Lëvizja FOL dhe Prishtina Institute for Political Studies – PIPS në kuadër të projektit “Forcimi i Transparencës dhe Llogaridhënies për Reformat”, me mbështetjen e Ambasadës Holandeze në Prishtinë, ka publikuar një video ku shpalosen të gjeturat e raportit “Deri në çfarë mase është integruar programi elektoral i Vetëvendosjes në Programin Qeveritar?”.

Në kuadër të kësaj video poashtu prezantohet një analizë e nivelit të implementimit të Planit të Punës së Qeverisë për gjashtë muajt e parë të Qeverisë Kurti 2.

Për më shumë detaje gjeni videon dhe analizën.

 

Komisioni Ad-Hoc për përzgjedhjen e kandidatëve për anëtarë të Bordit për RTK-në ka përfunduar intervistimin e 91 kandidatëve nga 132 kandidatë sa kishin aplikuar.

Ky ishte ndër proceset më të mëdha sa i përket rekrutimit që Kuvendi i Kosovës ishte marrë deri më tani, për shkak të numrit të madh të kandidatëve që kishin aplikuar.

Nga monitorimi ynë del se ky proces ka shkuar korrekt dhe të gjithë anëtarët e Komisionit kanë treguar bashkëpunim me shoqërinë civile.

Gjithashtu vlen të theksohet transparenca e tërë këtij procesi, duke bërë që edhe poentimi i kandidatëve të bëhet në prezencë të monitoruesve të shoqërisë civile.

FOL ka mirëpritur që Komisioni Ad-Hoc ka vendosur që të respektohet Ligji për Barazi Gjinore në këtë proces, duke dërguar në Kuvend për votim një listë me përbërje të barabartë me kandidatët gra dhe burra.

Në listën e ngushtë që shkon në Kuvend, janë 16 kandidatë shqiptar, prej të cilëve 8 gra dhe 8 burra dhe 2 kandidatë (një burrë dhe një grua) nga komuniteti serb.

Vlen të theksohet së komisioni Ad-Hoc që nga fillimi i këtij procesi kanë punuar në drejtim që procesi i rekrutimit për Bord të RTK-së të bazohet në meritokraci.

1. Driton Hetemi 847 pikë
2. Besnik Boletini 812 pikë
3. Safet Kabashaj 797 pikë
4. Ejup Gojnovci 792 pikë
5. Bekim Selo 768 pikë
6. Ismet Sijarina 749 pikë
7. Fatime Lumi Qehaja 734 pikë
8. Petrit Qollaku 734 pikë
9. Arta Berisha 726 pikë
10. Enis Halimi 726 pikë
11. Albulena Mehmeti 724 pikë
12. Jehona Ademaj Sejdiu 704 pikë
13. Shukrije Rama 684 pikë
14. Mejreme Krasniqi Sadiku 683 pikë
15. Mihane Nertile Salihu Bala 668 pikë
16. Arta Pllana 670 pikë
17. Nelica Veljkovic 677 pikë
18. Mihailo Scepanovic 735 pikë

FOL i bënë thirrje deputeteve të Kuvendit të Republikës së Kosovës që gjatë votimit të kandidatëve të respektohet Ligji për Barazi Gjinore, si rrjedhojë Bordi i RTK-së të ketë përfaqësim të barabartë gjinor.

Lëvizja FOL përkrahet nga programi i Fondacionit Kosovar për Shoqëri Civile (KCSF) ‘EJA Kosovë’, bashkëfinancuar nga Agjencia Zvicerane për Zhvillim dhe Bashkëpunim (SDC) dhe Suedia.

Prishtinë, 29 tetor 2021 – Lëvizja FOL në bashkëpunim me Debate Center, janë duke vazhduar me monitorimin e publikimit të aktgjykimeve për të gjitha gjykatat e Kosovës.
Gjykatat e Kosovës gjatë muajit shtator 2021 kanë publikuar 2736 aktgjykime në ueb-portalin e Këshillit Gjyqësor të Kosovës.

Ky projekt mbështetet nga Departamenti i Shtetit Amerikan, përmes Byrosë së Narkotikëve Ndërkombëtar dhe Çështjeve të Zbatimit të Ligjit (INL).

 

 

Prishtinë, 27 tetor 2021 – Lëvizja FOL vazhdon serinë e debateve FOL Hapur me Ministra/e të Kosovës, ku sot i ftuari i radhës ishte Ministri i Bujqësisë, Pylltarisë dhe Zhvillimit Rural z. Faton Peci.
Temë diskutimi ishte realizimi i Planit të Punës së Qeverisë për periudhën mars-shtator 2021, prioritetet si dhe sfidat me të cilat po ballafaqohet kjo ministri.
Ky diskutim u realizua me mbështetjen e programit MATRA të Ambasadës Holandeze në Kosovë dhe zbatohet në bashkëpunim me PIPS.

Prishtinë, 23 tetor 2021 – Ne, organizatat dhe aktivistët e poshtëshënuar, shprehim shqetësimin tonë me padinë e ushtruar nga Radio Televizioni i Kosovës (RTK), kundër aktivistit dhe analistit të politikave në Institutin GAP Agron Demi. Kërkojmë nga RTK që menjëherë ta tërheqë padinë dhe në të ardhmen të përmbahet nga veprimet që rrezikojnë lirinë e shprehjes së aktivistëve dhe dekurajojnë monitorimin e këtij institucioni.

Gjatë muajve mars dhe prill 2020 z. Demi kishte shkruar, ndër të tjera, si vijon “E kisha shtu edhe një masë për ruajtjen e shëndetit: mbylljen e menjëhershme të RTK-së”. Televizioni publik pretendon që kritika e Demit përmes statuseve në Facebook, të shoqëruara me kërkesë për mbyllje të transmetuesit publik, përbën gjuhë të urrejtjes dhe fyerje ndaj televizionit dhe punonjësve të tij.

Kritikat e z.Demi janë të drejta dhe paraqesin të vërtetën e hidhur për transmetuesin publik RTK. Këto kritika bazohen në fakte të ditura botërisht dhe të mbështetura me raporte ndërkombëtare dhe vendore dhe vendime gjyqësore, të cilat theksojnë që RTK është institucion i ndikuar politikisht, për shkak të keqpërdorimeve financiare këtë vit bordi i saj është shkarkuar nga Kuvendi i Kosovës, rreth gjysmë milioni euro janë vjedhur nga televizioni nga punëtorët e saj, vazhdimisht ka refuzuar të bëjë auditim dhe gazetarët e pavarur janë censuruar në vazhdimësi gjë që kishte çuar në protestë të vetë gazetarëve kundër televizionit.

Ne shprehim zhgënjimin tonë të thellë, që RTK-ja në vend se të punojë në përmirësimin e situatës së rëndë në të cilën ndodhet transmetuesi, ajo përdor strategji gjyqësore për të heshtur kritikët.

Tutje, ne konsiderojmë se padia e ushtruar nga transmetuesi publik ka karakteristika të Padive Strategjike Kundër Pjesëmarrjes Publike (SLAPP). Kjo padi është e pabazuar dhe nuk ka shanse që të ketë sukses në gjykatë. Qëllimi i saj është zvarritja e z.Demi në gjykata, shkaktimi i stresit dhe kostos financiare dhe frikësimi i tij.

Rikujtojmë që RTK-ja është institucion publik, financohet nga paraja publike dhe i nënshtrohet mbikëqyrjes publike. Si i tillë, ky institucion duhet të tregojë nivel më të lartë të tolerancës ndaj kritikës. Për më tepër, është tronditëse që buxheti publik dedikuar RTK-së keqpërdoret në procedura gjyqësore për heshtjen e kritikës.

Përtej rastit specifik të z.Demi, vetë përdorimi i padive SLAPP mund të ketë efekt frenues edhe tek aktivistët tjerë që monitorojnë dhe kritikojnë punën e transmetuesit publik. Nuk duhet lejuar që të krijohet një precedent i tillë i rrezikshëm që ngulfat lirinë e shprehjes.

Padia është ushtruar pranë Gjykatës Themelore të Prishtinës më 17 prill 2021 dhe është nënshkruar nga z. Ngadhnjim Kastrati. Padia nuk ka emër të avokatit ndërsa lënda do të trajtohet nga gjykatësja Fatbardha Uka Ibrahimi. Z. Demi e ka pranuar padinë më 13 tetor 2021 në vendin e tij të punës.

Ne do të monitorojmë nga afër procesin gjyqësor dhe kemi besim të plotë që Gjykata Themelore e Prishtinës do ta trajtojë lëndën në pajtim me standardet e Gjykatës Europiane për te Drejtat e Njeriut dhe do ta njohë këtë padi si SLAPP.

Po ashtu, mbesim me shpresë që një ndër veprimet e para te bordit të ri të RTK-së do te jetë tërheqja e kësaj padie dhe ndalimi i përdorimit të padive SLAPP në të ardhmen. Në fund, i bëjmë thirrje Komisionit për Media të Kuvendit të Kosovës që të monitorojë zhvillimet që ndërlidhen me këtë rast gjyqësor.

 

 

Grupi Anti-SLAPP (Flutura Kusari, Shpresa Loshaj, Adriatik Gacaferri, Ardian Nrecaj, Visar Alimehaj, Rina Kika, Lëvizja FOL, KCSF), GAP, Grupi për Mbrojtjen e Ujërave dhe Mjedisit, Qendra për Politika dhe Avokim(QPA), Syri i Vizionit, Qendra Multimedia, Shoqata e Intelektualëve të Pavarur në Deçan, PIPS, Balkan Sun Flowers Kosova, QKSS, Çohu, KDI, EC Ma Ndryshe, Grupi për Hulumtimin e Politikave në Balkan, D+, Qendra për Zhvillimin e Grupeve Shoqërore – CSGD, INDEP, BIRN, FIQ, Internews Kosova, CHwB Kosova, PEN, Organizata për Rritjen e Cilësisë në Arsim (ORCA), GLPS, TOKA, Instituti për Liri dhe Drejtësi, KMDLNj, KRCT, KADC, YMCA Movement, AMPEK, CEL Kosova, Komiteti i Grave të Verbra të Kosovws, Community Building Mitrovica, Instituti COLUMBUS, IKD, YIHR KS, Demokraci për zhvillim (D4D), Kosova – Women 4 Women, IPKO Foundation, Iniciativa Kosovare për Stabilitet – IKS, RRGK, Balkan Green Foundation, EcoZ, Qendra për Arsim e Kosovës – KEC, ATRC, Let’s Do It Peja, OMM “Gjethi”, KFOS, DokuFest.   

 

 

 

Prishtinë, 20 tetor 2021 – Koalicioni ad-hoc i organizatave të shoqërisë civile dhe aktivistëve kanë mbajtur sot konferencë për media, me ç’rast është bërë publike që Kelkos heqë dorë nga paditë e pabaza për shpifje ndaj Shpresa Loshaj dhe Adriatik Gacaferi.

Avokatja Rina Kika përfaqësuese ligjore e aktivistëve tha se me datë 18 tetor është njoftuar zyrtarisht nga përfaqësuesit e Kelkos Energy për heqjen dorë nga paditë për shpifje ndaj aktivistëve mjedisorë Shpresa Loshaj dhe Adriatik Gacaferi. “Avokatët e Kelkos më kanë përcjellë njoftimet zyrtare për heqje dorë nga të dy paditë të cilat iu janë përcjellur Gjykatës Themelore të Pejës – Dega Deçan. Ata kanë hequr dorë nga të dy paditë, pa asnjë kusht dhe menjëherë”, tha Kika.

Sipas saj, me heqjen dorë nga këto dy padi u dëshmua ajo që e kemi thënë gjatë tërë kohës, se Kelkos e ka ditur se nuk mund të fitojë me këto padi të pabaza në gjykatë dhe se qëllimi asnjëherë nuk ka qenë që ata ta fitojnë procesin, qëllimi ka qenë frikësimi i aktivistëve që i kritikojnë operimet e kësaj kompanie. “Padi të tilla që tentojnë ta heshtin debatin publik për çështje të interesit publik siç është mbrojtja e ambientit janë të dëmshme dhe duhet të kundërshtohen fuqishëm nga të gjithë.” deklaroi ajo.

Ndërkaq, aktivistja Shpresa Loshaj, tha se Kelkosi na ka paditur duke menduar se do të jemi vetëm. “Ata menduan se ne do të jemi vetëm dhe do ta shterim energjinë duke u mbrojtur nga ta, por energjia për mbrojtjen e Lumbardhit është e pashtershme, falë mbështetjes së aktivistëve dhe qytetarëve nga e mbarë Kosova”.

Mexhide Demolli-Nimani, drejtore ekzekutive e Lëvizjes FOL tha se fatkeqësisht tashmë rastet e Padive Strategjike Kundër Pjesëmarrjes Publike apo paditë SLAPP, janë pjesë e Raportit Vjetor të Komisionit Evropian për Kosovën. “Në raportin vjetor për Kosovën të Komisionit Evropian vlerëson se gjatë vitit kishte rritje shqetësuese të Padive SLAPP të paraqitura në gjykata, padi këto të cilat përdoren për të kërcënuar dhe paditur gazetarët dhe aktivistët e shoqërisë civile në mënyrë që t’i frikësojnë ata”, tha ajo. Sipas saj, tërheqja e padive nga Kelkos vie si rezultat i kundërshtimit nga një numër i madh i organizatave dhe aktivistëve të shoqërisë civile në Kosovë, të cilët vazhdimisht kanë kërkuar nga Kelkos që të heqë dorë nga paditë ndaj aktivistëve. Madje edhe organizata ndërkombëtare për mbrojtjen e të drejtave të njeriut Amnesty International kishte kërkuar nga Kelkos në qershor të këtij viti që të tërhiqet nga paditë.

“Unë ju bëj thirrje të gjithë aktivistëve apo gazetarëve, të cilët ballafaqohen me paditë SLAPP që të paraqiten tek Lëvizja FOL, sepse ne, përmes një grupi avokatësh të cilët kanë ofruar shërbimet e tyre pro bono për këto raste. Ne poashtu në kuadër të ueb faqes së Lëvizjes FOL tashme kemi filluar të bëjmë dokumentimin e padive SLAPP”.

Aktivistët ishin paditur për shpifje për shkak të deklaratave që kritikonin kompaninë në lidhje me operimet e hidrocentraleve në Grykën e Deçanit. Kelkos në qershor të vitit të kaluar ka kërkuar nga Shpresa Loshaj 100,000 euro kompensim dëmi për kinse “dëmtim të imazhit” për shkak të deklaratave të saj. Ndërkaq, nga Adriatik Gacaferi kanë kërkuar 10,000 Euro kompensim dëmi për shkak të një postimi në Facebook në lidhje me futjen e ujit të lumit në gypat e hidrocentraleve.

Prishtinë, 15 tetor 2021 – FOL ka bërë monitorimin e realizimit të aktivitetve të cilat ishin paraparë të përfundonin në periudhën mars-shtator 2021 sipas Planit Vjetor të Punës së Qeverisë së Kosovës -15 Ministrive dhe Zyra e Kryeministrit. Nga 311 aktivitete të parapara për këtë periudhë kohore, kemi marrë përgjigjje vetëm për 267 aktivitete.

Zyra e Kryeministrit – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 16 aktivitete nga të cilat 5 janë përfunduar.

Ministria e Punëve të Jashtme dhe Diasporës – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 31 aktivitete, prej të cilave ka realizuar 5 nga këto aktivitete.

Ministria e Mjedisit, Planifikimit Hapësinor dhe Infrastrukturës – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 24 aktivitete, prej të cilave ka realizuar 5 nga këto aktivitete.

Ministria e Drejtësisë – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 26 aktivitete, prej të cilave ka realizuar 14 nga këto aktivitete.

Ministria e Zhvillimit Rajonal – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 28 aktivitete, prej të cilave ka realizuar 17 nga këto aktivitete.

Ministria e Arsimit, Shkencës, Teknologjisë dhe Inovacionit – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 11 aktivitete, prej të cilave ka realizuar 3 nga këto aktivitete.

Ministria e Ekonomisë – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 10 aktivitete, prej të cilave ka realizuar 4 nga këto aktivitete.

Ministria e Mbrojtjes – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 2 aktivitete, prej të cilave i ka realizuar të gjitha.

Ministria e Punëve të Brendshme – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 46 aktivitete, prej të cilave ka realizuar 18 nga këto aktivitete.

Ministria e Industrisë, Ndërmarrësisë dhe Tregtisë – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 42 aktivitete, prej të cilave ka realizuar 13 nga këto aktivitete.

Ministria e Administrimit të Pushtetit Lokal – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 8 aktivitete, prej të cilave ka realizuar 4 nga këto aktivitete.

Ministria e Financave, Punës dhe Transfereve – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 30 aktivitete, prej të cilave ka realizuar 5 nga këto aktivitete.

Ministrisa e Bujqësisë, Pylltarisë dhe Zhvillimit Rural – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 8 aktivitete, prej të cilave ka realizuar 4 nga këto aktivitete.

Ministrisa e Kulturës, Rinisë dhe Sportit – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 31 aktivitete, 7 janë realizuar.

Ministria e Shëndetësisë – në kuadër të Planit Vjetor të Punës së Qeverisë për periudhën mars-shtator 2021, ka paraparë të realizoj 32 aktivitete, 15 nga to janë realizuar.

Ministria për Kthim dhe Komunitete nuk ka paraparë asnjë aktivitet për periudhën mars-shtator 2021.

Prishtinë 12 tetor 2021 – Lëvizja FOL vazhdon serinë e debateve FOL Hapur me Ministra/e të Kosovës, ku sot i ftuari i radhës ishte ministri i Mjedisit, Planifikimit Hapësinor dhe Infrastrukturës z. Liburn Aliu.

Temë diskutimi ishte realizimi i Planit të Punës së Qeverisë për periudhën mars-shtator 2021, prioritetet si dhe sfidat me të cilat po ballafaqohet kjo ministri.

Ky diskutim u realizua me mbështetjen e programit MATRA të Ambasadës Holandeze në Kosovë dhe zbatohet në bashkëpunim me PIPS.

Prishtinë, 11 tetor 2021 – Sot në Odën Amerikane Lëvizja FOL dhe Democracy Plus organizuan sesionin informues për Portalin Prokurimi i Hapur dhe Flamujt e Kuq. Qëllimi i këtij eventi është informimi dhe bashkëbisedimi me përfaqësuses të biznesve, në lidhje me prokurimin publik në Kosovë, të dhënat e hapura, si dhe platformat që ofrojnë këto të dhëna, siç janë Portali Prokurimi i Hapur dhe Flamujt e Kuq. Ky sesion informues do të shërbejë për të promovuar platformat e lartëpërmendura dhe për nxitur hulumtimin e kontratave publike nga bizneset kosovare. Ky aktivitet u mbështet nga USAID Kosovo-Komuna Transparente, Efektive dhe Llogaridhënëse.

Obiliq, 8 tetor 2021 – Lëvizja FOL sot ka realizuar emisionin “Le t’flasim me komuna për prokurimin publik” në Paper Radio 91.1, ku të ftuar ishin Yllka Buzhala nga Lëvizja FOL dhe Sherif Hoti nga Zyra e Prokurimit në Komuna e Obiliqit- Faqja Zyrtare.
Tema e këtij emisioni ishte Prokurimi i publik në Komunën e Obiliqit dhe prezantimi i Portalit Prokurimi i Hapur dhe Transparent. Këto diskutime po organizohen me qëllim të informimit të publikut të gjerë në lidhje me transparencën dhe llogaridhënien mbi prokurimin publik në komunat e Kosovës.
Këto aktivitete u realizuan me përkrahjen e USAID përmes aktivitetit të Komunave Transparente, Efektive dhe Llogaridhënëse (USAID TEAM).

Në këtë infografikë paraqitet rrjetëzimi i cili ka për qëllim të tregoj ndërlidhjen në mes bizneseve dhe institucioneve, më specifikisht përmban të dhëna në lidhje me biznesin, pronarin dhe institucionin publik.

Në këtë infografikë mund të gjeni informata për mënyrat se si mund te gjinden kontratat në platformën Prokurimi i Hapur.

Gjakovë, 5 tetor 2021 – Sot në Gjakovë Lëvizja Fol dhe Democracy Plus organizuan sesionin informues për Portalin Prokurimi i Hapur dhe Flamujt e Kuq. Qëllimi i këtyre sesioneve që po organizohen nëpër qytetet e Kosovës është informimi dhe bashkëbisedimi me përfaqësues të shoqërisë civile dhe studentë në lidhje me prokurimin publik, të dhënat e hapura, si dhe platformat që ofrojnë këto të dhëna, siç janë Portali “Prokurimi i Hapur dhe Flamujt e Kuq”.

Këto organizime poashtu synojnë nxitjen e qytetarisë aktive për të monitoruar dhe kërkuar llogari për shpenzimin e parasë publike nga institucionet shtetërore. Ky aktivitet u mbështet nga USAID Kosovo-Komuna Transparente, Efektive dhe Llogaridhënëse.

Prishtinë, 4 tetor 2021 – Lëvizja FOL sot ka mbajtur debatin FOL Hapur me Ministra/e të Kosovës, ku sot në emër të ministrit Xhelal Sveçla prezente ishte Jeta Tela – shefe e kabinetit dhe Këshilltare e Lartë politike në Ministrinë e Punëve të Brendshme. Temë diskutimi sot ishte realizimi i Planit të Punës së Qeverisë për periudhën mars- shtator 2021, prioritetet si dhe sfidat të cilat me të cilat po ballafaqohet kjo ministri.

Ky diskutim realizohet me mbështetjen e programit MATRA të Ambasadës Holandeze në Kosovë dhe zbatohet në bashkëpunim me PIPS.

Prishtinë, 23 shtator 2021- Në vitin 2018 Lëvizja FOL kishte adresuar një Kërkesë për Qasje në Dokumente Publike në Ministrinë e Financave mbi procesin e vlerësimit të pronave përgjatë trasesë së ndërtimit të autostradës Prishtinë – Gjilan. Këto të dhëna përgjatë tërë kësaj periudhe, me gjithë insistimin e Lëvizjes FOL për publikimin e tyre, dhe përkundër ndërrimit të 3 partive në pushtet janë mbajtur të mbyllura për publikun.

Ministria e Financave gjatë kësaj periudhe me arsyetime të ndryshme ka mohuar qasjen tonë për t’u informuar rreth këtij procesi. Tek sot, pas një presioni publik tre-vjeçar si dhe pas ankesës në Agjencianë për Informim dhe Privatësi u arrit që FOL të ketë qasje në këto të dhëna.

Të dhënat e pranuara nga Ministria e Financave do të analizohen dhe do të bëhen publike në ditët në vijim.

Shpenzimi i parasë publike duhet të jetë transparent. Aty ku mungon transparenca ka dyshime për keqpërdorime.

Mitrovicë, 29 Shtator 2021 – Në Mitrovicë Lëvizja FOL dhe Democracy Plus sot kanë vazhduar serinë e sesioneve informuese për Portalin “Prokurimi i Hapur dhe Flamujt e Kuq”.

Aktivistët dhe përfaqësuesit e shoqërisë civile nga Mitrovica sot patën rastin që të njoftohen me mënyrën se si mund ta përdorin Portalin “Prokurimi i Hapur dhe Flamujt e Kuq” që të monitorojnë dhe kërkojnë llogari për shpenzimin e parasë publike nga institucionet shtetërore.

Ky aktivitet u mbështet nga USAID Kosovo-Komuna Transparente, Efektive dhe Llogaridhënëse.

 

 

 

Prizren, 28 shtator 2021 – Sot, në Prizren Lëvizja Fol dhe Democracy Plus organizuan sesionin informues për Portlalin “Prokurimi i Hapur dhe Flamujt e Kuq”.

Qëllimi i këtyre sesioneve që po organizohen nëpër qytetet e Kosovës është informimi dhe bashkëbisedimi me përfaqësues të shoqërisë civile dhe studentë në lidhje me prokurimin publik, të dhënat e hapura, si dhe platformat që ofrojnë këto të dhëna, siç janë Portali “Prokurimi i Hapur dhe Flamujt e Kuq”. Këto organizime poashtu synojnë nxitjen e qytetarisë aktive për të monitoruar dhe kërkuar llogari për shpenzimin e parasë publike nga institucionet shtetërore.
Ky aktivitet u mbështet nga USAID Kosovo-Komuna Transparente, Efektive dhe Llogaridhënëse.