paraparë.

Si përfundim, Lëvizja FOL ka nxjerrë këto konkluzione:
– Planifikimi i punës së Qeverisë është i pakuptueshëm, i pa lexueshëm dhe metodologjia e përdorur nuk tregon zbatimin e vërtetë, madje në disa raste e fshehë zbatimin e ulët.
– Metodologjinë e planifikimit të punës së Qeverisë nuk e kuptojnë as vetë zyrtarët publikë të cilët e hartojnë PKZH-në.
– Aktivitetet e parapara në PKZh nuk korrespondojnë më Programin Legjislativ për vitin 2023.
– Qëllimet, masat, veprimet, peshimi dhe buxheti janë të ndërlikuara, të përziera, jo uniforme dhe mungojnë në shumë raste.
– Elementet e PKZH-së nuk komunikojnë njëra me tjetrën: masat strategjike apo veprimet e propozuara nuk ndikojnë në arritjen e rezultateve të caktuara.
– Afatet kohore janë të vendosura në atë mënyrë që mund të interpretohen edhe si nisje edhe si mbarim, kur për këto vendosen statistika, gjë që fsheh mungesën e zbatimit apo zbatimin e ulët.

Prishtinë, 15 gusht 2023 – Lëvizja FOL hap thirrjen për aplikimin për Akademinë e Juristëve të Rinj në Kosovës, që do të zhvillohet nga datat 11-15 shtator 2023.

Akademia e Juristëve të Rinj në Kosovë organizohet në kuadër të Projektit Rritja e Transparencës dhe Arsimimit të Rinjve në Sektorin e Drejtësisë, mbështetur nga Departamenti i Shtetit Amerikan, përmes Byrosë Ndërkombëtare për Çështje të Narkotikëve dhe Sundim të Ligjit (INL).
Të drejtë aplikimi kanë studentët e drejtësisë, të sapo diplomuarit në Fakultetin Juridik si dhe profesionistët e rinj ligjor.

Akademia synon të ofrojë një platformë të gjerë dhe ndërvepruese për juristët/et e rinj/reja për të avancuar në nivel praktik aftësitë e tyre ligjore, për të fituar njohuri më të thella në disiplina të ndryshme të ligjit dhe për t’u rrjetëzuar me individë dhe profesionistë në fushën e sundimit të ligjit. Programi përfshinë sesione gjithëpërfshirëse mbi shkrimin ligjor, etikën ligjore, të drejtën kushtetuese të avancuar dhe organizimin shtetëror, të drejtën e procedurës civile, të drejtën penale materiale dhe procedurale si dhe trajtimin e rasteve të simuluara.

Të gjitha këto tema do të trajtohen nga një perspektivë interaktive e sjellë nga profesionist të fushave duke përfshirë gjyqtarë, prokurorë, avokat, përfaqësues nga Shoqëria Civile në Kosovë, përfaqësues të institucioneve tjera ligj-zbatuese dhe ekspert të njohur të fushave përkatëse.

Kriteret për aplikim dhe pjesëmarrje:
• studentë të drejtësisë në vitin e fundit të studimeve ose kandidatët që janë duke ndjekur një program të nivelit Master në Kosovë.
• të sapo diplomuarit në drejtësi, të cilët nuk kanë filluar ende karrierën e tyre profesionale ligjore, me kusht që të kenë diplomuar, në studimet themelore apo master, në vitin 2021 ose më vonë.
• praktikantë ligjor apo zyrtar ligjor nën moshën 25 vjet.

Përveç kritereve të mësipërme, ne jemi në kërkim të individëve që demonstrojnë një përkushtim të fortë ndaj edukimit të tyre ligjor dhe një interes të qartë për të përmirësuar aftësitë e tyre në shkrim, hartim, dhe hulumtim ligjor, si dhe për fushat përkatëse që ky aktivitet synon ti targetojë.

Akademia synon të jetë një javë mësimi të thellë, rrjetëzimi dhe një hap i rëndësishëm në karrierën tuaj ligjore.

Për të aplikuar, ju lutemi klikoni këtu

Afati i fundit për aplikim është 28.08.2023. Ju lutemi keni parasysh se numri i pjesëmarrësve në këtë Akademi është i kufizuar dhe ne inkurajojmë aplikimet e hershme. Aplikantët e suksesshëm do të njoftohen me email deri më 4 shtator 2023

Ne mezi presim të shqyrtojmë aplikimet tuaja dhe shpresojmë t’ju mirëpresim në shtator për një hap të jashtëzakonshëm në zhvillimin profesional.

Prishtinë, 31 korrik 2023 – Lëvizja FOL gjatë periudhës prill – qershor 2023 ka monitoruar takimet e Këshillit Gjyqësor të Kosovës (KGjK) për të vlerësuar nivelin e transparencës dhe pajtueshmërinë e këtyre takimeve me Ligjin për Këshillin Gjyqësor të Kosovës.

Procesi i monitorimi është bërë përmes platformes elektronike Zoom. Gjatë kësaj periudhe tre-mujore, KGjK ka mbajtur gjithësej 5 takime. Për muajin prill janë mbajtur 2 takime, 1 takim për muajin maj dhe për muajin qershor 2 takime.

Prej 5 agjendave të publikuara në ueb-faqen zyrtare të KGjK-së, 3 nga agjendat janë publikuar në kohën e paraparë me Ligjin për Këshillin Gjyqësor, konkretisht me nenin 14 paragrafi 2 ku kërkohet që “Rendi i ditës së Këshillit do të jetë publikisht i hapur së paku dyzet e tetë (48) orë para takimit.” Ndërsa 2 agjenda të tjera nuk janë publikuar me kohë ashtu siç e parashikon edhe legjislacioni në fuqi.

KGjK në mbledhjet saj ka marrë disa vendime dhe se të njëjtat janë publikuar në ueb-faqen e KGjK. Për këtë periudhë kohore KGjK ka marrë 76 vendime, prej të cilave vetëm 1 nuk është publikuar në ueb faqen zyrtare të KGjK-së.

Anëtarët më aktiv gjatë mbledhjeve të KGjK-së për këtë periudhë tre-mujore, të cilët kanë dhënë më së shumti kontribut në diskutimet e zhvilluara në këto takime, ishin: Drita Rexhaj, Avni Mehmeti dhe Fahret Vellija.

Detajet e këtij monitorimi i gjeni në linkun: https://levizjafol.org/wp-content/uploads/2023/07/Monitorimi-i-Mbledhjeve-t%C3%AB-KGJK-s%C3%AB.pdf

Ky projekt mbështetet nga Departamenti i Shtetit Amerikan, përmes Byrosë Ndërkombëtare për Çështje të Narkotikëve dhe Sundim të Ligjit (INL).

Prishtinë, 28 korrik 2023 – Lëvizja FOL dënon ashpër vendimin e Ministrisë së Industrisë, Ndërmarrësisë dhe Tregtisë, konkretisht të Komisionit për Shqyrtimin e Ankesave për Regjistrimin e Bizneseve, mbi refuzimin e ankesës së Klan Kosovës.
Ky vendim është autoritar dhe përbën ndërhyrje të pastër politike ndaj medias së lirë e cila konsiderohet si shtylla e katërt e demokracisë. Fjala e lirë është e drejtë kushtetuese, e garantuar me Kushtetutën e Kosovës dhe cenimi i saj përben shkelje. Rrjedhimisht, nuk mund të ketë legjitimitet dhe të quhet demokratike një vendim i cili cenon lirinë e një medie.
Në një demokraci funksionale, media e lirë dhe e pavarur luan një rol të rëndësishëm në informimin e qytetarëve, zhvillimin e një debati të hapur dhe kritik ndaj qeverisjes dhe përgjegjësinë e institucioneve publike.
Prandaj, mbesim me shpresën që gjykata kompetente për shqyrtimin e ankesës të vendos në pajtim me normat kushtetuese dhe ligjore.

#meklankosova

Prishtinë, 24 korrik 2023 – Lëvizja FOL edhe gjatë muajit qershor ka vazhduar të bëjë monitorimin e aktgjykimeve dhe aktvendimeve të publikuara në ueb faqen zyrtare të Këshillit Gjyqësor të Kosovës. Të gjitha këto vendime të publikuara nga Gjykatat e Kosovës gjatë kësaj periudhe janë monitoruar një nga një sa i përket përmbushjes së kërkesave që përcaktohen me aktet nënligjore në fuqi.
Gjatë muajit qershor gjykatat kanë publikuar 2798 vendime gjyqësore në ueb-faqen zyrtare të Këshillit Gjyqësor të Kosovës. Numrin më të madh të vendimeve i ka publikuar Gjykata e Apelit, përkatësisht 544 vendime gjyqësore.
Të dhënat e detajuara në lidhje me publikimin e vendimeve nga secila gjykatë në veçanti, duke përfshirë degët dhe depratamentet e tyre, mund t’i shihni në grafikonët e mëposhtëm.

Prishtinë, 17 korrik 2023 – Instituti i Kosovës për Drejtësi (IKD) dhe Lëvizja FOL, reagojnë ndaj vendimit të Qeverisë së Republikës së Kosovës së datës 12 korrik 2023, me të cilin vendim është miratuar versioni i ri i Projektligjit për Këshillin Prokurorial të Kosovës (KPK), pas ndryshimeve të bëra nga Ministria e Drejtësisë. Kjo pasi fillimisht ligji i mëparshëm ku ishte ndryshuar përbërja e KPK-së, me 5 prill 2023 ishte shpallur kundër kushtetues nga Gjykata Kushtetuese.
Sipas ndryshimeve të reja të Projektligjit të ri, KPK do të ketë 19 anëtarë deri me 11 janar 2026. Pas kësaj date, Ministria e Drejtësisë ka propozuar që KPK të ketë 7 anëtarë me këtë përbërje.

Sipas Projektligji [neni 21.1.] deri më 11 janar të vitit 2026, KPK-së do ti shtohen edhe tetë (8) anëtarë jo-prokurorë të zgjedhur me shumicë të thjeshtë nga Kuvendi, pesë (5) prej të cilëve zgjedhen nga Kuvendi, dy (2) prej të cilëve zgjedhen në bazë të katër (4) nominimeve që pranohen nga Avokati i Popullit për përfaqësues nga radhët e anëtarëve të organizatave të shoqërisë civile, ndërsa një (1) pozitë rezervohet për profesorët universitar të drejtësisë. Sa i përket kuorumit deri më 11 janar të vitit 2026, kuorumi i Këshillit formohet me gjysmën e anëtarëve të zgjedhur të Këshillit [Neni 21.3. i Projektligjit]. Në rast se të gjithë anëtarët e Këshillit zgjedhën, kuorumi formohet me dymbëdhjetë (12) anëtarë. Ky rregull zbatohet deri më 11 janar të vitit 2026 [Neni 21.3. i Projektligjit]. Kështu, nga qëllimi fillestar për ta zvogëluar numrin e anëtarëve të KPK-së nga 13 në 7 anëtarë, MD-ja e ka rritur këtë numër në 19 anëtarë deri në vitin 2026.
Dispozitat në fjalë nuk janë në përputhje me Kushtetutën e Republikës së Kosovës, Strategjinë për Sundim të Ligjit dhe Opinionet e Komisionit të Venecias.
Më 11 gusht 2021, Qeveria miratoj Strategjinë për Sundim të Ligjit, e cila ishte derivat i procesit të Rishikimit Funksional të Sundimit të Ligjit në Kosovë. Strategjia në fjalë dhe dokumentet e politikave e theksonin problemin e numrit të madh të anëtarëve prokurorë në KPK. Por, rritja e numrit të anëtarëve të KPK-së në këtë mënyrë nuk parashihej si opsion. Në këtë situatë, Projektligji në fjalë është në kundërshtim me Strategjinë për Sundim të Ligjit të miratuar nga Qeveria.
Rritja e numrit të anëtarëve të KPK-së në 19, tetë (8) prej të cilëve do të zgjedhen me një shumicë të thjeshtë nga Kuvendi, dhe rregulla se kuorumi në KPK mund të krijohet vetëm edhe me pjesëmarrjen e anëtarëve të zgjedhur nga Kuvendi paraqet politizim objektiv të KPK-së. Secila Qeveri, supozohet se e ka edhe shumicën parlamentare në Kuvend. Si rrjedhojë, secila Qeveri, përmes Kuvendit, do të ketë mundësi që pa asnjë konsensus politik të zgjedhë anëtarët e KPK. Kuorumi në KPK do të varet pikërisht nga këta anëtarë. Si rrjedhojë, objektivisht, KPK do të jetë e politizuar. Këto rregulla janë në kundërshtim me Kushtetutën [neni 110.1] që përcakton se “Këshilli Prokurorial i Kosovës është institucion plotësisht i pavarur në kryerjen e funksioneve të tij, në pajtim me ligjin”.

Siç u tha, projektligji paraprak për KPK ishte shpallur kundër kushtetues nga Gjykata Kushtetuese. Duke pasur parasysh rëndësinë e reformës në sistemin prokurorial, IKD rikujton se jurisprudenca e Gjykatës Kushtetuese dështon se interpretimi nga kjo gjykatë shtrihet përtej tekstit kushtetues, në frymën dhe vlerat kushtetuese. Si rrjedhojë, këto manovrime janë vështirë të kalueshme në Gjykatën Kushtetuese, nëse eventualisht edhe ky Projektligj i nënshtrohet vlerësimit të kushtetutshmërisë nga ana e Gjykatës Kushtetuese.
Tutje, një praktikë e tillë me numër kaq të madh të anëtarëve të KPK-së, nuk është hasur as në vendet e rajonit e as më gjerë. Kjo zgjidhje nuk ishte përkrahur nga ana e Komisionit të Venecias. “KPK do të bëhej shumë e madhe (mbi më shumë se 20 anëtarë), në raport me numrin e vogël të prokurorëve në Kosovë. Kjo zgjidhje sigurisht se do të ishte shumë e kushtueshme….” thuhej në raportin e Komisionit të Venecias [CDL- AD (2021)051, Kosova, par. 61].
Në këtë mënyrë, Projektligji për KPK i miratuar nga ana e Qeverisë, nuk është në linjë me Kushtetutën e Republikës së Kosovës, Strategjinë për Sundimin e Ligjit dhe Opinionet e Komisionit të Venecias. Objektivisht, një zgjidhje e tillë e vendosë KPK para politizimit të skajshëm të Kuvendit, shumicën në secilin rast e ka Qeveria. Si të tillë, IKD dhe Lëvizja “FOL” vlerësojnë se Projektligji për KPK i miratuar në Qeveri nuk përmbushë domoshmërinë për reformë në KPK dhe i ekspozohet rrezikut për dështim të serishëm të këtij ligji.Në anën tjetër, duhet theksuar se IKD pas vënies në konsultim publik të këtij projektligji nga Ministria e Drejtësisë, ka dërguar komente në lidhje me këtë projektligj duke ofruar një zgjidhje adekuate dhe të përshtatshme lidhur me përbërjen e anëtarëve të KPK-së në të ardhmen, në harmoni me aktgjykimin e Gjykatës Kushtetuese ku me vendimin e kësaj të fundit veçse është humbur mundësia e shkurtimit të mandateve të anëtarëve aktual. Sipas IKD-së, në mënyrë që të shmangej përbërja “korporatiste”, por edhe të bëhej balancimi në mes të përfaqësuesve të prokurorëve dhe kuvendit, KPK duhet të ketë 7 anëtarë, ku dy (2) anëtarë të zgjedhur nga sistemi prokurorial dhe Kryeprokurori i Shtetit sipas detyrës zyrtare dhe katër (4) anëtarë të zgjedhur nga Kuvendi, një prej të cilëve duhej të jetë prokurorë.

Me këtë përbërje, sipas IKD-së, prokurorët nuk do ta kishin shumicën në KPK por se këtë shumicë do ta kishte Kuvendi. Në anën tjetër kjo nuk mund të konsiderohej se Kuvendi e mbisundon me përbërje KPK, për faktin se Kuvendi do të obligohej që të paktën njërin nga anëtarët e saj ta zgjedhë një prokuror. Rrjedhimisht, në KPK do të ishin 4 prokurorë, njëri prej të cilëve zgjedhet nga Kuvendi. Kjo përbërje do të krijonte një balancë adekuate në mes të numrit të anëtarëve të KPK-së që zgjedhen nga sistemi prokurorial dhe atyre që zgjedhen nga Kuvendi.
IKD kishte paraparë që ripërtërija e përbërjes së KPK-së të jetë e përshkallëzuar kjo pasi sipas vendimit të Gjykatës Kushtetuese nuk mund të i’u merret mandati anëtarëve aktual të KPK-së dhe sipas IKD-së zgjidhja adekuate në këtë situatë do të ishte duke ruajtur mandatet aktuale të anëtarëve. Sipas IKD-së në dispozitat kalimtare, do duhej përcaktuar se deri me 1 janar 2026, kur KPK mbetet me dy anëtarë, përkatësisht një anëtarë prokuror dhe Kryeprokurori i Shtetit, anëtarët e KPK-së të cilët përfundojnë mandatin nuk do të kishin mundësi që të zëvendësoheshin me anëtarë të tjerë. Gjatë vitit 2025, Kuvendi do të duhej të zhvillonte procedurat për përzgjedhjen e katër (4) anëtarëve të KPK-së ku secili prej tyre, do të fillojë mandatin më 1 janar 2026, kur Këshilli do të mbetej me dy (2) anëtarë. Njëkohësisht, edhe sistemi prokurorial do ta zgjedhë edhe një anëtarë të KPK-së dhe si rrjedhojë, më 1 janar 2026, KPK do të ishte e kompletuar me 7 anëtarë.

Megjithatë, këto komente të IKD-së janë injoruar nga Ministria e Drejtësisë, e cila ka zgjedhur një rrugë të shkurtë dhe jo adekuate. Nga ajo që u tha më lartë, IKD dhe Lëvizja “FOL” konsideron se Projektligji i ri me ndryshimet e bëra nga Ministria e Drejtësisë ka humbur qëllimin dhe arsyen se pse në të vërtetë është filluar reforma në Këshillin Prokuorrial të Kosovës.
Me përbërjen prej 19 anëtarëve të KPK-së, ku 8 prej tyre do të jenë jo prokurorë rrezikohet skajshmërisht politizimi Këshillit, duke përfshirë rrezikun për bllokim të tërësishëm të vendimmarrjes, kjo pasi nëse zgjedhen të gjithë anëtarët jo prokurorë atëherë korumi do të formohet me 12 anëtarë të KPK-së, që në çdo rast do të krijonte një varësi nga shumica qeverisëse. Për të mos ardhur deri tek një bllokadë në vendimmarrje, ku interesat e ngushta të asnjë grupi nuk do të mbizotëronin, në opinionin e dytë, Komisioni i Venecias kishte rekomanduar që ligjvënësi kosovar, në koordinim me partnerët e tjerë të përcaktojë parametra specifikë të mekanizmave kundër-bllokadë, që KPK të mund të marrë vendime edhe kur anëtarët prokurorë dhe joprokurorë nuk mund të arrijnë kompromis, e që në rastin konkret ky rekomandim i Venecias nuk është adresuar nga MD as në përbërjen prej 19 anëtarëve as kur KPK do të mbetet me 7 anëtar pas vitit 2026. [CDL-AD(2022) 006, Kosova, par 15].

Prishtinë, 14 korrik – Lëvizja FOL, me mbështetjen e Byrosë së Narkotikëve Ndërkombëtar dhe çështjeve të Zbatimit të Ligjit, Lëvizja FOL ka publikuar sot raportin “Realizimi i Planit të Punës së Këshillit Gjyqësor të Kosovës për vitin 2022”, i cili adreson çështjen e përmbushjes së objektivave dhe aktiviteteve në këtë plan të punës gjatë vitit 2022.
Viona Bunjaku, monitoruese në Lëvizjen FOL potencoi se të gjeturat e këtij raporti janë bazuar në të dhënat e pranuara nga zyrtarët përgjigjjes të Këshillit Gjyqësor të Kosovës dhe nga ueb faqja zyrtare e KGjK-së.
Ndër të tjera, Bunjaku theksoj se nga 138 aktivitete sa ishin paraparë të realizohen në Planin e Punës së Këshillit Gjyqësor të Kosovës për vitin 2022, KGjK kishte arritur të përmbush 86 prej tyre apo 62% dhe 52 apo 38% e aktiviteteve të tjera nuk kishin arritur të finalizoheshin brenda kohës së paraparë në këtë plan.

Gjithashtu, Bunjaku përmendi objektivat të cilat janë realizuar në tërësi gjatë kësaj periudhe. Sipas saj, këto objektiva janë: besimi dhe besueshmëria e publikut, e cila parashihte implementimin e 3 aktiviteteve prej të cilave 2 janë realizuar gjatë vitit 2022 dhe 1 ka arritur të realizohet tre muaj me vonesë, pra në muajin e tretë të vitit 2023; transparenca dhe llogaridhënia është objektiva tjetër që parashihte realizimin e 16 aktiviteteve e cila ka arritur të realizohet brenda periudhës kohore.

Tutje, sipas Bunjakut, objektivat të cilat nuk kanë arritur të realizohen në tërësi, janë: objektiva ‘Administrimi efektiv dhe efikas i drejtësisë’, që parashihte realizimin e 50 aktiviteteve, ku prej tyre janë realizuar 29 aktivitete apo 58% ndërsa të pa realizueshme për këtë periudhe kohore kanë mbetur 21 aktivitete apo 42%;
Objektiva ‘Qasja në Drejtësi’ si objektivë me rëndësi të veçantë rreth informimit publik për qytetarët parashihte realizimin e 10 aktiviteteve ku prej tyre 3 janë realizuar apo 30% të kësaj objektive dhe 7 apo 70% nuk janë realizuar brenda kohës së paraparë me planin e punës;

Objektiva ‘Luftimi i korrupsionit dhe krimit të organizuar’ përfshinte realizimin e 8 aktiviteteve, të cilat sipas përgjigjes së KGjK-së, nuk kanë arritur të realizohen në tërësi. Nga përgjigjja që kemi pranuar nga KGjK, kemi arritur të kuptojmë se vetëm aktivitetiti për Caktimin e Koordinatorit për Mbikëqyrjen e Zbatimit Planit Strategjik për Zgjidhjen Efikase të Lëndëve te Korrupsionit dhe Krimit te Organizuar te Strategjisë Kundër Korrupsionit dhe Krimit të Organizuar, është realizuar në kuadër të kësaj objektive;
Objektiva ‘Monitorimi i zbatimit të kornizës ligjore dhe rregullative’ përfshinte realizimin e 15 aktiviteteve prej të cilave 9 prej tyre janë realizuar apo 53 % ndërsa 8 apo 47 % te tjera nuk kanë arritur te realizohen brenda periudhës së paraparë me planin e punës.

Lavdim Makshana nga IKD, potencoi se të gjeturat e këtij raporti janë mjaftë produktive, dhe se mund të shohim se ka nivel të rritjes së përmbushjes së planit të punës nga ana e KGjK-së.
Vullnet Bugaqku nga KDI, gjithashtu diskutoi rreth të gjeturave të raportit ku sipas tij është e befasuese se si objektiva qasja në drejtësi nuk ka arritur të realizohet. Gjithashtu, sa i përket objektives në lidhje me luftimin e korrupsionit, sipas raportit shihet se nuk është bërë mjaftueshëm.

Prishtinë, 12 korrik 2023 – Lëvizja FOL ka mbajtur sot diskutimin “FOL Hapur” me përfaqësues të Odës Ekonomike të Kosovës.

Gjatë këtij takimi u diskutua në lidhje me sfidat e bizneseve të përfaqësuara nga Oda Ekonomike e Kosovës në lidhje me implementimin e dispozitave të Ligjit të Punës, si dhe të dispozitave të Ligjit për Mbrojtjen Sinjalizuesve.

Ky aktivitet është realizuar me mbështetjen financiare të Bashkimit Evropian në kuadër të Projektit “Mbrojtja dhe promovimi i të drejtave të punës për grupet e cënueshme në tregun e punës”. Përmbajtja e këtij aktiviteti është përgjegjësi e vetme e Lëvizjes FOL dhe nuk pasqyron domosdoshmërisht pikëpamjet e Bashkimit Evropian’, Advocacy Training and Resource Center – ATRC ose BIRN Kosova.

Prishtinë, 12 korrik 2023 – Organizatat Jo-Qeveritare Instituti i Kosovës për Drejtësi dhe Lëvizja FOL (Tutje: Koalicioni), si organizata të specializuara në fushën e sundimit të ligjit në Kosovë dhe me përvojë të gjatë në monitorimin e proceseve rekrutuese, janë pajtuar që së bashku të bëjnë monitorimin e procesit të përzgjedhjes dhe emërimit të rektorit të ri të Universiteti “Kadri Zeka” në Gjilan, me 6 korrik 2023.

Universiteti “Kadri Zeka” në Gjilan pas zhvillimit të procesit të intervistave me katër (4) kandidatë, me 6 korrik 2023, ka zgjedhur Artan Dermakun, rektor të këtij Universiteti. Në konkursin e shpallur me 7 qershor 2023, kishin aplikuar pesë (5) kandidatë. Aplikimet i kishin dorëzuar kandidatët, Dukagjin Leka (UKZ), Xhevat Sopi (UKZ), Artan Dermaku (UKZ), Fadil Osmani (UKZ) dhe Xhavit Islami (AAB). Pas shqyrtimit të kandidaturave nga Komisioni i Shqyrtimit të Aplikacioneve, Këshilli Drejtues (KD) i ka rekomanduar vetëm katër (4) kandidatë, kjo pasi është refuzuar kandidatura e Xhavit Islamit.

Gjetjet e Koalicionit konsistojnë në atë se edhe pse përbërja e Këshillit Drejtues është me shtatë (7) anëtar, procesi i intervistimit të kandidatëve kishte filluar me përbërje të gjashtë (6) anëtarëve të KD-së, pasi anëtari i KD-së Urtak Hamiti nuk kishte qenë i pranishëm që nga fillimi i procesit të intervistimit të kandidatëve. Tutje, edhe pse i njëjti nuk ka qenë pjesë e tërë procesit të intervistimit të kandidatëve për rektor, i njëjti ka marrë pjesë në procesin e votimit për rektor.

Sipas Koalicionit, është e qartë që sipas Statutit të UKZ-së dhe Rregullores së Punës nuk kërkohet poentimi i intervistave me pikë dhe se të gjitha Universitetet në përgjithësi e ndjekin këtë praktikë. Por, është e rëndësishme që karakteri i intervistës të rregullohet me Rregulloren e veçantë të zgjedhjes së rektorit. Në këtë drejtim IKD dhe Lëvizja FOL rekomandojnë që të plotësohet rregullativa ligjore ku do të eliminoheshin të gjitha këto mangësi.

Po ashtu, IKD dhe Lëvizja FOL konsiderojnë se procedurat e zgjedhjes dhe votimit për rektor si në UKZ por edhe në të gjitha universitet publike duhet të jenë të qarta dhe të mos lënë hapësira për keqinterpretim të dispozitave. KD-ja duhet të miratojë rregullore të veçanta për zgjedhjen e rektorit ku duhet të parashihen edhe detajet më të vogla në procedurën e zgjedhjes apo shkarkimit të rektorit të UKZ-së.

Gjithashtu, IKD dhe Lëvizja FOL, kërkojnë nga organet drejtuese që të ndërmarrin masa ndaj anëtarit të KD-së, Urtak Hamitit për shkak të qasjes së tij jo etike dhe joprofesionale ndaj monitoruesve dhe tentimit të tij për t’i penguar monitoruesit në monitorimin e procesit edhe të votimit të zgjedhjes së rektorit të UKZ-së.

Tutje, Koalicioni i OJQ-ve gjatë monitorimit të këtij procesi konsideron që kryesuesi i KD-së Ilir Gjinolli ka dështuar të ushtrojë funksionin e tij si kryesues i këtij Këshilli dhe të sigurojë mbarëvajtjen e mbledhjes së KD-së, ashtu siç kërkohet me Statutin e UKZ-së dhe Rregulloren e punës së KD-së.

IKD dhe FOL, kërkojnë nga Ministria e Arsimit, Shkencës dhe Teknologjisë (MASHT) që të ndërmarr masa ndaj kryesuesit të KD-së, Ilir Gjinolli, kjo për shkak të kërkesës së tij për ta larguar videon nga ueb-faqja e “Betimi për Drejtësi”. Sipas, Koalicionit kërkesa të tilla paraqesin ndërhyrje në punën e Organizatës dhe për më tepër, cenojnë rëndë parimin e transparencës, llogaridhënies dhe të drejtën e interesit publik që të jenë të informuar për procese të tilla të rëndësishme.