Lëvizja FOL, në kuadër të projektit “Sektori i drejtësisë – i përgjegjshëm, i besueshëm dhe transparent në Kosovë – ACT-JS” hap thirrje për pjesëmarrje në trajnim për ngritje të kapaciteteve ligjore të organizatave të shoqërisë civile në Kosovë.

Qëllimi i këtij trajnimi është ngritja e kapaciteteve të pjesëmarrësve nga shoqëria civile për monitorimin e sektorit të drejtësisë, si dhe përdorimin e mekanizmave ligjorë për shtyerjen e agjendave të organizatave të tyre.

Për të qenë pjesë e këtij trajnimi, dërgoni të dhënat e juaja (Emrin Mbiemrin, Pozita dhe Organizata) në [email protected], deri më datë 26 mars, 2021 11:59.

Trajnimi do të mbahet me datë 30 mars 2021 dhe do të jetë një ditor. Për përfaqësuesit e organizatave jashtë Prishtinës, do të mbulohen shpenzimet e rrugës.

Trajnimi do të mbahet duke respektuar rekomandimet e IKSHPK-së.

Ky projekt mbështetet nga Departamenti i Shtetit Amerikan, përmes Byrosë së Narkotikëve Ndërkombëtar dhe Çështjeve të Zbatimit të Ligjit (INL).

Prishtinë, 8 mars 2021 – Lëvizja FOL me mbështetjen e Konrad Adenauer Stiftung (KAS) ka analizuar të dhënat nga deklarimi i pasurisë së zyrtarëve publike sa i përket posedimit të pasurisë së grave zyrtare publike dhe të grave të zyrtarëve publik. Për të diskutuar për gjetjet e këtij raporti të ftuara ishin Edi Gusia, kryeshefe ekzekutive e Agjencisë për Barazi Gjinore, Zyra e Kryeministrit dhe Luljeta Demolli, Drejtore Ekzekutive, Qendra Kosovare për Studime Gjinore. Gjithashtu në linjë direkte ishte edhe Daniel Braun, drejtor i zyrës së KAS’it për Kosovë dhe Maqedoni.

Mexhide Demolli-Nimani- drejtore ekzekutive e Lëvizjes FOL tha qëllimi i këtij raporti ishte të reflektojë mbi kushtet e grave zyrtare publike si dhe gratë e zyrtarëve publikë në deklaratën e pasurisë në emër të të dy bashkëshortëve, por edhe pjesëmarrjen e gruas si pronare në trashëgiminë e dhuruar ose (individualisht) pronë e blerë. “Ky raport përfshinë deputetët e dy legjislaturave të fundit të Kuvendit, kabinetet qeveritare të qeverisë Haradinaj, Kurti dhe Hoti si dhe kryetarët e Komunave”, tha ajo.

Daniel Braun – drejtor i zyrës së KAS-it për Kosovë dhe Maqedoni tha se barazia ekonomike është shumë e rëndësishme për t’u arritur në mënyrë që gratë të jenë të barabarta pastaj në të gjitha sferat e tjera.

Alba Jakupi nga Lëvizja FOL prezantoi gjetjet e raportit ajo tha se:

• Në Qeverinë Hoti, vetëm 36% e ministrave kanë pasuri në emër të bashkëshortes, ndërsa 18.5% e zëvendësministrave kanë pasuri në emër të bashkëshortes: Kjo qeveri ka pasur 3 ministre gra, dy nga te cilat kanë pasuri në emër të tyre ndërsa një nuk ka.
• Në Qeverinë Kurti, 85% e ish ministrave kanë pasuri në emër të bashkëshortes; 50% e zëvendësministrave kanë pasuri në emër të bashkëshortes. Në këtë qeveri, 50% e ministreve gra kanë pasuri të tyre, ndërsa vetëm 33% e zëvendësministreve kanë pasuri të tyren.
• Në Qeverinë Haradinaj, vetëm 25% e ish ministrave kanë pasuri në emër të bashkëshortes; ndërsa 50% e ish zëvendësministrave kanë pasuri në emër të bashkëshortes. Kjo qeveri ka pasur vetëm një ministre grua, e cila ka pasur pasuri në emër të saj, tha Jakupi.

Edi Gusia, drejtoreshë e Agjencisë Për Barazi Gjinore në zyrën e kryeministrit, ka thënë se pavarësisht që Ligji për familjen e njeh pronën e krijuar pas martesës si pronë që ju përket të dy bashkëshorteve, fatkeqësisht ende nuk janë vetëdijesua që të regjistrojnë në emër të të dy bashkëshortëve. “Më vjen mirë që 55% e kryetarëve të komunave kanë të regjistruar pasuri në emër të bashkëshorteve edhe pse asnjë grua nuk udhëheq në nivelin komunal”, tha Gusia.

Ndërkaq, Luljeta Demolli – drejtoreshë në Qendrën Kosovare për Studime Gjinore, ka thënë se në Kosovë nuk është e kënaqshme ndarja e trashëgimisë dhe siç thotë ajo, kjo tregon se ka ende mbetje të patriarkatit në familje dhe institucione. “Ndarja e pasurisë është ndarje e pushtetit prandaj mund të shihet se në Kosovë ky pushtet nuk ju takon të dy gjinive njësoj”, tha ajo.

Lëvizja FOL me mbështetjen e USAID Komuna Transparente, Efektive dhe Llogaridhënëse hap thirrjen për aplikim për Çmimin “FOL për prokurim”.

Monitorimi i prokurimit publik nga gazetarët në mënyrë direkte apo indirekte do të shtyjë institucionet përkatëse të rishikojnë metodat e tyre të punës në mënyrë që të jenë më transparente dhe të përgjegjshme në shpenzimin e parasë publike.

Andaj, për të inkurajuar gazetarinë hulumtuese në fushën e prokurimit publik, FOL do të ndaj tre çmime për artikujt e botuar nga gazetarë hulumtues në këtë fushë, të cilët kanë paraqitur parregullsi dhe keqpërdorime përmes procedurave të prokurimit publik. Çmimi i parë do të jetë 500 euro, i dyti 300 euro, dhe i treti do të jetë 200 euro.

Kush mund të aplikojë?

Gazetarët/et që veprojnë në Kosovë dhe punojnë si të pavarur (freelancer) apo janë të punësuar nga mediat e regjistruara në Kosovë.

– Artikujt duhet të jenë të publikuar për të gjitha format e gazetarisë (shtyp, në internet, radio dhe TV) të transmetuara në mediat e Kosovës në gjuhën zyrtare.

– Artikujt/storiet e dorëzuara për aplikim duhet të jenë të publikuara gjatë vitit kalendarik 1 janar – 31 dhjetor 2020.

Procedura e aplikimit/nominimit:

– Aplikoni duke dërguar artikullin, linkun e publikimit dhe një bio të shkurtër në email-in: [email protected] dhe shkruaj në subjekt “Aplikim/nominim për çmimin FOL për prokurim”,

Afati për aplikim:

– Afati i dorëzimit të aplikimit është 26.03.2021.

Vlerësimi:

Juria e Çmimit “FOL për Prokurim” do të përbëhet nga ekspertë të medias dhe njohës të fushës së prokurimit publik.

Deçan, 2 mars 2021 – Koalicioni ad-hoc i organizatave të shoqërisë civile kanë mbajtur sot konferencë për media, me ç’rast është bërë dorëzimi i përgjigjes në padinë e ngritur nga kompania Kelkos ndaj aktivistes Shpresa Loshaj.

Adem Lushaj, aktivist nga Deçani lexoi një deklaratë të dërguar nga Shpresa Loshaj e cila thotë: “Kjo padi agresive ndaj meje po tregon qartë se Kelkosi ka shumë çka për të fshehur dhe mbuluar, për këtë edhe po lëshohen në masa ektreme. Po më padisin për fakte që ne si Deçanas i kemi para sysh qe gati 10 vjet, por edhe janë të dokumentuara nga institucionet publike, Avokati i Popullit dhe shoqëria civile. Por sa shumë qe po mundohen të mbulojnë evidencën dërrmuese për krimet e tyre mbi Grykë të Deçanit, aq më shumë janë duke rrëshqitur më poshtë. Më paditën mua se ndoshta menduan se do të jem vetëm, por ne ju dëshmuam ndryshe. Faleminderojë dhjetra, mijëra qytetarë nga Kosova dhe diaspora për mesazhe mbështetëse, ofrim të ndihmës profesionale, finaciare dhe çdo gjë të mundur vetëm që të mbrohemi nga Kelkosi. Dua të ju siguroj se tentimet e tyre të na heshtin nuk na trembin syrin, por vetëm sa na e kanë forcu vendosshmërine, dhe na kanë bashkuar edhe më shumë në mbrojtje të vendit dhe demokracisë tonë, e ne nuk do te ndalemi #DERINEFUND!”.

Ndërkaq, avokatja Rina Kika tha se Kelkos ka paditur aktivisten mjedisore Shpresa Loshaj dhe ka kërkuar nga ajo që t’ia paguajë (1) dëmshpërblimin 100,000 euro për dëmtim të reputacionit ; (2) të kërkojë falje  publikisht për deklaratat e dhëna dhe 3) të përmbahet në të ardhmen nga deklarata të tilla. Kelkos pretendon mes tjerash se Shpresa pa u bazuar në asnjë fakt, ka deklaruar publikisht (1) se Kelkos ka prodhuar rrymë me vite pa leje mjedisore dhe (2) se Kelkos ka degraduar mjedisin në Grykën e Deçanit. Të gjitha dekaratat e Shpresës janë të mbështetura në fakte dhe janë të mbrojtura me lirinë e shprehjes që mbrohet me nenin 40 të Kushtetutës sonë. ”Deklarata e Shpresës se Kelkos ka prodhuar rrymë me vite pa leje mjedisore e pa licencë mbështetet në Raportin e monitorimit të ndërmarrjes Kelkos Sh.p.k. të datës 14 dhjetor 2016, të cilin e ka nxjerrë ZRRE. Në këtë raport konstatohet se në mungesë të lejes mjedisore ZRRE nuk i ka lëshuar licencë për operim dhe se pavarësisht kësaj Kelkos ka vazhduar me operimin e HC Deçani dhe HC Belaje, pa licencë dhe pa leje mjedisore. Në Raportin vjetor 2018, ZRRE konstaton sërish se nga data 1 prill 2016 Kelkos ka vazhduar operimin komercial pa licencë e pa leje mjedisore. Prandaj deklaratat e Shpresës se Kelkos ka prodhuar rrymë me vite pa leje mjedisore janë deklarata të bazuara në fakte dhe mbrohen me lirinë e shprehjes”, tha Kika, duke shtuar se Shpresa ka shfrytëzuar të drejtën e saj kushtetuese për tu shprehur lirshëm për një çështje me interes publik siç është mbrojtja e mjedisit dhe ujërave andaj ne sot e kemi dorëzuar përgjigjen në padi dhe kemi kërkuar që Gjykata në Deçan ta refuzoj padinë si të pabazuar.
Mexhide Demolli-Nimani tha se është hera e dytë që ne si shoqëri civile gjendemi para kësaj ndërtese të gjykatës në Deçan, për të përkrahur aktivistët e paditur me padi SLAPP e fatkeqsisht padia vjen nga e njëjta kompani, vetëm ndryshojnë emrat e aktivistëve dhe shifrat e kërkuara si dëmshpërblim. “Unë sot përfaqësoj këtu zërin e mbi 75 OJQ-ve dhe aktivistëve dhjetëra organizatave të shoqërisë civile të cilat i japin mbështetje Shpresës në këtë rast, sikurse edhe Adriatikut vitin e kaluar. “Përveç që i japim mbështetje Shpresës, gjithashtu shprehim shqetësimin tonë për trendin e përdorimit të padive SLAPP ndaj aktivistëve dhe gazetarëve. Ne konsiderojmë se paditë SLAPP nëse do të jenë të suksesshme në Gjykatë do të përbënin një kërcënim të demokracisë dhe të drejtës së lirisë së shprehjes”.  Shoqëria Civile do ti përcjell dhe mbështes edhe me tutje rastet e tilla dhe do të vazhdojmë të punojnë në luftimin e padive SLAPP.

 

Prishtinë, 11 shkurt 2021 – Lëvizja FOL ka vazhduar të monitorojë publikimin e aktgjykimeve nga të gjitha gjykatat e Kosovës. Gjatë monitorimit të aktgjykimeve të publikuara në ueb faqen e Këshillit Gjyqësor të Kosovës për janar 2021, janë publikuar 1628 aktgjykime. FOL gjithashtu ka monitoruar gjyqtarët me më shumë vendime të publikuara për secilën gjykatë.

Gjatë muajit janar, gjykata me më së shumti aktgjykime të publikuara është Gjykata Themelore e Prishtinës, e cila ka publikuar gjithsej 342 aktgjykime. Kjo gjykatë (së bashku me degët në Lipjan, Podujevë, Gllogovc, Graçanicë) ka publikuar 135 lëndë civile, 163 penale, 5 ekonomike dhe 39 administrative. Ndërkaq, sa i përket gjyqtarëve me më së shumti aktgjykime të publikuara në Gjykatën Themelore të Prishtinës janë: Avdirrahman Gashi (27 aktgjykime), Shefshet Baleci (26 aktgjykime), Selman Salihi (22 aktgjykime), Fisnik Nuli (20 aktgjykime), Hidajete Gashi (19). gjykimet).

Gjykata Themelore e Mitrovicës (së bashku me degët e saj në Skënderaj, Vushtrri, Zubin Potok, Leposaviq) ka publikuar gjithsej 165 aktgjykime: 57 lëndë civile dhe 108 lëndë penale. Gjyqtarët me më shumë aktgjykime të publikuara janë: Rrahman Beqiri (36 aktgjykime), Sladjana Gabic (22 aktgjykime), Agron Maxhuni (22 aktgjykime), Gëzim Ademi (21 aktgjykime), Naim Meholli (19 aktgjykime).

Gjykata Supreme (duke përfshirë Dhomën e Posaçme dhe Kolegjin e Apelit) ka nxjerrë gjithsej 131 aktgjykime. Nga këto, 94 janë civile, 14 penale, 1 ekonomike dhe 22 administrative.

Pesë gjyqtarët me më shumë aktgjykime të publikuara janë: Teuta Ibrahimi (35 aktgjykime), Sabri Halili (20 aktgjykime), Hasim Sogojeva (18 aktgjykime), Hajrie Shala (16 aktgjykime), Jelena Krivokapic (7 aktgjykime).

Gjykata e Apelit (së bashku me Divizionin e Apelit në Mitrovicë) ka nxjerrë gjithsej 91 aktgjykime: 82 civile, 9 penale dhe asnjë lëndë ekonomike apo administrative.

Gjyqtarët që kanë publikuar më së shumti aktgjykime në këtë gjykatë janë: Makifete Saliuka (20 aktgjykime), Valon Totaj (16 aktgjykime), Kujtim Pasuli (12 aktgjykime), Gëzim Llulluni (11 aktgjykime), Nora Bllaca-Dula (9 aktgjykime).

Gjykata Themelore e Ferizajt (së bashku me degën Kaçanik dhe ërtrpcë) ka publikuar gjithsej 148 aktgjykime: 39 lëndë civile dhe 109 lëndë penale.

Pesë gjyqtarët me më shumë aktgjykime të publikuara ishin: Adem Shabani (14 aktgjykime), Fitore Daci (14 aktgjykime), Shabi Idrizi (14 aktgjykime), Zajrete Muhaxhiri (13 aktgjykime), Imri Sejda (12 aktgjykime).

Gjykata Themelore e Gjakovës (së bashku me degët Malishevë dhe Rahovec) ka publikuar gjithsej 205 aktgjykime: 61 lëndë civile dhe 144 lëndë penale.

Pesë gjyqtarët me më shumë aktgjykime të publikuara ishin: Mizahir Shabani (21 aktgjykime), Diana Sina (20 aktgjykime), Ilirjana Hoti (20 aktgjykime), Malsor Kryeziu (20 aktgjykime), Drilon Haraçia (19 aktgjykime).

Gjykata Themelore e Gjilanit (së bashku me degët Viti, Kamenicë dhe Novobërdë) ka publikuar gjithsej 124 aktgjykime: 74 lëndë civile dhe 50 lëndë penale.

Në Gjykatën Themelore të Gjilanit pesë gjyqtarët me më së shumti aktgjykime janë: Rilind Sermaxhaj (18 aktgjykime), Florije Qerimi (15 aktgjykime), Mirvete Alidemi (13 aktgjykime), Gazmend Ajvazi (11 aktgjykime), Sadri Krasniqi (10 aktgjykime). .

Gjykata Themelore e Prizrenit (së bashku me degën Dragash dhe Suharekë) ka publikuar gjithsej 120 aktgjykime: 11 lëndë civile dhe 109 lëndë penale.

Gjyqtarët me më shumë aktgjykime të publikuara janë: Qemail Suka (20 aktgjykime), Shpresa Emra (15 aktgjykime), Refik Piraj (11 aktgjykime), Sebahate Kurteshi (10 aktgjykime), Arjeta Gashi (10 aktgjykime).

Gjykata Themelore e Pejës (së bashku me degën Klinë dhe Istog) ka publikuar gjithsej 302 aktgjykime: 80 lëndë civile dhe 222 lëndë penale.

Gjyqtarët me më shumë vendime të publikuara janë: Violeta Husaj Rugova (37 gjykime), Arben Mustafaj (24 gjykime), Sulltan Dobraj (22 gjykime), Murat Hulaj (22 gjykime), Sami Sharaxhiu (22 gjykime).

Lëvizja FOL në bashkëpunim me Internews Kosova dhe Debate Center, në kuadër të projektit “Sektori i drejtësisë – i përgjegjshëm, i besueshëm dhe transparent në Kosovë – ACT-JS”, në fazën e parë të projektit kanë angazhuar tre praktikantë. Elona, Dea dhe Raesa, përgjatë tre muajve ishin pjesë e organizatave tona, ku përfituan ekperiencë në monitorimin e sistemit gjyqësor në vend dhe jo vetëm. Lexoni më poshtë për përvojën e tyre gjatë punës praktike.

Elona:
“Profesionalisht kam fituar shumë nga përvoja e mbajtjes së praktikës brenda organizatës “Internews Kosova”.
Kjo përvojë ka bërë që unë të zgjeroj diapazonin tim, si juriste e re. Gjatë monitorimit të seancave gjyqësore, kam mësuar detaje nga rrjedha e procedurës penale dhe civile.
Kam arritur të zgjeroj njohuritë edhe sa i përket hulumtimit mbi qasjen dhe qëndrimet e përfaqësuesve institucionalë, gjatë trajtimit të rasteve të ndryshme në fushën e sundimit të ligjit. Kjo praktikë po ashtu ka bërë që të krijojë kontakte me persona të rëndësishëm në procesim e zhvillimit tim profesional.”
….
Elona: Professionally I have gained a lot from the experience within the organization “Internews Kosova”. This experience has made me expand my range of knowledge as a young lawyer. During the monitoring of court hearings, I learned details from the course of criminal and civil proceedings.
I have managed to expand my knowledge in terms of research on the approach and attitudes of institutional representatives, when dealing with various cases in the field of rule of law. This internship has also made me establish contacts with important people in the process of my professional development.”

 

Raesa:
“Përgjatë tre muajve në Debate Center, kam përfituar jashtëzakonisht shumë nga ana profesionale, por njëkohësisht edhe ajo personale.
Këta muaj kam ndihmuar në përgatitjen e aktiviteteve në kuadër të projektit ACT-JS, përmes së cilit kam mësuar më detajisht rreth sistemit gjyqësor në Kosovë, e poashtu edhe rreth kapaciteteve ligjore të organizatave në vendin tonë.”
…..
Raesa: “During the three months internship at the Debate Center, I have benefited extremely professionally, but also personally.
Throughout these months I have helped in the preparation of activities within the ACT-JS project, through which I have learned in more detail about the judicial system in Kosovo, as well as about the legal capacity of the organizations in our country. ”
Dea:

“Të qenurit pjesë e Lëvizjes FOL gjatë tre muajve, ka qenë një eksperiencë tejet përmbushëse. Monitorimi I sistemit gjyqësor ishte shumë e dobishme për rrugëtimin tim profesional duke qenë se jam studente e vitit parë në Fakultetin Juridik.

Përveç kësaj, pata edhe mundësinë të punoj drejtpërdrejt me hulumtues në FOL, me të cilët arrita të fitoja njohuri të reja rreth hulumtimeve në organizata jo-qeveritare. Përfitimet e kësaj praktike do të jenë tejet të nevojshme në angazhimet e mija të ardhshme në fushën ligjore.”

….
Dea: “Being part of the FOL Movement for three months has been a very fulfilling experience. Monitoring the judicial system was very useful for my professional journey as I am a first year student at the Faculty of Law.
In addition, I had the opportunity to work directly with researchers at FOL, with whom I managed to gain new knowledge about research in non-governmental organizations. The benefits of this internship will be much needed in my future legal engagements.”

 

 

Prishtinë, 15 janar 2020 – Lëvizja FOL me mbështetjen e KFOS do të angazhohet në monitorimin e zbatimit të reformave në administratën publike. Reforma në administratën publike është një proces qenësore për fuqizimin e  transparencës dhe llogaridhënies së institucioneve publike, që është një parakusht për parandalimin të korrupsionit dhe abuzimit me detyrën zyrtare. Në këtë drejtim, Lëvizja FOL ka identifikuar 10 masa prioritare të reformave në administratën publike për vitin 2021 që kanë rëndësi të veçantë për luftën kundër korrupsionit. Këto masa reformuese janë nxjerr nga korniza strategjike e reformave në administratën publike, kryesisht Strategjia për Modernizimin e Administratës Publike 2015-2020 si dhe Kontrata e Reformës Sektoriale për Reformën ne Administratën Publike midis Qeverisë së Kosovës dhe Komisionit Evropian. Lëvizja FOL do të avokoj për zbatimin e 10 masave prioritare të reformave si dhe do të monitoroj punën e institucioneve në zbatimin e tyre.

Secila masë prioritare e reformave do të vlerësohet nëse është zbatuar, nuk është zbatuar ose ka progres drejt zbatimit. Varësisht nga vlerësimit, i cili do të bazohet nga të dhënat që do të sigurohen nga hulumtimi i Lëvizjes FOL, organizata do të nxjerr një notë të përgjithshme të performancës së Qeverisë së Kosovës në zbatimin e reformës së administratës publike në vitin 2021.

Zhvillimi i kësaj karte monitorimit dhe vlerësimi ka për qëllim të dyfishtë, nxitjen e qeverisë të arrijë rezultate konkrete në reformat e administratës publike që kanë rëndësi të veçantë për luftën kundër korrupsionit si dhe të fokusoj punën monitoruese të shoqërisë civile në procesin e zbatimit të reformave në administratën publike.

Reformat prioritare me fokus nga Lëvizja FOL:

1. Përqindja e zbatimit të masave afatshkurtra nga Programi Kombëtar për Zbatimin e MSA-së
2. Përqindja e strategjive/politikave të sektorit, koncept dokumenteve dhe ligjeve primare të miratuara nga qeveria në vitin 2020 që kanë qenë subjekt i konsultimit publik në përputhje me Standardet Minimale për Konsultimin Publik
3. Themelimi i Departamentit për Menaxhimin e Zyrtarëve Publikë në Ministrinë e Punëve të Brendshme
4. Fillimi i zbatimit të rekrutimit të centralizuar në shërbimin civil në përputhje me Ligjin për Zyrtarët Publik
5. Zbatimi i të aplikimit dhe testimit elektronik për pranim në shërbimin civil të Republikës së Kosovës
6. Miratimi nga Qeveria dhe dërgimi në Kuvend i masave të nevojshme ligjore në mënyrë që procedurat e veçanta administrative që bien ndesh me Ligjin për Procedurat e Përgjithshme Administrative janë shfuqizuar ose harmonizuar.
7. Zbatimi i valës së parë të racionalizimit të agjencive në përputhje me planin e veprimit dhe koncept dokumentin e miratuar nga Qeveria.
8. Pezullimi zyrtarëve publikë që janë paditur apo në hetime për vepra të lidhura me korrupsionin
9. Largimi nga postet publike i zyrtarëve të cilët janë dënuar për vepra të lidhura me korrupsionin
10. Publikimi i raportit për masat disiplinore të ndërmarra ndaj nëpunësve civil për shkelje të etikës dhe legjislacionit anti-korrupsion

Lëvizja FOL hap thirrjen për tre (3) praktikantë, studentë të fakultetit Juridik apo të shkencave shoqërore (Gazetari, Shkenca Politike, Sociologji, dhe të ngjajshme), të nivelit Bachelor dhe Master.

Programi i praktikës është me pagesë dhe zgjat 3 muaj – 30 orë punë në javë, duke filluar nga data 15 Shkurt 2021. Praktikantët do të kryejnë detyra në kuadër të monitorimeve, mbledhje të të dhënave dhe raportime mbi sektorin e drejtësisë në Kosovë.

Për të aplikuar, ju lutem dërgoni CV-në tuaj si dhe një Letër Motivimi në gjuhën angleze në [email protected] jo më vonë se 25 Janar 2021. Të gjithë kandidatët që përmbushin kriteret e lartëcekura do të ftohen për intervistë.

………

Ky program realizohet nga Lëvizja FOL në bashkëpunim me Internews Kosova dhe Debate Center, në kuadër të projektit “Sektori i drejtësisë – i përgjegjshëm, i besueshëm dhe transparent në Kosovë – ACT-JS” të financuar nga Departamenti i Shtetit Amerikan, përmes Byrosë së Narkotikëve Ndërkombëtar dhe Çështjeve të Zbatimit të Ligjit (INL).

 

Prishtinë, 9 dhjetor 2020 – Dita Ndërkombëtare Kundër Korrupsion për Qeverinë dhe të gjitha institucionet e Republikës së Kosovës, do të duhej të ishte një ditë në të cilën do të numëroheshin sukseset në luftën kundër korrupsion. Fatkeqësisht sukseset ndaj kësaj dukurie janë në një nivel të papërfillshëm.

Të dhënat nga raportet kredibile kombëtare dhe ndërkombëtare, të cilat specifikojnë pjesë të korrupsionit, janë alarmante. Sipas raportit të UNDP-së qytetarët e Kosovës kanë renditur papunësinë, korrupsionin dhe varfërinë si tre problemet themelore me të cilat përballet Kosova aktualisht.

Sipas, studimit të Odës Ekonomike Amerikane për vitin 2019, i cili ka matur aspektet kritike të korrupsionit, tregon se 72% e bizneseve e shohin korrupsionin si një çështje shumë të rëndësishme në Kosovë, ndërsa më shumë se gjysma e tyre e konsiderojnë korrupsionin në Kosovë si sistematik.

Raporti i vendit për Kosovën për vitin 2020 tregon se Kosova ka bërë progres të kufizuar në hetimin dhe ndjekjen penale të rasteve të nivelit të lartë të korrupsionit, në konfiskimin e pasurive si dhe përmes krijimit të departamenteve speciale që trajtojnë me prioritet rastet në lidhje me korrupsionin e nivelit të lartë, të korrupsionit (dhe krimin e organizuar) në gjykata.

Deri më tash, institucionet si Prokuroria dhe Gjykatat nuk kanë ndërmarrë dhe nuk po ndërmarrin veprimet e nevojshme me të cilat do të dëshmonin përkushtimin e tyre ndaj luftës kundër korrupsionit.

Andaj, në Ditën Ndërkombëtare kundër Korrupsion Lëvizja FOL kërkon rezultate të matshme dhe veprime konkrete në luftën kundër korrupsion, e jo fjalë boshe siç jemi mësuar të dëgjojmë zyrtarët shtetërorë për çdo ditë.

Prishtinë, 04 dhjetor 2020 – Lëvizja FOL edhe këtë vit ka ndarë Çmimit për Guxim Qytetar për vitin 2020, i cili në këtë vit iu nda znj. Shpresa Loshaj nga Deçani.

Mexhide Demolli-Nimani, drejtore e Lëvizjes FOL tha se këtë çmim, FOL e ndanë për herë të 12-të, në shenjë vlerësimi për personalitetet më të angazhuara në mbrojtjen e interesit publik dhe të drejtave të njeriut të vendit tonë. “Shpresa ka dëshmuar se vërtet mund të bëhet punë e mirë nëse ke guxim dhe nuk ke frikë nga pushtetarët që tentojnë të të heshtin, por në të njëjtën kohë Shpresa ka dhënë shembull për të gjithë se duhet të ketë vendosmëri që gjërat të shkojnë deri në fund. Ajo sot dorëzoi tri padi ndaj Zyrës së Rregullatorit për Energji dhe Ministrinë e Ambientit për lejet e Kelkosit”, tha Demolli-Nimani.

Leonora Kryeziu, kryesuese e Bordit Këshillëdhënës të Lëvizjes FOL tha se është nder i veçantë që edhe kësaj radhe me nda këtë Çmim i cili ka të bëjë me një temë shumë të veçantë, siç është mbrojta e ambientit, ”Ajo çka ka bërë Shpresa ka kaluar të  gjitha iniciativat të cilat janë marrë deri më sot, dhe ka zgjuar vetëdijen e secilit për mbrojtje të ambientit” tha ajo.

znj. Shpresa Loshaj fituese e çmimit falënderoi Lëvizjen FOL për çmimin dhe tha se ky sukses i‘u atribuohet të gjithë pjestarëve të shoqërisë civile të cilët më kanë mbështetur në këtë iniciativë.

Shpresa Loshaj gjatë tërë këtij viti u angazhua për mbrojtjen e lumit në grykë të Deçanit dhe shkatërrimet në Zallin e Rupës përmes reagimeve të shumta duke shkruar letra politikanëve të Kosovës, duke avokuar në media në mbrojte të Grykës së Deçanit nga kompania Kelkos. Ajo ka ngritur këtë çështje në Asamble Komunale të Deçanit, në Komisionin Hetimor Parlamentar, në mënyrë që të ngritët si çështje në parlamentin e Carinthia të Austrisë, nga vjen Kompania Kelkos. znj. Loshaj, përmes angazhimit të saj e ka ngritë çështjen e shkatërrimeve në Zallë të Rupës në media si vendore edhe ndërkombëtare. Shpresa me angazhimin e saj ka arritur të dërgojë në vend të ngjarjes Kryeparlamentaren e Kosovës, Grupin e Deputetëve të Gjelbër të Kuvendit të Kosovës, Komisionin Hetimor Parlamentar, ekspert nga vendi dhe rajoni si dhe shoqërinë civile nga Austria dhe Kosova.

Prishtinë, 2 dhjetor 2020 – Lëvizja FOL ka mbajtur sot diskutimin online, me ç’rast ka publikuar raportin “Dështimet e Kuvendit në Funksionalizimin e Agjencisë për Informim dhe Privatësi”. FOL ka monitoruar dhe analizuar tërë procesin e përzgjedhjes së Komisionerit për Informim dhe Privatësi, i cili nuk ka arritur të zgjedhet për tri herë me radhë nga Kuvendi, dhe ka paraqitur të dhëna në lidhje me mbarëvajtjen e të tri konkurseve si dhe janë dhënë rekomandime për çështjet përkatëse.

Mexhide Demolli-Nimani, drejtore e Lëvizjes FOL tha se FOL së bashku me organizatat si Fondacioni Kosovar për Shoqëri Civile, Instituti GAP, Instituti D4D, Grupi për Studime Politike dhe Juridike, Çohu, Instituti Demokratik i Kosovës dhe aktivistja Flutura Kusari kanë monitoruar tri proceset e dështuara për zgjedhjen e Komisionerit. “Ne si koalicion ad-hoc kemi monitoruar të tri konkurset sa i përket zgjedhjes së Komisionerit dhe fatkeqësisht po bëhen dy vite dhe Kuvendi ende nuk ka arrit ta zgjedh komisionerin e Agjencisë për Informim dhe Privatësi”, tha Demolli Nimani.

Ndërkaq Albana Hasani nga Lëvizja FOL prezantoj gjetjet nga ky monitorim, ku përveç detajeve nga tri konkurset e këtij procesi, tha se “edhe përkundër faktit se Komisioneri i Agjencisë për Informim dhe Privatësi nuk është zgjedhur ende, Agjencia për Infomim dhe Privatësi ka vazhduar të sjellë vendime, këshilla dhe opinione ligjore“. Sipas Hasanit, gjatë periudhës korrik 2019 – korrik 2020  Agjencia për Infomim dhe Privatësi kishte dhënë 10 këshilla ndaj zyrtarëve përgjegjës të institucioneve dhe kishte sjellur 28 vendime, vendime këto të nënshkruara nga zyrtarë të tjerë të këtij institucioni, në mungesë të komisionerit.  Në fund, Hasani tha se ndryshimi i ligjit sa herë që shfaqen vështirësi në zbatimin e tij në praktikë paraqet anomali juridike dhe si e tillë nuk duhet të përvetësohet.

Fatmire Kollçaku, Kryetare e Komisionit Parlamentar për Çështjet e Sigurisë dhe Mbrojtjes, tha se ndër problemet evidente është çështja e përvojës menaxheriale meqenëse nuk është theksuar mirë në konkurs dhe nuk është definuar qartë se çfarë përvoje duhet të ken, ndërsa unë kam kërkuar edhe interpretim ligjore. Ndër të tjera, Kollçaku tha “asnjëherë nuk kam marr vendim vet, dhe me është thënë se vetë ligji ekzistues është ne kundërshtim me Kushtetutën sepse vetëm në disa raste duhet të shkohet me 2/3 të votave, dhe jo edhe për zgjedhjen e Komisionerit”.

Agim Maraj nga Ambasada Britanike në Prishtinë tha se Ambasada Britanike që katër vite është e angazhuar në shumë procese rekrutuese dhe të gjitha janë zhvilluar me ndihmën e eksperteve britanik të cilët kanë sjellë një përvojë të re.  Maraj ndër të tjera tha se “ne kemi vendosur që të tërhiqemi dhe të mos marrim pjesë në konkursin e katërt kurdo që bëhet dhe ky mos votim kam frikën që do të paraqes sinjal negativ për profesionistet e ardhshëm që do të aplikojnë”.

Jarmo Feliks Helppikangas, Këshilltar Ligjor në Zyrë e BE-së në Kosovë tha se ne kemi vëzhguar tërë procesin e përzgjedhjes së komisionerit dhe e kemi pritur me shqetësim vendimin për ndryshimin e ligjit.  Sipas Helppikangas roli i shoqërisë civile në tërë këtë proces ka qenë tejet i madh dhe këtë e karakterizon një shoqëri demokratike.

Flutura Kusari, aktiviste dhe juriste e të drejtës së mediave, ndër të tjera tha se “duhet të falënderoj për bashkëpunim dhe mikpritjen Kryetaren e Komisionit, znj Kollçakun, dhe Kuvendin në tërësi, Ambasadën Britanike dhe Zyrën e BE-së dhe gjithë ky bashkëpunim ka ndiku që ne me e kry punën më mirë”. Kusari gjithashtu tha se ky Agjencion i ka dy role, rolin e mbrojtjes së të dhënave personale dhe në anë tjetër roli i saj në transparencën publike prandaj shoqëria civile ka interes që ky institucion me funksionu si duhet. Në fund Kusari tha se nëse ndryshohet ligji dhe zgjedhja e komisionerit bëhet me shumicë të thjeshtë të votave, kapja e Agjencionit do të vazhdoj, veçse nuk dihet nga cila parti politike dhe si rezultat do të kemi një institucion që nuk do të ketë mbështetjen e të gjitha partive politike.