Ky raport politikash synon të tregojë nivelin e përgjithshëm të zbatimit të Ligjit për Qasje në Dokumente Publike në tetë komuna të ndryshme t&eu…

Testi i përgjegjshmërisë së komunave në Kosovë

Prishtinë, 8-9 dhjetor – Lëvizja FOL ka organizuar për të shtatën (7) herë me radhë Turneun e Debatit “Karl Popper” ‘Prishtina Open’, i cili është mbajtur me 8-9 dhjetor, në Gjimnazin “Xhevdet Doda”.
Në këtë turne pjesëmarrës ishin rreth 100 nxënës të shkollave të mesme nga shtatë(7)komuna të Kosovës: Prishtinë, Ferizaj, Pejë, Malishevë, Mitrovicë, Gjakovë, Podujevë.

Ky turne ishte më shumë përgatitor për turneun e kombëtar të radhës që do të mbahet në muajin shkurt, ku fituesit do ta përfaqësojnë Kosovën në garat ndërkombëtare të debatit, që këtë vit mbahen në Irlandë.

Gjatë ditës së shtunë me 08 dhjetor, për gjatë tre raundeve të debatit janë ballafaquar 21 skuadra nga shtatë komuna të Kosovës. Ndërkaq, çerekfinale, gjysmëfinalja dhe finalja e debatit janë mbajt të dielën. Në gjysmëfinale kanë arritur katër ekipe të cilat kanë grumbulluar më shumë pikë në bazë të vendimeve tw gjyqtarëve. Gjysmëfinalistë të këtij debati ishin NEMO dhe iHithat nga komuna e Prishtinës, ATA 3 nga komuna e Ferizajit dhe Babylon nga komuna e Mitrovicës. Ekipet NEMO dhe iHithat arritën të kualifikohen në finale ku fitues dolën skuadra NEMO.

Gjyqtarë të këtij turneu ishin ish-debaterë të cilët më parë kanë marrë pjesë në debate të formatit “Karl Popper”. Ekipi i gjyqtarëve të cilët e gjykuan finalen e këtij turneu, shpallën fitues të këtij turneu skuadrën Nemo nga Prishtina.
Katër rezolutat për të u cilat debatua në këtë turne ishin tema rreth të miturve, ku dy nga këto rezoluta ishin me kohë të limituar përgatitjeje ndërkaq për dy rezolutat tjera debaterët kanë pasur mundësi të përgatiten më herët.

Rezoluta e parë ishte: “Maturantët nuk duhet ti nënshtrohen testit të maturës”
Rezoluta e dytë ishte: “Lënda e Edukatës Seksuale duhet te aplikohet ne shkolla te mesme”
Rezoluta e tretë ishte: “Mësimdhënësve duhet tu hiqet e drejta për mbajtur grevë”
Rezoluta e katërt ishte: “Personat me aftësi të kufizuara duhet të kenë shkolla të veçanta”

Lëvizja FOL me mbështetjen e Fondacionit SOROS/KFOS që nga Korrik i vitit 2009 ka rikthyer klubet e para të debatit në Prishtinë, Ferizaj dhe Pejë. Pas një viti klubet e debatit janë zgjeruar edhe në tri komuna të reja, në Mitrovicë, Malishevë dhe Suharekë, duke vazhduar më pas edhe me komunat tjera si Gjakova, Podujeva, Prizreni.

Aktualisht në Kosovë kemi 9 klube të debatit në 9 komunat përkatëse, ku numri i debaterëve që vijnë nga shkollat e mesme të qytetit po rritet vazhdimisht. Ndërkaq, në klubin e debatit të qytetit të Ferizajt tashmë janë formuar edhe ekipe me debaterët të komunitetit RAE, e poashtu edhe një ekip vullnetar nga komuna e Vitisë.

Programi i debatit mbështet nga Fondacioni Kosovar për Shoqëri të Hapur.

Galeria e aktivitetit

Prishtinë, 05 Dhjetor 2012 – Lëvizja FOL ka përcjellë më shqetësim zhvillimet e javës që shkoi në lidhje më publikimin e disa video përgjimeve të disa politikanëve. Përpos fjalorit krejtësisht jo-politik dhe aspak institucional që kemi dëgjuar nga zyrtarët e përgjuar, duke fyer qytetarë të Republikës së Kosovës, denigruar media dhe kërcënuar institucionet më të larta të vendit, kemi parë një papërgjegjshmëri edhe në lidhje me zhvillimin e proceseve dhe të politikave nga këta zyrtarë. Komunikimi i tillë nga ana e zyrtarëve publikë vazhdon të ndikojë negativisht në besueshmërinë që do të duhej të kenë qytetarët në institucionet publike.

Duke qenë përball një skandali të pa-precedent në Kosovë, Qeveria e Kosovës miraton projekt-ligjin për përgjimet. Miratimi i këtij projekti-ligji në situatën e tanishme tregon qartazi që këto institucione dhe këta zyrtarë publikë nuk e kanë vullnetin që të mbrojnë qytetarët nga përgjimet e mundshme, por vetëm veten e tyre dhe në këtë mënyrë t’i mbulojnë skandalet e tyre.

Si rikujtim të kësaj, Lëvizja FOL ka kërkuar qysh në Prill të vitit 2009 hartimin e një projekt-ligji të tillë, për faktin se në atë kohë ishin aktuale përgjimet që ishin bërë ndaj qytetarëve të Kosovës dhe ishte një atmosferë e frikës dhe e pasigurisë në lidhje me atë që institucionet ofronin në atë kohë. Edhe përkundër takimeve dhe shpjegimeve që i patëm bërë, Qeveria e Kosovës, duke mos e pasur si problem të vetin brenda, pra, duke mos u përgjuar zyrtarët publikë, e pati injoruar kërkesën tonë. E tash kur këta zyrtarë kanë qenë objekt i përgjimeve, shohim ngutin e Qeverisë për këtë projektligj. Kjo tregon që si 3 vjet më parë dhe tash Qeveria e Kosovës shpërfaq mungesë të seriozitetit në raport me qytetarët dhe institucionet.

Prandaj, duke qenë në një situatë të ndjeshme për sigurinë e qytetarëve të Kosovës, FOL kërkon që projektligji për përgjimet t’i nënshtrohet një debati të gjerë publik para se ai të shkojë në Kuvendin e Kosovës. Gjithashtu, Lëvizja FOL kërkon llogari dhe përgjegjësi nga zyrtarët e përfshirë në këto skandale, pasi që përgjimet në fjalë kanë dëmtuar shumë seriozisht besueshmërinë e institucioneve publike dhe integritetin e shtetit të Kosovës.

Ky raport i rregullt tremujor dëshmon pasivitetin e institucioneve publike në luftimin dhe parandalimin e korrupsionit. Të gjeturat e këtij raporti tregojnë se institucionet p…

Monitoruesi i Korrupsionit (Korrik-Gusht-Shtator)

Prishtinë, 11 nëntor 2012 – Lëvizja FOL ka publikuar sot, Raportin e saj ‘Monitoruesi i Korrupsionit’, në të cilin përfshihen të gjitha aktivitetet e ndërmarra institucionale në luftë kundër korrupsionit për periudhën tre mujore korrik-shtator 2012. Në bazë të këtij raporti dëshmohet se institucionet publike në luftimin dhe parandalimin e korrupsionit kanë qenë shumë pasive.

Përgjatë periudhës raportuese gjykatat e rregullta komunale të Kosovës kanë zgjidhur gjithsej 30 lëndë: 15 në kuadër të Shpërdorimit të Pozitës Zyrtare, 4 në kategorinë Marrje e Ryshfetit dhe 11 në Dhënie të Ryshfetit. Në fund të periudhës raportuese kanë mbetur të pazgjidhura 183 lëndë: 118 në kategorinë Shpërdorim i Pozitës Zyrtare, 45 në kategorinë Marrje e Ryshfetit dhe 20 në Dhënie të Ryshfetit. Gjatë këtij harku kohor gjykatat kanë trashëguar gjithsej 173 lëndë: 126 nga kategoria Shpërdorim i Pozitës Zyrtare, 26 nga kategoria Marrja e Ryshfetit dhe 21 nga kategoria Dhënia e Ryshfetit. Gjatë kësaj kohe gjykatat kanë pranuar në punë gjithsej 40 lëndë: 7 në kategorinë Shpërdorim i Pozitës Zyrtare, 23 në kategorinë Marrje e Ryshfetit dhe 10 në kategorinë Dhënie e Ryshfetit. Ndërkaq si lëndë në punë që janë në proces të shqyrtimit janë gjithsej 213: 133 në kategorinë Shpërdorim i Pozitës Zyrtare, 49 në Marrje të Ryshfetit dhe 31 në kategorinë Dhënie e Ryshfetit.

Sipas statistikave të Drejtorisë për Hetimin e Krimeve Ekonomike dhe Korrupsion (DHKEK),
rezulton se për kategorinë Shpërdorim të Pozitës Zyrtare ose autorizimit, 23 raste janë nën hetime, 25 raste janë dërguar në Prokurori me kryerës të njohur, 5 raste janë dërguar me raport në Prokurori, 11 janë arrestuar dhe ndaj 58 të dyshuarve është ushtruar kallëzim penal. Për kategorinë Marrje të Ryshfetit, 2 raste janë nën hetime, 6 raste janë dërguar në Prokurori me kryerës të njohur dhe kundër 1 të dyshuari është ngritur kallëzim penal. Në kuadër të kategorisë Dhënie Ryshfeti, 4 raste janë dërguar në prokurori me kryerës të njohur, po për këtë vepër penale janë arrestuar 5 persona dhe kundër 4 të dyshuarve tjerë është ushtruar kallëzim penal. Gjatë këtij tremujori Policia e Kosovës, ka konfiskuar 19,700.00 Euro, 980,300.00 dollarë si dhe çeka në vlerë 2,300,000.00 euro.

Agjencia Kundër Korrupsionit (AKK) gjatë këtij tre mujori ka qenë e fokusuar në nxjerrjen e dy raporteve analitike:a) “Analizë mbi ndjekjen dhe gjykimin e rasteve korruptive në Kosovë”; dhe b) “Raportin për rastet e iniciuara për mos deklarim të pasurisë dhe sanksioneve”.
Qeveria e Kosovës përgjatë këtij intervali kohor ka nxjerrë gjithsej 97 vendime. Nga këto vendime vetëm 2 kanë qenë të ndërlidhura direkt apo indirekt me luftimin e korrupsionit në vend: a) Përfshirja e Strategjisë dhe Planit të Veprimit Kundër Korrupsion 2012-2016 në Planin e Dokumenteve Strategjike 2012; si dhe b) Aprovimi i projektligjit për kompetencat e zgjeruara për konfiskimin e pasurisë së përfituar me vepër penale.

Kuvendi i Kosovës nuk është treguar aspak produktiv në parandalimin dhe luftimin e korrupsionit. Nga 8 seanca plenare sa ka mbajtur gjithsej, në asnjërin prej tyre nuk është diskutuar për shkallën e korrupsionit në institucionet publike, duke u shënuar si institucioni më pasiv në luftë kundër korrupsionit.

Raportin e plotë mund ta gjeni në këtë link: http://levizjafol.org/images/uploads/files/Monitoruesi_i_korrupsionit_%28Korrik_Gusht_Shtator%29.pdf

Lëvizja FOL ka mbajtur sot konferencën për shtyp, në të cilën është publikuar analiza “Ndikimi i Vendimeve të Qeverisë në Luftë Kundër Korrupsionit 2010-2011”.
Hulumtuesi në Lëvizjen FOL, Armend Mazreku, deklaroi se ky hulumtim politikash nxjerrë në pah ndikimin e vendimeve kryesore të qeverisë në luftë kundër korrupsionit që janë miratuar përgjatë viteve 2010 dhe 2011.

“Prej vitit 2008 e deri më tash, prioriteti kryesor i qeverisë Thaçi është thënë të jetë luftimi dhe parandalimi i korrupsionit. Mirëpo, arsyeja që është përsëritur e ripërsëritur kaq shumë është pikërisht se luftimi i korrupsionit s’ka qenë asnjëherë prioritet i kësaj qeverie. Nëse luftimi i korrupsionit do të ishte njëmend prioritet i kësaj qeverie, atëherë niveli i korrupsionit në institucionet publike do të bëhej i pavërejtshëm dhe Kosova nuk do të renditej më si vendi më I korruptuar në Evropë”, tha ai.

Ky hulumtim politikash dëshmon mungesën e seriozitetit të Qeverisë që të nxjerrë vendime të qëndrueshme në fushën e parandalimit dhe luftimit të korrupsionit. Të gjashtë vendimet e analizuara, dy të nxjerra për konsolidimin e kornizës institucionale dhe katër sosh për kompletimin e kornizës ligjore anti-korrupsion, tregojnë mungesën e përgjithshme të ndikimit që do të duhej ato të kishin në uljen e shkallës së korrupsionit në institucionet publike.

Ndër dobësitë kryesore që kanë shoqëruar vendimet e tilla janë:

I. Vendimi pwr Themelimin e Task-Forcws Anti-Korrupsion:

a. mungesa e analizave dhe studimeve paraprake që do të arsyetonin themelimin e
një mekanizmi të tillë në luftë kundër korrupsionit; b. emërtimet e llojllojshme dhe paqartësitë e tjera mbi karakterin e këtij mekanizmi; c. përbërja e përzier e prokurorëve vendorë dhe atyre ndërkombëtarë (moskoordinimi dhe mos-lejimi i prokurorëve vendorë në zgjidhjen e lëndëve që kanë të bëjnë më nivelin e lartë të zyrtarëve publikë); d. korniza e pa definuar e fushëveprimit ligjor dhe funksionimi përbrenda PSRK-së; e. profil i ulët i zyrtarëve të akuzuar për vepra korruptive; si dhe
f. mungesa e transparencës dhe mos-bërja publike e punës së tyre në luftë kundër
korrupsionit.

II. Kompletimi i Stafit tw Agjencisw pwr Administrimin e Pasurisw sw Sekuestruar apo Konfiskuar:

a. mungesa e specializimit në administrimin e pasurive që burojnë kryesisht nga
korrupsioni, krimi i organizuar dhe shpëlarja e parasë;
b. mungesa e ekzekutimit të vendimeve për konfiskim apo sekuestrim të pasurisë; dhe
c. mungesa e komunikimit dhe koordinimit ndërmjet Agjencisë dhe prokurorive,
gjykatave dhe institucioneve tjera relevante.

III. Ndryshimin e Ligjit për Deklarimin, Prejardhjen dhe Kontrollin e Pasurisë dhe Dhuratave të Zyrtarëve të Lartë Publikë

a. mungesa e sanksioneve të ashpra sa i përket mos-deklarimit të pasurisë;
b. mungesa e verifikimit të saktësisë së deklaratave; dhe
c. pamundësia për ta kontrolluar prejardhjen apo origjinën e pasurisë që mund të
jetë fituar me veprime të kundërligjshme.

IV. Miratimi i Ligjit për Mbrojtjen e Informatorëve:

a. mangësia fillestare e këtij ligji ka të bëjë me vetë emërtimin e tij. Në vend që të
quhej Ligji për Mbrojtjen e Zyrtarëve që Raportojnë Korrupsionin, ligji është
emërtuar �Ligji për Mbrojtjen e Informatorëve’. Një emërtim i tillë ndërlidhet me
persona që operojnë në kuadër të shërbimeve inteligjente/sekrete;

b. së dyti, ligji në fjalë nuk përcakton ndonjë institucion apo komision të posaçëm në
të cilin do të mund të raportoheshin praktikat e dyshimta abuzive nga ana e
zyrtarëve institucionalë; dhe

c. së treti, por që është më e rëndësishmja, ligji nuk e qartëson mbrojtjen e
identitetit të informatorit dhe as nuk e penalizon situatën kur një institucion apo
zyrtar përkatës e zbulon anonimitetin e informatorit që denoncon një veprim
abuziv.

V. Ndryshimi i Ligjit për Financimin e Subjekteve Politike:

a. Ashpërsimi i dispozitave ndëshkimore. Derisa në ligjin e mëparshëm shuma sanksionuese ka qenë prej 3,000.00 – 10,000.00 �, në ligjin e tanishëm është përcaktuar prej 5,000.00 – 50,000.00 �; dhe
b. Një dispozitë tjetër e rëndësishme sanksionuese është edhe ajo për mos-raportim të financave brenda afatit të përcaktuar me ligj. Nëse një subjekt politik nuk e paraqet raportin vjetor financiar (…) humb të drejtën për të përfituar nga fondi në vitin e ardhshëm” (neni 21, paragrafi 2).

VI. Ndryshimi i Ligjit për Parandalimin e Konfliktit të Interesit:

� zvogëlimi i përqindjes së aksioneve (nga 20 % në 5 %) që një zyrtar publik mund
të posedojë; dhe
� ashpërsimi i sanksioneve në rastet kur zyrtarët publikë gjenden në konflikt
interesi (shkarkimi nga funksioni publik dhe/ose gjoba prej 500.00 � deri në 2500.00 �).

Ky hulumtim politikash nxjerrë në pah ndikimin e vendimeve kryesore të qeverisë në luftë kundër korrupsionit që janë miratuar përgjatë viteve 20…

Hulumtim Politikash: Ndikimi i Vendimeve te Qeverise ne Lufte Kunder Korrupsionit 2010-2011

Deklarata 1: “Kosova, nga ana tjetër ka implementuar në tërësi dokumentin e presidentit Ahtisaari”
Autori: Hashim Thaçi, kryeministër i Kosovës, Qeveria e Kosovës
Data: 10 shtator 2012
Burimi: http://www.kryeministri-ks.net/”page=1,9,3066
Vlerësimi: E PAVËRTETË
Arsyetimi: Këtë deklaratë kryeministri Thaçi e ka thënë në një konferencë të përbashkët me Përfaqësuesin Civil Ndërkombëtarë në Kosovë Pieter Feith, pak minuta pasi Grupi Ndërkombëtar Drejtues i pati dhënë fund Pavarësisë së Mbikëqyrjes së Kosovës.
Është e ditur botërisht që Pakoja e Ahtisarit nuk është implementuar në tërësinë e saj. Nuk është themeluar komuna e Mitrovicës, ndërkaq, komunat tjera që janë themeluar mbi bazën e Pakos së Ahtisarit ka po ashtu edhe komunat paralele, dhe çfarë është me e rëndësishme Institucionet e Kosovës nuk kanë arritur tash e 5 vite që të ushtrojnë autoritetet në Veri të vendit, pjesë në të cilën udhëheqin strukturat e paligjshme dhe kriminale të Serbisë.

Deklarata 2: Kosova është e gatshme për dialog politik
Autori: Hajredin Kuçi, Zëvendëskryeministër i Kosovës
Data: 27 shtator 2012
Burimi: http://rtv21.tv/home/”p=75972
Vlerësimi: KONTRADIKTORE
Arsyetimi: Më shumë se një vit më parë zëvendëskryeministri Kuçi kishte përjashtuar cdo lloj mundësie dhe ideje për bisedime politike ndërmjet Prishtinës dhe Beogradit (shihketu). Ndërkaq, në më pak se tre jave vetë Kuçi ka deklaruar pikërisht të kundërtën duke shprehur gatishmërinë e Qeverisë së Kosovës për dialog politik me Serbinë. Mirëpo, ajo çfarë mbetet krejtësisht e paqartë është se çfarë nënkupton “dialogu politik’ më Serbinë”! Nuk ka asnjë informacion se për çfarë do të bisedohet, cila është agjenda, sa do të zgjatin këto bisedime dhe shumë çështje të tjera, e të cilat as z Kuçi dhe askush nga Qeveria e Kosovës nuk i ka shpjegua.

Deklarata 3: “Me Beogradin duhet të diskutohet në nivele politike”
Autori: Bajram Rexhepi, Ministër i Punëve të Brendshme
Data: 30 shtator 2012
Burimi: http://www.gazetaexpress.com/index.php”cid=1,13,93055
Vlerësimi: KONTRADIKTORE
Arsyetimi: Këtë deklaratë ministri Rexhepi e ka dhënë në më pak së një muaj duke harruar se është po ky ministër, I cili në fillim të vitit 2011 e kishte përjashtuar çdo lloj mundësie që çështja e veriut të vendit të dialogohet me Serbinë. Për më tepër ai kishte pohuar se “çështja e veriut të vendit është çështje e brendshme e Kosovës dhe mund të trajtohet vetëm me ndërkombëtarët, por jo me palën serbe” ( shih këtu). Sigurisht që Veriu është dhe mbetet çështje e brendshme e institucioneve të Kosovës, por ajo çfarë kemi parë ne është se këto institucione dhe vet z Rexhepi ka bërë shumë pak, për të mos thënë asgjë që vendos rend dhe ligj në atë pjesë të Kosovës.

Deklarata 4: “Kjo legjislaturë ka dalë nga zgjedhjet e vjedhura, institucionet pastaj kanë dalë prej atyre zgjedhjeve”
Autori: Jakup Krasniqi, Kryetar i Kuvendit të Kosovës
Data: 3 tetor 2012
Burimi: http://www.zeri.info/artikulli/1/1/58695/krasniqi-kjo-legjislature-ka-dale-nga-zgjedhjet-e-vjedhura/
Vlerësimi: E VËRTETË
Arsyetimi: Një gjë të tillë e ka thënë Rrjeti Evropian për Monitorimin e Zgjedhjeve (ENEMO), i cili në raportin e tij për zgjedhjet parlamentare të mbajtura në dhjetor të vitit 2010, ka konstatuar parregullsi të shumta, vjedhje votash dhe kërcënime gjatë procesit të votimit, e të cilat sipas këtij raport kanë dëmtuar procesin zgjedhor (shih këtu). Padyshim një proces i shtrembuar zgjedhor do të prodhonte institucione me legjitimitet të munguar, jo-kompetente dhe jo-përfaqësuese. Për këto dy vite kemi parë që këtyre institucioneve ju mungojnë të gjitha këto.

Deklarata 5: “AAK-ja dëshiron të jetë pjesë e bisedimeve politike me Serbinë dhe AAK-ja i thotë PO një koalicioni me PDK-në”.
Autori: Blerim Shala, Nënkryetar i parë i AAK-së
Data: 26 Shtator 2012
Burimi: http://www.koha.net/”page=1,13,116759
Vlerësimi: KONTRADIKTORE
Arsyetimi: Kjo deklaratë e nënkryetarit të parë të nënkryetarit të AAK-së është në kundërshtim me qëndrimin e kamotshëm të përfaqësuesve të kësaj partie se në asnjë rrethanë nuk do të bëjnë koalicion me PDK-në. Për më tepër është vetë vëllai i kryetarit të partisë së AAK-së, Daut Haradinaj, i cili në një deklarim të tij publikë ka pohuar se “ne me PDK-në nuk hyjmë në koalicion asnjëherë” (shih këtu).

Lëvizja Fol ka mbajtur sot konferencën për shtyp, në të cilën ka publikuar raportin Monitoruesi i Prokurimit për periudhën korrik-shtator 2012.

Hulumtuesi në Lëvizjen FOL, Armend Mazreku, deklaroi se raporti “Monitoruesi i Prokurimit” përfshinë parregullsitë dhe shkeljet ligjore të bëra nga ana e Ministrive, Komunave dhe Ndërmarrjeve Publike (PTK&KEK) në fushën e prokurimit publik. “Të dhënat e këtij raporti tregojnë për vazhdimësinë e shkeljeve dhe parregullsive ligjore të bëra nga ana e institucioneve dhe ndërmarrjeve publike në aktivitetet e prokurimit edhe gjatë këtij 3 mujori”, tha Mazreku.

Ndërkaq, Kenan Tora, koordinator në Lëvizjen FOL tha se në tre mujorin për të cilin raportohet në këtë raport, kampion i shkeljeve ligjore të bëra ka dal PTK-ja, duke bërë shkelje ligjore në gjithsej 4 tenderë.

Në këtë periudhë kohore institucionet e lartë-përmendura kanë bërë shkelje ligjore në gjithsej 18 tenderë të ndryshëm. “Nga këta 18 tenderë, OSHP në 11 prej tyre ka urdhëruar që të kthehen në ri-vlerësim, 5 janë kthyer në ri-tenderim dhe në një aktivitet prokurimi pasi që janë evidentuar shkeljet është anuluar me kërkesën e autoritetit kontraktues dhe për 1 tjetër është urdhëruar dënimi i autoritetit kontraktues me gjobë”, tha Tora.

Sipas tij, ministritë kanë bërë shkelje të dispozitave ligjore të prokurimit publik në gjithsej 4 tenderë të ndryshëm ku Ministria e Forcës së Sigurisë së Kosovës ka bërë shkelje ligjore në 2 aktivitete të ndryshme prokurimi, ndërsa Ministria e Kulturës, Rinisë dhe Sportit dhe Ministria e Punëve të Jashtme me nga një 1 aktivitet prokurimi.

“Ndërmarrjet publike (KEK dhe PTK) gjatë kësaj periudhe nuk i kanë zbatuar procedurat e prokurimit konform ligjit në 7 tenderë të ndryshëm. PTK ka bërë shkelje ligjore në 4 aktivitete të ndryshme të prokurimit kurse KEK në 3 të tilla”, tha ai.

Tora deklaroj se komunat që kanë bërë shkelje ligjore në 7 tenderë të ndryshëm. Komunat e Kamenicës, Ferizajt, Gjakovës, Lipjanit, Suharekës kanë bërë shkelje ligjore në nga 1 tenderë kurse Komuna e Pejës ka bërë shkelje ligjore në 2 tenderë të ndryshëm.

Ky aktivitet është financuar nga projekti Promovimi i Shoqërisë Demokratike (DSP) – i financuar nga Zyra Zvicerane për Bashkëpunim në Kosovë (SCO?K) dhe menaxhuar nga Fondacioni Kosovar për Shoqëri Civile (KCSF) si dhe projekti i mbështetur nga Civil Rights Defenders (CRD).

Galeria e aktivitetit

Lëvizja FOL ka publikuar analizën “Shpërdorimet në Prokurimin Publik” në të cilën analizohen shpërdorimet me autoritetin publik në fushën e …

Shpërdorimet në Prokurimin Publik

Lëvizja FOL ka publikuar analizën “Shpërdorimet në Prokurimin Publik” në të cilën analizohen shpërdorimet me autoritetin publik në fushën e prokurimit publik. Kjo analizë, gjithashtu përfshinë edhe funksionalitetin apo jofunksionalitetin e institucioneve të formuara me qëllim të luftimit të këtyre shpërdorimeve. Në fund jepen rekomandime për përmirësimin e gjendjes.

Sipas kësaj analize shpërdorimet të cilat hasen gjatë procedurave të prokurimit janë nga më të ndryshmet, si p.sh:

– Hartimi i dosjeve të tenderëve në kundërshtim me ligjin dhe rregulloren për prokurim publik
– caktimi i kundërligjshëm i kritereve të përzgjedhjes me qëllim favorizimi të operatorëve ekonomik të caktuar për përfitime personale të zyrtarëve të prokurimit
– vazhdimi i procedurave të prokurimit edhe pse nuk janë përmbushur kërkesat e Ligjit për Prokurim Publik, shumë herë ndodh që vazhdohet me procedurat edhe pse numri i ofertuesve minimal i kërkuar me ligj nuk plotësohet ose kompanitë fitojnë tenderët pa pasur dokumentacionin e kompletuar
– paraqitja e dokumentacionit të falsifikuar
– anëtarët e komisionit mbikëqyrës propozojnë kryerjen e pagesave të kundërligjshme edhe në rastet kur punët nuk kanë përfunduar sipas planit të paraparë, apo shërbimet dhe furnizimet nuk janë ofruar sipas kontratës
– planet dinamike nuk janë respektuar nga operatorët ekonomik, nuk kërkohet arsyetim nga OE për vonesën në kryerjen e punëve.

Por mbi të gjitha ashtu sic edhe theksohet në hyrje të analizës emërues i përbashkët i të gjitha shpërdorimeve është Korrupsioni.
Shqetësim të madh përbën varësia e zyrtarëve të prokurimit të institucioneve publike nga partitë politike. Ata emërohen, veprojnë dhe realisht edhe mbikëqyren nga partitë politike. Kjo e bënë korrupsionin tërësisht të lidhur me partitë politike, ndaj si konsekuencë e saj luftimi i korrupsionit mbetet plotësisht në vullnetin politik të tyre.
Të gjitha rekomandimet e nxjerra në këtë analizë me qëllim të përmirësimit të gjendjes janë të varura nga vullneti politik. FOL-i, rekomandon reforma organizative në organet administrative qendrore, në fushën e prokurimit publik.

Organi Shqyrtues i Prokurimit Publik, duhet të fuqizohet më tutje me kapacitetet e nevojshme profesionale dhe teknike si dhe me përgjegjësi të reja ligjore. Është i nevojshëm rishikimi i Ligjit mbi Agjencinë kundër Korrupsionit (AKK) dhe Kodit të Procedurës Penale, me qëllim të fuqizimit të mëtejmë të kompetencave të Agjencisë kundër Korrupsionit. AKK duhet të jetë në gjendje të kryejë hetime penale nën mbikëqyrjen e prokurorit publik konform Kodit të Procedurës Penale.
Për shkak të një strukture konfuze të funksionimit të institucioneve anti-korrupsion ekziston rreziku i madh i krijimit të disa adresave institucionale për këtë çështje. Kjo shkakton konfuzion edhe tek qytetarët, të cilët mund të mos e kenë të qartë se cila është adresa e duhur për luftimin e këtij fenomeni. Në këtë kontekst, një veprim i tillë shkakton ikjen nga përgjegjësia institucionale.

Raportin e plotë e gjeni në këtë link:

http://levizjafol.org/images/uploads/files/ANALIZ%C3%8B_P%C3%8BR_SHP%C3%8BRDORIMIN_ME_AUTORITETIN_PUBLIK_N%C3%8B_FUSH%C3%8BN_E_PROKURIMIT_PUBLIK.pdf

Prishtinë, 28 shtator 2012– 28 Shtatori shënon ditën ndërkombëtare (joformale) të së drejtës për të ditur apo qasjes në informacion zyrtar. E drejta ndërkombëtare për të ditur ka filluar së shënuari që nga data 28 shtator 2002. Në këtë ditë organizatat anekënd botës punojnë së bashku për të promovuar të drejtën e qasjes në informacion zyrtar duke fuqizuar transparencën dhe llogaridhënien.

Mexhide Demolli- Nimani, koordinatore e Zyrës për Media deklaroj se Lëvizja FOL tradicionalisht e ka shënuar këtë datë në forma të ndryshme. “Këtë vit FOL për të analizuar nivelin e zbatimit të ligjit për qasje në dokumente publike, gjatë muajit shtator ka filluar fushatën “Testi i Përgjegjshmërisë”. Gjatë kësaj fushate FOL ka komunikuar drejtpërdrejt me qytetarë në 8 komuna të Kosovës, duke iu ofruar një lehtësim qytetarëve të interesuar për të bërë kërkesa për qasje në dokumente publike” tha Demolli-Nimani.

Sipas saj, pjesë e kësaj fushate ka qenë edhe një anketë e pa-standardizuar, qëllimi i të cilës ka qenë mbledhja e informacioneve mbi përvojën e qytetarëve në lidhje me shfrytëzimin e shërbimeve publike, përkatësisht qasjen në dokumente publike në institucionet e nivelit qendror dhe lokal.
Ndërkaq Jetmira Bajrami koordinatore nw Lëvizjen FOL tha se anketa e pa-standardizuar, ka përfshirë 274 qytetarë. “Edhe pse shumica e të anketuarve (53.6 %) janë përgjigjur se dinë për ekzistimin e Ligjit për Qasje në Dokumente Publike, niveli i njohurisë për përmbajtjen e ligjit është jashtëzakonisht i mangët”, tha Bajrami.

Sipas të gjeturave të anketës rezulton se niveli i interesimit të qytetarëve për të bërë kërkesa për qasje në dokumente publike është shumë i ulët. “Vetëm 22.2% e tyre kanë deklaruar se kanë bërë kërkesa të tilla drejtuar institucioneve, kundrejt 77.3% e tyre që nuk kanë bërë asnjëherë kërkesa të tilla. Shumica e këtyre kërkesave janë bërë në nivelin komunal: 98.3% e qytetarëve kanë deklaruar se kanë bërë kërkesa në komunat e tyre dhe vetëm 1.6% prej tyre kanë bërë kërkesë në nivelin qendror. Rreth 60.6% prej këtyre kërkesave që janë bërë nga ana e qytetarëve të Kosovës nuk kanë marrë përgjigje nga ana e institucioneve, kundrejt 39.3% të rasteve të cilat kanë marrë një përgjigje të tillë. Në këto përgjigje, 58.3% të rasteve kanë qenë përgjigje pozitive, 8.3% kanë qenë përgjigje negative dhe në 33.3% të rasteve institucionet kanë lejuar qasje të pjesshme.

Ndërkaq në pyetjen se nga informohen për aktivitetet komunale dhe ato qendrore rezulton se 49.1% e qytetarëve e përdorin si burim kryesor televizionet lokale/kombëtare. Pastaj vijnë gazetat ditore me rreth 31.4% si dhe me 19.5%, uebfaqet e institucioneve”, deklaroj Bajrami.
Përveç realizimit të anketës, Mexhide Demolli-Nimani tha se gjatë kësaj fushatë janë bërë gjithsej 123 kërkesa për qasje në informacion publik në përputhje me Ligjin për Qasje në Dokumente Publike. “Numri i kërkesave të dorëzuara në komunat të Kosovës është: Mitrovicë-19, Prizren-15, Gjakovë-14, Podujevë-15, Ferizaj-15, Gjilan-15, Kamenicë-15, Pejë-14, Ministria e Arsimit, Shkencës dhe Teknologjisë – 1”,tha ajo.

Lëvizja FOL në përputhje me afatin ligjor është duke pritur përgjigjet në kërkesa nga institucionet respektive për të nxjerrë pastaj një vlerësim rreth nivelit të zbatueshmërisë së ligjit.

Duke marrë parasysh nivelin jashtëzakonisht të ulët të komunikimit të institucioneve më qytetarët, pra të zbatimit të dispozitave ligjore në lidhje më informimin publik, FOL apelon te institucioni i Avokatit të Popullit që në përputhje me nenin 17 të ligjit për qasje në dokumente publike të rris aktivitetet që kanë për qëllim zbatimin e së drejtës për qasje në dokumente publike.

Galeria e aktivitetit

28 Shtatori shënon ditën ndërkombëtare (joformale) të së drejtës për të ditur apo qasjes në informacion zyrtar. E drejta ndërkombëtare p&eum…

Kosova me nivel të dobët të zbatimit të ligjit për qasje në dokumente publike

Prishtinë, 14 shtator 2012. Lëvizja FOL, sot ka zhvilluar takim me Kryesuesin e Këshillit Gjyqësor të Kosovës, z. Enver Peci. Në këtë takim u diskutua për gjendjen e sistemit gjyqësor në vendin tonë. Të dyja palët ranë dakord që bashkëpunimi në mes shoqërisë civile dhe Këshillit Gjyqësor të Kosovës është i domosdoshëm. Në funksion të kësaj u nënshkrua Memorandum i Bashkëpunimi në mes Lëvizja FOL dhe KGJK-së, i cili i mundëson qasje në monitorimin e seancave gjyqësore kundër korrupsionit.

Në kuadër të këtij memorandumi, Lëvizja FOL do t’i monitoroj të gjitha seancat gjyqësore në të gjitha fazat e procedurës penale, që kanë të bëjnë me korrupsionin, shpërdorimin e detyrës zyrtare, marrjen e ryshfetit, dhënie të ryshfetit, dhe të gjitha format tjera të kundërligjshme nga fusha e prokurimit publike, dhe transparencës në shpenzimin e parasë publike.

Lëvizja FOL përmes këtij memorandumi merr zotimin se të dhënat e nxjerra nga monitorimi i këtyre seancave do të procedohen në bazë të ligjeve të Kosovës dhe pas përfundimit të seancave gjyqësore do të përgatisë dhe publikoj raporte si dhe do të ofrojë rekomandime për përmirësimin e mangësive dhe problemeve të vërejtura gjatë monitorimit.

Ky memorandum shpreh vullnetin e mirë të dy palëve nënshkruese për përmirësimin e transparencës dhe llogaridhënies së institucioneve të sistemit gjyqësor në Kosovë dhe rritjen e efikasitetit të tyre në luftën kundër korrupsion

Galeria e aktivitetit

Prishtinë, 11 shtator 2012. Lëvizja FOL që nga themelimi i saj, pjesë e angazhimeve të saj ka pasur promovimin e Transparencës dhe Llogaridhënies së institucioneve publike. Edhe në këtë vit Lëvizja FOL do të organizoj aktivitete të ndryshme që kanë të bëjnë me transparencën si një element kyç në zhvillimin e demokracisë në Kosovë.

Në këtë kuadër Lëvizja FOL ka filluar të hënën fushatën “Testi i Përgjegjshmërisë” e cila do të zgjasë nga 10 deri me 28 shtator. Gjatë kësaj fushate FOL do të jetë në nëntë komuna të Kosovës, ku do të t’iu mundësoj qytetarëve që të bëjnë kërkesa për Qasje në Dokumente Publike në nivel komunal dhe atë qendror.

Të hënën, me 10 shtator, stafi i Lëvizjes FOL ka qëndruar në Mitrovicë ku edhe janë plotësuar dhjetëra kërkesa dhe pyetësor rreth qasjes në dokumente publike. Kërkesat që kanë qenë për komunën e Mitrovicës më pas janë dërguar në komunë, dhe priten përgjigjet brenda afatit të paraparë me ligj, ndërkaq kërkesat për institucionet qendrore të bëra nga qytetarët e Mitrovicës do të dërgohen pasi të grumbullohen edhe nga komunat tjera.
Të dhënat e dala nga pyetësorët e plotësuar do të publikohen në një raport i cili do të dal pas përfundimit të kësaj fushate.

Gjatë kësaj periudhe tri javore FOL do të jetë në këto komuna me këto datë:
1. Mitrovicë, 10 shtator 2012
2. Prizren, 12 shtator 2012
3. Gjakovë, 14 shtator 2012
4. Pejë, 17 shtator 2012
5. Ferizaj, 19 shtator 2012
6. Gjilan, 21 shtator 2012
7. Kamenicë, 24 shtator 2012
8. Podujevë, 26 shtator 2012
9. Prishtinë, 28 shtator 2012

Galeria e aktivitetit

Prishtinë, 10 shtator 2012– Lëvizja FOL uron qytetarët dhe institucionet e Republikës së Kosovës për punën që kanë bërë në kuadër të përmbushjes së obligimeve për përmbylljen e mbikëqyrjes së pavarësisë. Sot është një ditë e rëndësishme për procesin e ndërtimit dhe konsolidimit të shtetit të Kosovës. Nga kjo fazë e mbikëqyrjes nëpër të cilën ka kaluar Kosova, shumica e qytetarëve kanë mbetur të zhgënjyer për mungesë të rezultateve sidomos në: shtrirjen e autoritetit në veri, zhvillimin ekonomik, si dhe pavarësimin dhe fuqizimin e sistemit të drejtësisë.

Megjithatë, është e rëndësishme që Kosova po bën një hap kyç drejt fuqizimit të legjitimitetit ndërkombëtar dhe parandalimit të bosnjëzimit të vendit. Përfundimi i mbikëqyrjes së pavarësisë duhet të rrisë llogaridhënien ndaj qytetarëve të Kosovës dhe në asnjë mënyrë hapësira e krijuar të zhvendoset në adresa të tjera. Pas datës 10 shtator 2012, institucionet e vendit nuk mund më të fshihen pas ndërkombëtarëve për dështime në politikën e brendshme dhe kjo paraqet një mundësi të veçan për të dëshmuar pjekurin shtetërore të Kosovës. Po ashtu, kjo nënkupton angazhim shtesë nga Shoqëria Civile për të rritur pjesëmarrjen dhe mbikëqyrjen civile ndaj sjelljes dhe punës së institucioneve të shtetit.

Korrupsioni dhe kriminaliteti po dëmton besimin e qytetarëve në shtetin e Kosovës dhe kjo përbën shqetësim jetik për konsolidimin e shtetit të Kosovës. Prandaj, është detyrë e domosdoshme e institucioneve tona, që pas një procesi të tillë të mbikëqyrjes, të merren me sfidat reale të shtet-ndërtimit, të kthimit të besimit në shtetin e ri, për rendin dhe ligjin, për ekonomi të favorshme për qytetaret e Kosovës, në mënyrë që të gjitha këto të jenë në funksion të realizimit të parimeve të lirisë dhe demokracisë.

Lëvizja FOL prezanton Matësin e deklaratave të udhëheqësve shtetërorë të Kosovës. Ju lutem, gjeni në vijim pesë(5) deklaratat:

Deklarata 1: Gjatë mandatit 2011-2014, Qeveria e Kosovës synon të realizojë rritje ekonomike mesatare vjetore 7-8%
Autori: Qeveria e Kosovës
Data: 2011-2014(Programi i Qeverisë)
Burimi: Programi i Qeverisë së Republikës së Kosovës, 2011-2014; gazetaexpress.com
Vlerësimi: E PAVËRTETË
Arsyetimi: Përkundër premtimeve të shumta të shkruara në Programin e Qeverisë për periudhën 2011-2014 se do të ketë një rritje mesatare ekonomike nga 7-8%, statistikat zyrtare të Bankës Qendrore e demantojnë këtë objektivë të Qeverisë. Zyrtarët e këtij institucioni në prezantimin e Raportit Vjetor 2011 dhe të dhënave për periudhën e parë të vitin 2012 kanë thënë se “rritja ekonomike nuk parashihet të kalojë shifrën mbi 3.8%”.

Deklarata 2: Përmirësimi i bilancit tregtar (rritja e eksportit dhe zëvendësimi i importit) është esencial për zbutjen e shpërpjesëtimeve makro-ekonomike
Autori: Qeveria e Kosovës
Data: 2011-2014(Programi i Qeverisë)
Burimi: Programi i Qeverisë së Republikës së Kosovës, 2011-2014; Agjencia e Statistikave të Kosovës
Vlerësimi: E PAVËRTETË
Arsyetimi: Qeveria e Kosovës në vazhdimësi ka premtuar uljen e bilancit negativ tregtar në mënyrë që eksportet të përmirësohet dhe importi të ulet. Pavarësisht këtij premtimi, statistikat e gjashtë mujorit të parë të këtij viti, tregojnë se deficiti tregtar ka shënuar vlerën prej rreth 1 miliard euro si pasojë e rritjes më të madhe të importeve në krahasim me eksportet. Kjo rritje e deficitit vjen pikërisht në kohën kur institucionet e vendit kishin premtuar ulje të deficitit duke rritur prodhimin vendor. Gjatë kësaj periudhe kohore, Kosova ka importuar mallra në vlerë prej mbi 1.1 miliard euro, përderisa ka eksportuar në vlerë prej rreth 120 milionë eurosh. Sipas të dhënave nga Agjencia e Statistikave të Kosovës (ASK), në periudhën janar-qershor, deficiti tregtar ka arrit në vlerë prej 988 milionë eurosh, përderisa në periudhën e njëjtë të vitit të kaluar ishte rreth 933 milionë euro.”

Deklarata 3: “Deri më tash një pjesë e bizneseve kanë paguar 10 për qind tatim, ndërkaq pjesa tjetër kanë paguar 5 për qind. Me këtë vendim të ri të gjithë tatimpaguesit do të trajtohen njësoj”
Autori: Bedri Hamza, ministër i Financave
Data: 20 korrik 2012
Burimi: http://ëëë.zeri.info/artikulli/2/8/53495/atk-ndeshkon-50-mije-biznese/
Vlerësimi: KONTRADIKTORE
Arsyetimi: Kjo deklaratë bie në kundërshtim me vetë programin e Qeverisë të cilën e përfaqëson ministri Hamza. Në këtë program thuhet se “ndërmarrjeve të vogla do t’iu kushtohet rëndësi strategjike si shtytës të zhvillimit ekonomik dhe punësimit”. Ndërkaq Ministri Hamza dhe Administrata Tatimore e Kosovës kanë vendosur që nga muaji korrik i këtij viti të ngritët tatimi për 80% për bizneset shërbyese, veprimtaritë profesionale, të zanatit dhe të argëtimit, që i bie të hynë në kategorinë e bizneseve të vogla. Një ngitje e tillë e tatimit do të pamundësoj aktivitetin ekonomik të bizneseve të vogla. Një gjë e tillë po ashtu ka shqetësuar në masë të madhe edhe pronarët e bizneseve të vogla, të cilat brenda një viti kanë të ardhura bruto deri në pesëdhjetë mijë euro.

Deklarata 4: “Unë e kam marrë këtë obligim dhe kam thënë se deri më 1 qershor do t’i nxjerrim dhe do t’i dërgojmë në Parlament tre ligjet kryesore sistemore, të cilat e shtrojnë rrugën e reformave në shëndetësi”.
Autori: Ferid Agani – Ministër i Shëndetësisë
Data: 03 Maj 2011
Burimi: Radio Evropa e Lirë
Vlerësimi: E PAVËRTETË
Arsyetimi: Fjala këtu është për tre ligjet ( Ligjin për Shëndetësinë, Ligjin për Sigurime Shëndetësore si dhe Ligjin e ri të barnave dhe Pajisjeve Medicinale). Këtë premtim, Ministri Agani e ka dhënë për Radion Evropa e Lirë në fillim të mandatit të tij. Jemi në muajin shtator 2012 që i bie më shumë se një vit dhe vetëm Ligji për Shëndetësinë është dërguar në Parlament, ndërkaq dy projektligjet tjera as që janë dërguar në Parlament e aq më larg të aprovohen.

Deklarata 5: “Segmenti i dytë i rrugës B është planifikuar të ndërtohet brenda një viti”
Autori: Isa Mustafa – Kryetari i Prishtinës
Data: 21 korrik 2011
Burimi: http://kk.rks-gov.net/prishtina/Neës/Advertisement/Filluan-punimet-ne-ndertimin-e-pjeses-se-dyte-te-r.aspx
Vlerësimi: E PAVËRTETË
Arsyetimi: Ky premtim është dhënë nga i pari i Prishtinës para më shumë së 1 viti pikërisht në përurimin e nisjes së punës të kësaj rruge. Mirëpo, edhe pas 1 viti kjo rrugë ende nuk është përfunduar.

Prishtinë, 5 shtator 2012- Lëvizja FOL sot ka publikuar platformën online për deklarimin dhe krahasimin e pasurisë së zyrtarëve të lartë publik. Kjo platformë është e integruar brenda ueb-faqes së Lëvizjes FOL (http://levizjafol.org/al/deklarimet ) , dhe e cila do të mundësojë: a) Deklarimin dhe krahasimin në mënyrë automatike të pasurisë së zyrtarëve të lartë publik, b) Përfshirjen e qytetarëve të Kosovë në mënyrë aktive përmes komenteve dhe fakteve që ata kanë në raport me deklarimet e zyrtarëve të caktuar, si dhe c) Që përmes kësaj platforme dhe përmes fakteve që do të vijnë gjatë ditëve në vijim të iniciojmë procedurat e ndryshimit të ligjit për deklarim, në mënyrë që të përfshihet edhe komponenta e hetimit të pasurisë në momentin që ka dyshime të caktuara.

Platforma përfshin 224 zyrtarë të lartë publik, ku për secilin në mënyrë individuale qytetarët e Kosovës mund t’i krahasojnë deklarimet e pasurisë dhe njëkohësisht t’i komentojnë ato për secilën kategori të deklaruar. Komentet që do të jepen në këtë platformë pas një periudhe të caktuar do të dërgohen në Agjencinë Kundër Korrupsion dhe në Prokurorinë e Shtetit, në mënyrë që të fillohen hetimet për deklarimet që eventualisht nuk janë të sakta ose për nivelin e lartë të dallimeve nga viti në vit pa ndonjë shpjegim të arsyeshëm.

Galeria e aktivitetit

Lëvizja FOL, nga 23 deri me 26 gusht 2012, po organizon kampin veror me vullnetarët e sapo inkuadruar të cilët do të trajnohen rreth teknikave të qytetarisë aktive në promovimin e luftës anti-korrupsion.

Rreth 40 vullnetar pjesëmarrës në këtë kamp do të jenë nga tri komuna tw ndryshme, nga Prishtina, Gjakova dhe Podujeva. Profili i pjesëmarrësve do të jetë, të rinj që janë pjesë aktive dhe influencuese e organizatave, këshilleve dhe klubeve rinore në komunat përkatëse në mënyrë që njohuritë e fituara gjatë ndjekjes së kampit ti transmetojnë tek bashkëmoshatarët dhe të rinjtë e komunave nga vijën ata.

Programi i këtij kampi do të bazohet në 4 module: Shteti dhe Zgjedhjet, Gjyqësori, Mediat dhe OJQ/Teatri i Rrugëve.

Qëllimi i kampit është mbështetja dhe fuqizimi i qytetarisë aktive në Kosovë si mënyra më e mirë për përparimin e demokracisë dhe rritjen e llogaridhënies së institucioneve publike karshi qytetarëve. Llogaridhënia dhe Transparenca janë mënyra më e mirë për luftën kundër korrupsionit dhe abuzimit me autoritetin publik.

Kampi Veror i Vullnetarëve 2012 organizohet nga Lëvizja FOL me mbështetje të Charless Mott Foundation.

Galeria e aktivitetit

Lëvizja FOL ka publikuar sot, Raportin e saj “Monitoruesi i Korrupsionit”, në të cilin përfshihen të gjitha aktivitetet e ndërmarra institucionale në luft&…

Monitoruesi i Korrupsionit: Janar-Qershor 2012