Prishtinë, 9 qershor 2021 – Lëvizja FOL ka filluar me serinë e diskutimeve “FOL Hapur” me krerët e partive opozitare në vend.

I ftuar sot në Forumin FOL Hapur ishte Enver Hoxhaj, kryetar i Partisë Demokratike të Kosovës.

Gjatë këtij forumi u diskutuan temat:

– Opozita e PDK-së karshi Qeverisë Kurti 2 (me theks të veçantë Politika e Jashtme, Situata me Pandeminë Covid-19 dhe Sundimi i Ligjit)

– Qëndrimi i PDK-së për dialogun Kosovë – Serbi

– Zgjedhjet Lokale 2021 dhe reformimi i PDK-së në nivel lokal

Prishtinë, 10 qershor 2021 – Flutura Kusari, këshilltare ligjore në Qendrën Europiane për Liri të Shtypit dhe Medias, ishte ligjeruesja e dytë në serinë e ligjeratave mbi dispozitat ligjore dhe procedurat e hetimit në fushën e korrupsionit.

Kjo ligjeratë kishte në fokus paditë strategjike kundër pjesëmarrjes publike (SLAPP LaWsuits), padi të cilat kanë për qëllim të frikësimit dhe pengimit të pjesëmarrjes në diskutime publike të gazetarëve, aktivistëve, organizatave, akademikëve etj.

Prishtinë, 7 QERSHOR 2021 – Ne organizatat dhe aktivistët që janë shkruar më poshtë shprehim shqetësimet tona më të thella për parregullsitë dhe procedurat e ndjekura në përzgjedhjen e Komisionerit të 4-të të Informacionit dhe Privatësisë.

Paneli intervistues i Komisionit për Siguri dhe Mbrojtje të Republikës së Kosovës, i përbërë nga deputeti Fatmir Humolli, Shqipe Mehmeti Selimi, Mefail Bajqinovci, Enver Dugolli dhe Arbër Rexhaj nga Lëvizja Vetëvendosje, Erxhan Galushi nga Lëvizja Progresive e Romëve të Kosovës. dhe Slavko Simiq nga Lista Serbe të cilët intervistuan kandidatët më 7 qershor 2021.

Për këtë pozita kanë kandiduar Edon Myftari, Enver Bujari, Krenar Këpuska, Krenare Sogojeva Dermaku, Sadik Kryeziu dhe  Sogojeva Dermaku. Sadik Kryeziu u largua nga takimi disa minuta para se të fillonte intervista.

Deputetët e pranishëm kanë vlerësuar me më shumë pikë kandidatin Enver Bujari, gjithsej 69 pikë, kandidaten Krenare Sogojeva Dermaku me 63 pikë dhe kandidatin Edon Myftari me 61.5 pikë. Këta tre emra do t’i dërgohen Kuvendit për votim, pasi të miratohen nga Komisioni për Siguri dhe Mbrojtje të Republikës së Kosovës. Për të qenë Komisioner duhen gjithsej 61 vota.

Nga monitorimi i drejtpërdrejtë  i intervistave, besojmë se kandidati më i vlerësuar nuk ka performuar aq mirë sa dy kandidatët e tjerë. Z. Bujari ka kandiduar edhe në proceset e kaluara, por ekspertët britanikë që ndihmuan procesin e rekrutimit në 2019/2020 nuk e vlerësuan me pikë të mjaftueshme dhe nuk e rekomanduan për postin e Komisionerit për Informim dhe Privatësi.

Siç kemi bërë më parë me konkurset e tjera, kemi analizuar biografinë e çdo kandidati dhe kemi parë se biografia që ka paraqitur z.Bujari në këtë proces nuk është e njëjtë me biografinë që ka paraqitur në proceset e tjera më parë.

Bazuar në biografinë që ka dorëzuar në vitin 2019 në Kuvendin e Kosovës, z.Bujari ka deklaruar se ka qenë drejtor i Njësisë së Hetimit për Narkotikë në periudhën 2006-2019, në biografinë e dorëzuar në vitin 2020 ka deklaruar se ka punuar. në atë pozitë në periudhën 2009-2020 ndërsa në biografinë që ka dorëzuar në vitin ka deklaruar se ka punuar në atë pozitë në periudhën 2009-2019. Gjithashtu, në biografitë e tjera të dorëzuara ka mospërputhje në datat e studimit. Bazuar në biografinë e parë dhe të dytë ai u diplomua në Fakultetin e Shkencave Politike dhe Administratës Publike në Kolegjin “Fama” për dy vjet (2010-2012), ndërsa në bazë të biografisë së tretë u diplomua për tre vjet në një periudhë krejt të ndryshme kohore. (2007-2010). Gjithashtu, ka ndryshuar tre herë datat në të cilat ka kryer studimet në degën e inxhinierisë, duke përfshirë edhe emrin e institucionit arsimor. Ne shprehim shqetësimin tonë se paneli i rekrutimit nuk e ka verifikuar këtë informacion.

Më tej, gjatë intervistës paneli nuk mori parasysh metodologjinë e krijuar nga ekspertët britanikë. Pyetjet u formuan pa praninë e monitoruesve të shoqërisë civile, ndryshe nga proceset e tjera kur ne ishim të ftuar për të qenë pjesë e procesit. Gjithashtu herë të tjera deputetët vlerësuan në mënyrë transparente, duke shpallur pikët e vlerësimit pas çdo interviste dhe duke arsyetuar për vlerësimi i bërë. Këtë herë deputetët vlerësuan kandidatët në mënyrë anonime pa dhënë arsye për pikët e dhëna. Në fund u shpallën vetëm pikët totale të vlerësimit për secilin kandidat.

Ne gjithashtu ritheksojmë shqetësimin tonë për përbërjen e panelit të intervistës. Me propozim të Lëvizjes Vetëvendosje, paneli përbëhet nga të gjithë anëtarët e Komisionit dhe jo vetëm një përfaqësues i partive politike, siç është praktika parlamentare. Kjo qasje ka formuar një precesion negativ dhe ka ndikuar drejtpërdrejt në humbjen e legjitimitetit të të gjithë procesit të përzgjedhjes së Komisionerit. Partitë në pushtet nuk kanë arritur të arrijnë një konsensus për të mbajtur partitë opozitare të përfshira. Në të njëjtën kohë, konsiderojmë se opozita ka detyrim të përfaqësojë interesat e zgjedhësve të saj duke marrë pjesë në Kuvend dhe duke dhënë kontributin e saj.

Nga sa u tha më sipër, konsiderojmë se ky proces ka qenë jotransparent në zhvillimin e aktiviteteve të tij dhe joprofesional në intervistim, për çka nuk duhet të vazhdojë. U bëjmë thirrje deputetëve të përsërisin konkursin, duke u siguruar që transparenca dhe profesionalizmi të jenë vlerat e procesit të ri.

FOL

Flutura Kusari

GLPS

KDI

KCSF

Çohu

D4D

GAP

[1] https://www.kosovoselection.org/outcomes-19

Prishtinë, 04 qershor 2021 – Lëvizja FOL dhe media më kredibile online në Kosovë, Telegrafi.com sot kanë nënshkruar marrëveshjen për ofrimin e portalit Prokurimi i Hapur dhe Transparent.

Gjatë ceremonisë së nënshkrimit të kontratës, u tha se ky portal do të ofrojë qasje të lehtë për gjetjen e informatave që kanë të bëjnë me shpenzimin e parasë publike.

Drejtoresha ekzekutive e Lëvizjes FOL, Mexhide Demolli tha se kjo platformë lexuesit do t’i ofrojë transparencë për secilën kontratë të nënshkruar.

“Lëvizja FOL që nga viti 2010, pjesë të programit ka pasur edhe pjesën e prokurimit publik, ndërsa në viti 2018 kemi lansuar platformën për ‘prokurim të hapur dhe transparent’. Kjo platformë përmban të dhëna dhe kontrata nga institucionet e shtetit nga viti 2018 e tutje.

Arsyeja se pse e kemi nënshkruar sot këtë kontratë me Telegrafin ka të bëjë me jetëgjatësinë e këtij portali. Mendojmë që një bashkëpunim i tillë do ta mbajë gjallë këtë portal. Ne si FOL do të vazhdojmë t’i përditësojmë të dhënat, ndërsa Telegrafi do ta përdorë pjesën e saj që të bëjë më shumë hulumtime për sa i përket prokurimit publik, duke iu referuar kontratave që portali ofron”, tha Demolli.

Ndërsa, kryeredaktori i Telegrafit, Muhamet Hajrullahu u shpreh se janë të përkushtuar për të avancuar raportimet që kanë të bëjnë me shpenzimet e parasë publike. “Ne si Telegraf jemi shumë të përkushtuar për të avancuar raportimet që kanë të bëjnë me shpenzimet e parasë publike, me çështjen e tenderëve në Kosovë dhe mbi të gjitha me shpenzimet e taksave të qytetarëve. Mendojmë që me këtë marrëveshje të nënshkruar me Lëvizjen FOL, të avancojmë raportimin në Telegraf dhe të kemi informata që kanë të bëjnë me prokurimin publik.

Po ashtu të marrim informata që kanë të bëjnë me transparencën dhe mbi të gjitha mos të harrojmë që Telegrafi si media serioze ka një audiencë të madhe në Kosovë dhe ne mendojmë që këtë raportim ta avancojmë duke bashkëpunuar me organizata, si kjo me FOL-in”, u shpreh Hajrullahu.

Lëvizja FOL në vitin 2018 kishte lansuar portalin “Prokurimi i Hapur dhe Transparent”. Qëllimi i këtij portali është të ju sigurojë institucioneve, gazetarëve dhe përfaqësuesve të shoqërisë civile informata në mënyrë që të shohin se si shpenzohet buxheti i shtetit. Në të njëjtën kohë, hulumtimet në fushën e prokurimit publik bëjnë që institucionet publike në mënyrë të vazhdueshme të përmirësojnë këtë fushë.

Telegrafi.com është portal i pavarur i lajmeve në gjuhën shqipe i themeluar në vitin 2006, me bazë kryesore në Prishtinë dhe seli të dytë në Maqedoni. Telegrafi për më shumë se një dekadë ka arritur të ruajë paanshmërinë dhe të jetë burim i lajmeve me kredibilitetin më të lartë në të gjithë trevat shqipfolëse.

Prishtinë, 3 qershor 2021 – Lëvizja FOL, Debate Center dhe Internews Kosova, kanë filluar serinë e ligjeratave mbi dispozitat ligjore dhe procedurat e hetimit në fushën e korrupsionit. Labinot Leposhtica nga Kallxo.com, ishte ligjëruesi i parë në këtë seri.

Ligjerata e z. Leposhtica kishte në fokus politikat ndëshkimore në rastet e korrupsionit nga gjykatat e Kosovës. Fokus i veçant ka qenë rregullimi i praktikës ndëshkimore sipas Kodit Penal, Kodit të Procedurës dhe Udhëzuesit të Politikës Ndëshkimore.

Kjo seri do të zhvillohet në dy forma, në atë virtuale dhe fizike, përgjatë 10 javëve të ardhshme.

Ky projekt mbështetet nga Departamenti i Shtetit Amerikan, përmes Byrosë së Narkotikëve Ndërkombëtar dhe Çështjeve të Zbatimit të Ligjit (INL).

Prishtinë, 02 qershor 2021 – Lëvizja FOL ka filluar me serinë e diskutimeve në një format tjetër Forumin FOL Hapur me krerët e partive opozitare.
I ftuari i parë në Forumin FOL Hapur ishte Lumir Abdixhiku kryetar i Lidhjes Demokratike të Kosovës.

Gjatë këtij forumi u diskutuan temat:

– Opozita e LDK-së karshi Qeverisë Kurti 2(me theks të veçantë Politika e Jashtme, Situata

me Pandeminë Covid-19 dhe Sundimi i Ligjit)

– Qëndrimi i LDK-së për dialogun Kosovë – Serbi

– Zgjedhjet Lokale 2021 dhe reformimi i LDK-së në nivel lokal

FOL do të vazhdoj me organizimin e debateve me opozitën. Debatin e plotë mund ta gjeni në këtë link: https://www.facebook.com/fol.levizja/videos/3906996856021777

Prishtinë, 21 maj 2021 – Lëvizja FOL me mbështetjen e Ambasadës së Mbretërisë së Holandës në Kosovë, ka publikuar sot raportin “Efikasiteti i Avokaturës Shtetërore gjatë vitit 2020”, i cili përfshinë të dhënat në lidhje me rëndësinë, funksionin dhe punën e institucionit të Avokaturës Shtetërore gjatë vitit 2020.

Mexhide Demolli – Nimani, Drejtoreshë Ekzekutive në Lëvizjen FOL, tha se FOL me mbështetjen e Ambasadës Holandeze në Kosovë ka monitoruar punën e Avokaturës Shtetërore për vitin 2020. “Ky Institucion ka një rëndësi të veçantë, sepse mbron shtetin nga paditë e ndryshme që mund ti ketë qoftë nga individ apo edhe kompani. Nga efikasiteti i punës së këtij institucioni mund të mbrohen miliona euro të buxhetit të shtetit, njësoj sikurse nga dështimi i tyre mund të humbin miliona”, tha Demolli-Nimani.

Albana Hasani, hulumtuese në Lëvizjen FOL, tha se gjatë periudhës janar-dhjetor 2020  janë krijuar gjithsej 2,180 lëndë të reja në rastet ku palë kanë qenë institucionet shtetërore të përfaqësuara nga Avokatura Shtetërore. Sipas saj, numri më i madh i këtyre lëndëve ishin nga procedura jo-kontestimore (708 lëndë), duke u pasuar nga lëndët e procedurës administrative (632 lëndë), nga procedura kontestimore (599 lëndë), lëndët e procedurës përmbarimore (174 lëndë) dhe në fund, nga lëndët e procedurës penale (68 lëndë). “Nga aktgjykimet e marrura në vitin 2020, Avokatura Shtetërore i kishte fituar 516 lëndë, 431 lëndë i kishte humbur, ndërsa 99 lëndë ishin kthyer ne rigjykim, 25 lëndë në rishqyrtim dhe 98 lëndë në rivendosje. Nga këto përfaqësime, institucionet e Republikës së Kosovës kishin fituar gjithsej 12.8 milion euro. Ndërkaq shuma e paguar nga institucionet shtetërore palëve që kanë pasur sukses në kontestet gjyqësore në vitin 2020 ishte 3.5 milion euro”, tha Hasani. “Rekomandojmë që të rritet transparenca e Avokaturës Shtetërore në ueb-faqen zyrtare të Ministrisë së Drejtësisë, duke i paraqitur të gjitha informatat dhe dokumentet e karakterit publik, meqenëse ka mungesë të madhe të publikimit të tyre” ka përfunduar Hasani.

Sami Istrefi, Avokat i Përgjithshëm Shtetëror, tha  që duke marrë parasysh rolin dhe funksionin që ka ky institucion është mirë i mbuluar me akte ligjore dhe se prioritet ky institucion ka, është që të jetë sa më i hapur në punën që bëjnë. “Si institucion i pavarur dhe me rol mjaft të rëndësishëm, ne ballafaqohemi me sfida të mëdha të cilat afektojnë edhe punën e tonë. Nisur nga numri i madh i lëndëve, mbi 20 mijë dhe numri i vogël i stafit, gjithsej 9 avokatë. Z.Istrefi theksoi nevojën për rritjen e numrit të avokatëve si dhe stafit mbështetës, pasi momentalisht në ketë institucion nuk ka as bashkëpunëtorë profesional  si dhe nevojën për trajnime të cilat mungojnë për avokatët e avokaturës shtetërore”, tha Istrefi. Sipas tij, shqetësuese vazhdon të jetë mungesa e bashkëpunimit të mirëfilltë me institucionet përkatëse, të cilat paditen, sfidë kjo që po ndikon në punën e këtij institucioni dhe humbjen e rasteve, me ç’rast shtetit i shkaktohen dëme të mëdha financiare.

Raportin e plotë e gjeni në këtë link: http://levizjafol.org/wp-content/uploads/2021/05/EFIKASITETI-I-AVOKATUR%C3%8BS-SHTET%C3%8BRORE.pdf

Prishtinë, 20 korrik 2021 – Lëvizja FOL me mbështetjen e USAID Komuna Transparente, Efektive dhe Llogaridhënëse ka ndarë sot çmimin për gazetarë “FOL për prokurim”.

Lëvizja FOL që nga viti 2010 monitoron prokurimin publik në Kosovë. Në kuadër të punës së saj në vitin 2018 kishte lansuar Portalin Prokurimi i Hapur dhe Transparent. Qëllimi i këtij portali është të ju sigurojë institucioneve, gazetarëve dhe përfaqësuesve të shoqërisë civile informata në mënyrë që të shohin se si shpenzohet buxheti i shtetit. Në të njëjtën kohë, hulumtimet në fushën e prokurimit publik bëjnë që institucionet publike në mënyrë të vazhdueshme të përmirësojnë këtë fushë.

Mexhide Demolli – Nimani, Drejtore Ekzekutive e Lëvizjes FOL, theksoi se prokurimi publik përbën afërsisht 10% të Bruto Prodhimit të Brendshëm së Kosovës. Çdo vit, rreth 30% e buxhetit të shtetit shpenzohet përmes prokurimit publik, kurse luftimi i korrupsionit dhe keqpërdorimeve të ndryshme në këtë fushë vazhdon të jetë një sfidë e madhe. Znj. Demolli – Nimani tha se “raportimi për prokurimin publik nga gazetaret është i një rëndësie të veçantë. Andaj, për të inkurajuar gazetarinë hulumtuese në fushën e prokurimit publik, FOL sot ndanë tre çmime për artikujt e botuar nga gazetarë hulumtues në këtë fushë, të cilët kanë paraqitur parregullsi dhe keqpërdorime përmes procedurave të prokurimit publik”.

Zëvendës drejtoresha e Zyrës për Demokraci dhe Qeverisje në USAID në Kosovë, Christine Danton, tha se ndihet krenare që sot, po ndahen çmime për të nderuar tre gazetarë, që me zell kanë kërkuar, kanë hulumtuar, si dhe kanë informuar publikun për keqmenaxhimin potencial të fondeve publike. “Gazetarë që me punën e tyre, kanë ngritur zërin për prokurimin publik, kanë ngritur zërin për qytetarët, të cilët mbështeten tek këto mallra e shërbime. Fituesit e sotëm të këtyre çmimeve janë heronj të vërtetë, puna e tyre ka hedhur dritë në rastet e dyshuara për mashtrime e keqpërdorime, si dhe ka ndihmuar në kërkimin e llogaridhënies nga qeveria. Portali i Prokurimit të Hapur dhe Transparent, i krijuar tri vjet më parë, nga Lëvizja Fol, mundësuar nga USAID, ka ndihmuar këta gazetarë dhe shumë të tjerë, sepse afro 50.000 persona e kanë vizituar portalin si dhe kanë kryer hulumtimet e tyre në mbi 15.000 kontrata, me informata për 270 blerës dhe mbi 3200 furnizues në Kosovë. Kur të dhënat komplekse të prokurimit bëhen lehtësisht të kërkueshme dhe të qasshme, ky portal transparence ndihmon OSHC-të, gazetarët hulumtues, sektorin privat si dhe organet vëzhguese të sektorit publik për llogaridhënie” tha Danton, duke shtuar se Qeveria Amerikane është e përkushtuar të mbështesë Kosovën në luftën e saj kundër korrupsionit. “Kur sistemi i prokurimit publik funksionon mirë, si dhe është transparent e llogaridhënës, qytetarët përfundimisht përfitojnë, e ky është synim i secilit vend demokratik”, tha ajo.

Çmimi i parë “FOL për Prokurim” iu nda autores Dorentina Kastrati nga Kallxo.com, për storien “Tenderi i dyshimtë për familjen e ministrit”. Ky hulumtim tregon për favorizime partiake dhe familjare gjatë një procesi të tenderimit në vlerë prej 400 mijë eurove, duke u bërë edhe shkelje ligjore. Hulumtimi tregon se si Komuna e Malishevës i kishte dhënë tenderin për ndërtimin e një shkolle në këtë komunë, kompanisë së vëllait të ministrit të Tregtisë dhe Industrisë. Se ka pasur parregullsi gjatë këtij procesi tenderues e ka konstatuar dy herë edhe

Organi Shqyrtues i Prokurimit. Hulumtimi po ashtu, tregon se janë bërë edhe manipulime me dokumente nga autoriteti kontraktues në dëm të kompanive që kanë garuar, me qëllim që të favorizohet kompania e vëllait të ministrit. Autorja tha se hulumtimi në fushën e prokurimit shërben si shembull se si brenda një tenderi ka shumë shkelje të cilat kanë lidhje qoftë politike apo familjare. Ndër të tjera, fituesja tha se përmes hulumtimeve të tilla, ju mundësojmë prokurorive të merren me shkelje të tilla, si dhe se të tilla hulumtime janë shumë më të lehta marrë parasysh lehtësimin që na ipet nga çasja në dokumente publike nga portali OPTP.

Çmimi i dytë iu nda autorit Besnik Krasniqi nga Koha Ditore, për shkrimin “Dallavere për hava”. Ky hulumtim ka treguar se si institucionet e Kosovës kanë paguar mbi një milion euro për më shumë se 2,200 bileta avioni, pa pranuar nga kontraktuesi dëshmi të besueshme që tregojnë nëse çmimi i tyre ishte real, ose nëse biletat ishin shfrytëzuar. Pas publikimit të hulumtimit, policia e krimeve ekonomike ka nisur një hetim për këtë rast. Autori tha se duhet t’i largojmë maskat në rastet e prokurimit për t’u treguar sa më real dhe se një falemnderim i takon shoqërisë civile të cilët punojnë në këtë rrugëtim.

Ndërkaq, çmimi i tretë iu nda bashkëautorëve Valon Fana dhe Vyrtyte Gërvalla, për shkrimin “Komuna e Gazmend Muhaxherit kurdis tenderin për familjarët e Ramiz Kelmendit”. Ky hulumtim ka trajtuar një dukuri që ndodh kohë pas kohe në prokurimin publik Në Kosovë. Hulumtimi tregon se si është favorizuar një familje biznesmenësh në procesin tenderues për furnizim me produkte ushqimore për familjet në nevojë, mirëqenia e të cilëve është rënduar për shkak të pandemisë COVID-19. Pas publikimit të hulumtimit, Prokuroria Themelore në Pejë, ka nisur hetimet lidhur me këtë çështje. Autorët thanë se të punuarit në këtë drejtim dhe të vlersuarit me këtë çmim, mbetet një ndjenjë e veçantë dhe se do të vazhdojnë punën e tyre hulumtuese në prokurim.

Prishtinë, 18 maj 2021 – Ne, organizatat e poshtëshënuara, jemi duke e monitoruar për herë të katërt procesin e përzgjedhjes së Komisionierit/es të Agjencisë për Informim dhe Privatësi (AIP), duke kontribuar në vazhdimësi në zhvillimin e një procesi të drejtë dhe parandalimin e zgjedhjes së kandidatëve jo-meritorë. Përmes këtij reagimi shprehim shqetësimin tonë për vendimin e fundit të Komisionit i cili përcakton që secili anëtar i këtij Komisioni të jetë pjesëmarrës në Panelin Përzgjedhës për vlerësimin dhe përzgjedhjen e listës së ngushtë të kandidatëve për zgjedhjen e Komisionerit/es të Agjencisë për Informim dhe Privatësi (AIP). Ky vendim u mor në mbledhjen e mbajtur me 20.04.2021 me 6 (gjashtë) vota PËR dhe 2 (dy) vota KUNDËR.

Përzgjedhja e këtij Paneli është rregulluar me Ligjin për Mbrojtjen e të Dhënave Personale, përkatësisht me nenin 60 të këtij ligji.

Sipas paragrafit 5 të këtij neni, Paneli Përzgjedhës ia dorëzon Komisionit përkatës listën e kandidatëve për Komisioner/e, për të proceduar pastaj me zgjedhjen e listës së ngushtë. Propozimi i Komisionit përmban arsyetimin përse Paneli u ka dhënë përparësi disa kandidatëve, në krahasim me kandidatët tjerë.

Kjo nënkupton që në rastin konkret, listën e ngushtë të kandidatëve për Komisioner/e të Agjencisë për Inforomim dhe Privatësi, Paneli Përzgjedhës do t’ia dorëzonte dhe arsyetonte vetvetes.

Ky veprim i deputetëve të këtij Komisioni, përveç që bie ndesh me praktikën e mëhershme të vendosur nga anëtarët e Komisionit të legjislaturave të kaluara, krijon një precedent negativ që do të ndikonte drejtpërdrejt mbi legjitimitetin e tërë procesit të përzgjedhjes së Komisionerit të Agjencisë për Informim dhe Privatësi.

Bazuar në përfaqësimin politik të anëtarëve të këtij Komisioni, përbërja e Panelit Përzgjedhës nga secili anëtar i këtij Komisioni do të krijonte situatë presupozuese të përzgjedhjes së listës së ngushtë të kandidatëve për Komisioner/e të Agjencisë për Informim dhe Privatësi duke u bazuar në prapavija politike të kandidatëve, dhe jo duke u bazuar në përgatitjen e tyre profesionale.

Prandaj, duke marrë parasysh parimet e shëndosha demokratike të vendosjes dhe procedurat analoge parlamentare, bëjmë thirrje të tërheqjes të këtij vendimi, në mënyrë që në Panelin Përzgjedhës të kandidatëve për pozitën e Komisionerit të mos jenë të gjithë anëtarët e Komisionit për Çështje të Sigurisë dhe Mbrojtjes, por në Panel të përzgjedhet nga një anëtar për secilin subjekt politik/grup parlamentar të përfaqësuar në Komision.

 Lëvizja FOL

Flutura Kusari

Instituti GAP

Grupi për Studime Juridike dhe Politike(GLPS)

Instituti Demokratik i Kosovës (KDI)

Fondacioni Kosovar për Shoqëri Civile(KCSF)

Instituti Demokraci për Zhvillim(D4D)

Organizata ÇOHU

Prishtinë, 11 maj 2021 – Lëvizja FOL ka mbajtur debatin e radhës FOL Hapur me Ministra/e të Kosovës. E ftuara e radhës ishte ministrja e Arsimit, Shkencës, Teknologjisë dhe Inovacionit znj. Arbërie Nagavci.

Gjatë këtij takimi është diskutuar rreth planifikimit të Planit të Punës së Qeverisë për vitin 2021, gjegjësisht aktivitetet të cilat i ka caktuar Ministia e Arsimit në planin e punës, punën, prioritetet si dhe sfidat të cilat e presin ministrinë Arsimit, Shkencës, Teknologjisë dhe Inovacionit gjatë këtij mandati.

Znj.Nagavci prezantoi disa nga prioritetet që kjo ministri ka caktuar për vitin 2021, ku prioritet i tyre ishte menaxhimi i situatës me pandemin në afat të shkurtër.

Ajo tha se ne kemi përcaktuar 5 qëllime strategjike të cilat janë publike tashmë dhe janë në programin tonë qeverisës dhe shpalosi disa nga to.

• Duke filluar me arsimin gjithpërfshirës dhe të digjitalizuar
• Harmonizimin e shkollave profesinale me tregun e punës
• Menaxhimin e cilësisë në arsimin e lartë
• Edukimi i hershëm – Shpërndarja e shujtës, largimi i vlerësimit me notë
• Resurset humane
• Arsimi dhe aftësimi profesional

Gjatë këtij debati u pranuan dhe pyetje të ndryshme nga gazetarët si dhe nga ndjeksit online.

Prishtinë, 7 maj 2021 – Lëvizja FOL ka organizuar sot tryezë diskutimi, me ç`rast ka publikuar raportin “Realizimi i Planit të Punës së Këshillit Prokurorial të Kosovës (KPK) dhe Prokurorit të Shtetit (PSH) për vitin 2020”.

Mexhide Demolli-Nimani, drejtoreshë Ekzekutive e Lëvizjes FOL, tha se duke marrë parasysh rëndësinë dhe peshën e madhe të përgjegjësisë së bartësve të institucioneve të sistemit prokurorial, monitorimi dhe analizimi i punës së këtyre institucioneve është i një rëndësie të veçantë për shoqërinë civile. Andaj, sipas saj, Lëvizja FOL gjatë këtyre muajve ka monitoruar nivelin e realizimit të Planit të Punës së Këshillit Prokurorial të Kosovës si dhe të Prokurorit të Shtetit për vitin 2020 pa u lëshuar në analizën e cilësisë dhe efektshëmrisë së tyre por vetëm në aspektin kuantitativ.

Albana Hasani, Hulumtuese në Lëvizjen FOL, tha se Plani i Punës së Këshillit Prokurorial të Kosovës për vitin 2020, duke u bazuar në përgjigjjet e pranuara nga ky institucion, ka arritur të realizohet rreth 81 % nga ana e këtij institucioni. Ndërkaq, sipas përgjigjjeve të pranuara nga ana e Prokurorit të Shtetit, Plani i Punës së Prokurorit të Shtetit ka arritur të realizohet rreth 97 %.

Sipas Hasanit, publikimi i të dhënave në lidhje me punën dhe aktivitetet e këtyre institucioneve në ueb-faqen zyrtare të Sistemit Prokurorial vazhdon të mbetet shqetësuese. Sipas saj, nga 143 aktivitete të realizuara të KPK-së, në ueb faqen zyrtare të saj ky institucion ka publikuar të dhëna për realizimin e vetëm 18 aktiviteteve, apo vetëm për 13 % të tyre, ndërkaq nga të gjitha aktivitetet e realizuara të Planit të Punës së PSh-së, ky institucion ka publikuar vetëm 2 aktivitete.

“Kjo pra mbetet një prej sfidave të këtyre institucioneve në këtë drejtim, dhe se pa dyshim se publikimi i vazhdueshëm i aktiviteteve që realizohen, do të ndikonte në rritjen e transparencës së këtyre institucioneve dhe në fuqizimin e besimit të publikut në punën e Sistemit Prokurorial në përgjithësi”, tha Hasani.

Jetish Maloku, Kryesues i Këshillit Prokurorial të Kosovës, tha se kanë arritur që të përmbushin planin e punës në përpikëri, duke shtuar se pandemia ka prolonguar disa prej aktiviteteve.

“Ne kemi parasysh rrethanat në vitin 2020, për fat të keq pandemia ka qenë guri më i rëndë në Këshill, ka ndikuar negativisht në punën tonë. Nuk ka dilemë se një staf të përgjysmuar ka ndikuar në azhurnimin e aktiviteteve tona me planin e punës për vitin 2020”, tha Maloku.

“Unë jam i lumtur që e shoh këtë shifër 81%. Këto të gjetura do t’i marrim seriozisht dhe do të futen raport ku ka vend do t’i përmirësojmë”, përfundoj Maloku.

Bahri Hyseni nga Prokurori i Shtetit, tha se raporti i FOL-it është tejet real dhe do të ndikojnë në avancimin e punës së tyre në përgjithësi.

Ai më pas tha se, edhe përkundër që kanë punuar me staf të përgjysmuar për shkak të pandemisë, kanë arritur që të sekuestrohen afër 20 milionë euro, të shënjëstrohen 9 raste për korrupsion e të ngriten 10 aktakuza. “Viti 2020 është i veçantë dhe do të kisha dëshirë që të gjitha aktivitet të realizohen, por kemi pasur probleme. Avancimi i llogaridhënies vazhdon gjatë gjithë kohës”, tha Hyseni.

“Te prokurori nuk ka parashkrime, 50 mijë lëndë janë përfunduar. Edhe pse me staf të reduktuar kemi arritur 113% për të kryer më tepër lëndë se që na kanë ardhur. Forcimi i luftës kundër korrupsionit, 20 milion euro janë sekuestruara, por problem e kemi konfiskimin. Vetëm këtë muaj rreth 20 milionë euro ka sekuestruar Prokuroria”, përfundoi Hyseni.

Prishtinë, 05 maj 2021 – Lëvizja FOL ka mbajtur debatin e radhës FOL Hapur me Ministra/e të Kosovës. Gjatë këtij takimi është diskutuar rreth planifikimit të Planit të Punës së Qeverisë për vitin 2021, gjegjësisht aktivitetet të cilat i cakton ministria e Drejtësisë në këtë plan, punën, prioritetet si dhe sfidat të cilat e presin ministren znj. Albulena Haxhiu gjatë këtij mandati.

Gjatë këtij debati znj. Haxhiu prezantoi disa nga prioritetet që ministria e Drejtësisë ka caktuar në Planin e Punës për vitin 2021, plan i cili sipas saj do të miratohet me 7 maj në Qeveri.

Prioritetet e planit të punës së kësaj ministrie janë: Rishikimi Funksional i Sistemit të Drejtësisë, Vetingu në sistemin gjyqësor, Ligji për Konfiskimin e pasurisë së fituar në mënyrë të paligjshme, Dhuna në Familje, Krimet e Luftës, Themelimi i Instituti për krimet e luftës në Kosovë.

FOL do të vazhdoj me organizimin e debateve me ministra/e gjatë muajit maj.

Fjalimi i ministres Haxhiu;

Debatet FOL Hapur me ministra/e realizohen me mbështetjen e programit MATRA të Ambasadës Holandeze në Kosovë dhe zbatohet në bashkëpunim me PIPS.

Prishtinë, 30 prill 2021 – Lëvizja FOL ka pritur sot në një takim miqësor Shefin e Misionit të EULEX-it në Kosovë, z. Lars-Gunnar Wigemark. Në këtë takim u diskutua rreth aktiviteteve të ndërmarra dhe çështjeve që Lëvizja FOL ka ngritur dhe për të cilat ka avokuar në vazhdimësi.  Fokus i veçantë iu dha aktiviteteve dhe punës së Lëvizjes FOL në fushën e sundimit të ligjit, luftës ndaj korrupsionit, si dhe mbi ndikimin e pandemisë COVID-19 në realizimin e projekteve.

Shefi i Misionit të EULEX-it z. Wigermark, shprehi mirënjohje dhe inkurajim për punën e Lëvizjes FOL, dhe ofroi mundësinë e bashkëpunimit lidhur me çështjen e sundimit të ligjit dhe luftimin e korrupsionit.

Prishtinë, 22 prill, 2020 – Lëvizja FOL ka filluar sot me serinë e debateve në forumin FOL Hapur me ministra. I ftuari i parë në Forumin FOL Hapur, ishte z. Elbert Krasniqi, ministër në Ministrinë e Administrimit të Pushtetit Lokal.

Qëllimi i këtij diskutimi dhe diskutimeve tjera që do ti mbajmë me ministra në ditët në vijim do të jetë rreth prioriteteve në Programin Qeveritar, me fokus Plani vjetor i Punës së Qeverisë për vitin 2021.

Në fjalimin e z. Elbert Krasniqi, mund të shihni disa nga prioritetet e kësaj ministrie si dhe premtimet për 100 ditëshin e punës së tij.

Fjalimi për FOL Hapur

E nderura znj. Demolli – Nimani,

Të nderuar/a përfaqësues të mediave,

Të nderuar/a të pranishëm.

Më lejoni që fillimisht të ju falënderojë për ftesën, për mu dhe ministrinë që drejtojë është nder e vlerë e madhe prania ime sot në këtë format të diskutimit. Me lejoni të fillojë fjalinë time me zotimin dhe prioritetin e parë që MAPL nën udhëheqjen time e ka dhe do ta ketë e ai është bashkëpunimi me shoqërinë civile. Është jashtëzakonisht e rëndësishme që përpos pasqyrës institucionale ta kemi edhe perspektiven kritike e analitike nga organizatat e shoqërisë civile për zhvillimin dhe avancimin e pushtetit lokal në Republikën e Kosovës.

Ministria e Administrimit të Pushtetit Lokal – MAPL ka përgatitur draftin e planit qeveritar strategjik dhe operacional për vitet 2021-2025. Në këtë plan për këtë periudhë kohore parashihen të arrihen në mes tjerash katër qëllime strategjike për avancimin pushtetit lokal në Republikën e Kosovës. Ky plan është i bazuar në skanimin e gjendjes aktuale dhe si derivat i një procesi gjithëpërfshirës brenda ministrisë.

Prioritet kryesor i MAPL-së është mbështetja e komunave për menaxhimin dhe luftimin e pandemisë COVID – 19. Për këtë jemi në përfundim të procedurave së bashku me Ministrinë e Shëndetësisë për ndarjen e një fondi emergjent sidomos për furnizmin e komunave me barna nga lista esenciale.

Ne kemi përgatitur dhe planifikuar qëllimet strategjike ku duhet intervenim i menjëhershëm dhe atë brenda 100 ditëshit të parë të kësaj qeverie. Ndërhyrja e parë duhet të bëhet në reformën e kornizës ligjore për pushtetin lokal dhe atë përmes plotësim ndryshimit dhe hartimit të kornizës së re ligjore që ndërlidhet me administrimin e pushtetit lokal. Gjatë këtij 100 ditëshi ne do të arrijmë që të plotësojmë ndryshojmë dy ligje bazike për pushtetin lokal atë të Vetëqeverisjes Lokale (LIGJI NR. 03/L-040) dhe ligjin mbi Financat e Pushtetit Lokal (LIGJI NR. 03/L-049). Ndërsa do të përfundojmë koncept dokumentet për dy ligjet e reja përkatësisht Ligjin për Grantin e katërt Qeveritar dhe Ligjin për Grantin e Përformancës së Komunave. I pari si derivat i premtimit tonë elektoral dhe i dyti si derivat i një procesi të gjatë ku MAPL së bashku me donatorë ndërkombëtarë kanë bërë vlerësimin dhe ofrimin e granteve për komuna në bazë të performancës së tyre vjetore.

Pandemia COVID 19 ka ndikuar edhe në rrafshin lokal, përkatësisht në dy nivele në atë publik dhe privat. Në sektorin publik, ndikimi ka qenë në kufizimin e mundësisë për investime publike, në ofrimin e kufizuar të shërbimeve publike dhe administrative, pamundësinë e komunave në ndërmarrjen e procedurave të prokurimit publik, anulimin e takimeve të organeve kolektive komunale, si dhe anulimin e konsultimeve publike. Ndërsa, në sektorin privat, më të prekur janë sektori i ndërtimtarisë, hotelerisë, gastronomisë, tekstilit si dhe pjesa më e madhe e shërbimeve. Për të pasur një pasqyrë të saktë të ndikimit të pandemisë COVID 19 në rrafshin lokal, MAPL ka planifikuar të realizojë një studim në secilën komunë përkatësisht në 38 komunat e Republikës së Kosovës për të identifikuar dhe adresuar secilin problem qe pandemia ka shkaktuar. Pra, ky do të jetë një dokument publik orientues për politikat publike në lidhje me ndikimin e pandemisë COVID 19 në nivelin lokal në Republikën e Kosovës. Problemet e identifikuara do të adresohen përmes zhvillimit dhe zbatimit ët Planeve Emergjente Komunale për Rimëkëmbje Ekonomike. Për këtë MAPL do të organizojë edhe Konferencën e Donatorëve dhe Investitorëve vendas dhe të huaj që të ju ndihmojnë komunave për zbatimin e atyre planeve. Metodologjia do të jetë ë bazuar në teknikat e RAR – Rapid Assessment and Response (vlerësim dhe reagim i shpejtë).

Qeverisja e hapur, efikase dhe llogaridhënëse do të jetë prioritet i 100 ditëshit të MAPL-së. Këtë ministria ka planifikuar të arrijë duke filluar procedurat e anëtarësimit në organizatën ndërkombëtare Partneriteti për Qeverisje të Hapur – PQH (Open Government Partnership – OGP). Anëtarësimi i Kosovës në këtë mekanizëm ndërkombëtarë për qeverisje të hapur nuk është qellim në vete sepse qëllimi i vërtetë është hartimi dhe zbatimi i Planit Nacional për Qeverisje të Hapur 2022-2024. Deri tek ky qëllim bazuar në praktikat dhe procedurat e PQH-së, MAPL në koordinim të ngushtë më dikasteret tjerë të Qeverisë së Kosovës do të krijojë Komitetin Nacional për Anëtarësim i cili komitet do të udhëhiqet nga MAPL (përkatësisht Qeveria e Kosovës) dhe bashkë-udhëhiqet nga Organizatat e Shoqërisë Civile në Kosovë. Ky komitet do të përbehet nga institucione publike, organizata jo-qeveritare, përfaqësues të sektorit të biznesit dhe akterë tjerë relevant vendas dhe të huaj në Republikën e Kosovës. Pra, gjatë vitit 2021 do të bëhet vlerësimi i kritereve për anëtarësim në PQH, krijimi dhe funksionalizimi i Komitetit Nacional për Anëtarësim, hartimi i planit dhe vendimi qeveritar për zbatimin e tij.

Gjithashtu prioritet i 100 ditëshit të parë do të jetë fillimi i punimeve në zhvillimin e platformës nacionale për pushtetin lokal E-KOMUNAT. Me këtë platformë do të arrijë rritjen e efikasitetit të shërbimeve publike komunale përmes digjitalizimit të shërbimeve dhe rritjen e transparencës dhe llogaridhënies së legjislativit dhe ekzekutivit të nivelit lokal.

Në kuadër të planit qeveritar strategjik dhe operacional për vitet 2021-2025, MAPL është fokusuar edhe në zhvillimin e qëndrueshëm dhe afatgjatë komunal. Këtë do të arrijmë përmes hartimit dhe zbatimit të Programit Nacional për Zhvillim Ekonomik Lokal 2022 – 2029. Një dokument i tillë do të ishte në përputhje me agjendën e integrimit evropian duke inkuadruar dhe adoptuar Strategjinë për Zhvillim Regjional të BE-së (EU Regional Development Strategy) ku një e treta e buxhetit total të BE shkon në investime për zbatimin e kësaj strategjie. Dhe në fund por jo për nga rëndësia ndihmon në harmonizimin e politikave zhvillimore nga niveli qendror tek niveli lokal përmes centralizimit të politikave përmes Grantit të IV-të Qeveritar. I tërë procesi 8 vjeçar duhet që të bëhet në koordinim të plotë në mes MAPL-së, Zyrës së Kryeministrit, Zëvendëskryeministrit për Zhvillim dhe Integrime, ministrive të linjës, të gjitha komunave dhe institucioneve e organizatave vendore e ndërkombëtare.

Me plotësim ndryshimin e kornizës ligjore për pushtetin lokal vjen edhe ndryshimi strukturor i funksionimit të komunave. Në këtë ndryshim në do të përqendrohemi në krijimin dhe avancimin e mekanizmave për drejtat e njeriut dhe komunitetet në nivelin lokal. Për këtë me ligjin për Vetëqeverisje Lokale do të parashohim shkrirjen e shumë zyreve të ndërlidhura në Drejtorinë Komunale për të Drejtat e Njeriut dhe Komuniteteve. Me këtë përpos që do të funksionalizojmë këtë drejtori do të adresojmë edhe rekomandimet e vazhdueshme të BE-së për nivelin lokal në Raportet vjetore të progresit për Republikën e Kosovës.

Siç e përmenda në fillim ky plan është hartuar në bazë të një vlerësim paraprak të gjendjes aktuale. Nevojiten dy intervenime serioze për ngritjen e kapaciteteve humane për avancimin e pushtetit lokal. Njëri ndërlidhet me avancimin e procesit të integrimit evropian ku ne si MAPL nuk do lejojmë që niveli lokal të jetë pengesë në këtë proces. Për këtë dhe duke pasur parasysh nivelin aktual të kapaciteteve humane që merren me integrime në nivelin komunal ne kemi paraparë ofrimin e bursave në kuadër të skemës Young Cell Scheme për vitin 2022. Shkollimi dhe sistemimi në Zyret Komunale për Integrim i 38 zyrtarëve të shkolluar në kuadër të kësaj skeme për integrime evropiane. Ndërsa në kuadër të MAPL-së do të fuqizohet sektori për programim, monitorim, kontraktim dhe vlerësim te projekteve përmes krijimit të Departamentit për Programim, monitorim, kontraktim dhe vlerësim të projekteve në kuadër të MAPL-së.

MAPL do të vazhdojë ndarjen e graneteve për shërbimet socio-ekonomike dhe në bashkëpunim më donatorët e huaj ndarjen e graneteve të përformancës dhe granteve përmes programit të BE-së IPA për bashkëpunime ndërkufitare. Gjithashtu për sektorin privat në bashkëpunim me Banken Botërore do të vazhdojë fuqizimin e ndërmarrësve të rinj përmes ndarjes së granteve për ndërmarrje të vogla dhe të mesme. Përmes këtij programi parashihet të ndahen 4000 grante për periudhën kohore 2022-2025 dhe mbështetjen e 200 ndërmarrësve të rinj me mjete monetare duke realizuar kështu edhe premtimet tona elektorale.

Ju faleminderit dhe jam i hapur për çdo pyetje dhe tema tjera të diskutimit të interesit dhe fushës së qeverisjes lokale

*Këto diskutime realizohen me mbështetjen e programit MATRA të Ambasadës Holandeze në Kosovë dhe zbatohet në bashkëpunim me Institutin e Prishtinës për Studime Politike(PIPS).    

Prishtinë, prill 2021 – Lëvizja FOL vazhdon të monitoroj publikimin e aktgjykimeve për të gjitha gjykatat e Kosovës. Gjykatat e Kosovës gjatë muajit mars 2021, kanë publikuar 1801 aktgjykime në ueb – portalin e Këshillit Gjyqësor të Kosovës. Sipas monitorimit të FOL edhe gjatë muajit mars 2021, gjykata me më së shumti aktgjykime të publikuara është Gjykata Themelore e Prishtinës, e cila ka publikuar në total 330 aktgjykimeve.

Gjykata Themelore e Prishtinës (bashkë me degët në Lipjan, Podujevë, Gllogovc, Graçanicë) ka publikuar 150 lëndë civile, 153 penale dhe 27 ekonomike. Ndërkaq, sa i përket gjyqtarëve me më së shumti aktgjykime të publikuara në Gjykatën Themelore të Prishtinës janë: Minir Hoti (45 aktgjykime), Gazmend Bahtiri (42 aktgjykime), Avdirrahman Gashi (24 aktgjykime), Nazmi Neziri (19 aktgjykime) Donikë Dobruna (19 aktgjykime).

Gjykata Themelore e Mitrovicës (së bashku me degët saj Skënderaj, Vushtrri, Zubin Potok, Leposaviq) ka publikuar në total 155 aktgjykime: 87 lëndë civile dhe 68 penale. Gjyqtarët me më së shumti aktgjykime të publikuara janë: Agron Maxhuni (25 aktgjykime), Ragip Kadriu (22 aktgjykime), Naim Meholli (22 aktgjykime), Fatos Sejdijaj (11 aktgjykime). Мilos Маrkoviç (11 aktgjykime).

Gjykata Supreme (përfshirë Dhomën e Posaçme dhe Kolegjin e Apelit) ka publikuar në total 177 aktgjykime. Nga to 129 janë civile, 24 penale, 2 ekonomike dhe 22 administrative.

Pesë gjyqtarët me më së shumti aktgjykime të publikuara janë: Manusha Karaçi (24 aktgjykime), Hasim Sogojeva (21 aktgjykime), Teuta Ibrahimi (18 aktgjykime), Shkelzen Sylaj (17 aktgjykime) si dhe Mejreme Memaj (17 aktgjykime).

Gjykata e Apelit (bashkë me Divizionin e Apelit të Mitrovicës) ka publikuar gjithsej 116 aktgjykime: 95 civile, 16 penale si dhe 5 lëndë ekonomike.

Gjyqtarët që kanë publikuar më së shumti aktgjykime në këtë gjykatë janë: Nenad Laziç (22 aktgjykime), Nora Bllaca-Dula (17 aktgjykime), Valon Totaj (16 aktgjykime), Drita Rexhaj (12 aktgjykime) dhe Kujtim Pasuli (10 aktgjykime).

Gjykata Themelore e Ferizajt (bashkë me degët Kaçanik dhe Shtërpce) kanë publikuar gjithsej 201 aktgjykime: 61 civile dhe 140 penale.

Pesë gjyqtarët me më së shumti aktgjykime të publikuara janë: Zajrete Muhaxhiri (19 aktgjykime), Fitore Daci (18 aktgjykime), Shabi Idrizi (16 aktgjykime), Burim Çaka (14 aktgjykime) si dhe Adem Shabani (13 aktgjykime).

Gjykata Themelore e Gjakovës (bashkë me degët Malishevë dhe Rahovec) ka publikuar gjithsej 252 aktgjykime: 82 civile dhe 170 penale.

Pesë gjyqtarët me më së shumti aktgjykime të publikuara janë: Mizahir Shabani (43 aktgjykime), Diana Sina (33 aktgjykime), Jonuz Bugari (25 aktgjykime), Iliriana Hoti (24 aktgjykime) si dhe Ilir Rashkaj (22 aktgjykime).

Gjykata Themelore e Gjilanit (bashkë me degët Viti, Kamenicë dhe Novobërdë) ka publikuar gjithsej 102 aktgjykime: 48 civile dhe 54 penale.

Në Gjykatën Themelore të Gjilanit gjyqtarët me më së shumti aktgjykime të publikuara janë: Rilind Sermaxhaj (32 aktgjykime), Mirvete Alidemi (29 aktgjykime), Florije Qerimi (11 aktgjykime), Sadri Krasniqi (6 aktgjykime) si dhe Emine Salihi, Aziz Shaqiri, Naser Maliqi dhe Venhar Salihu (me nga 4 aktgjykime).

Gjykata Themelore e Prizrenit (bashkë me degët Dragash dhe Suharekë) në ueb portal ka publikuar në total 265 aktgjykime. Mirëpo në databazën e FOL janë evidentuar 264 aktgjykime, sepse 1 ishte aktvendim, e i cili nuk evidentohet në databazën tonë. Nga 265 aktgjykime, 43 janë civile dhe 221 penale.

Gjyqtarët me më së shumti aktgjykime të publikuara janë: Qemail Suka (34 aktgjykime), Lavdim Bajraktari (33 aktgjykime), Robert Tunaj (32 aktgjykime), Shpresa Emra (25 aktgjykime) si dhe Vjollca Buzhala (18 aktgjykime).

Gjykata Themelore e Pejës (bashkë me degët Klinë dhe Istog) ka publikuar 204 aktgjykimeve: 70 civile dhe 134 penale.

Gjyqtarët me më së shumti aktgjykime të publikuara janë: Arben Mustafaj (25 aktgjykime), Sabrije Rraci (23 aktgjykime), Murat Hulaj (19 aktgjykime), Shaqë Curri (18 aktgjykime) si dhe Nexhat Musaj (16 aktgjykime).

Prishtinë 08 prill 2021 – Lëvizja FOL ka mbajtur konferencë për media me ç’rast ka publikuar raportin”Performanca e Prokurorisë në Luftën Kundër Korrupsionit 2020”.

Albana Hasani nga FOL tha se nga 646 lëndë të korrupsionit sa ishin në punë në të gjitha prokuroritë e Republikës së Kosovës për vitin 2020, prokuroritë kanë arritur ti trajtojnë 329 prej tyre apo 51 %. Ndërkaq 317 lëndë kanë ngelur të pa trajtuara dhe janë bartur për vitin 2021. Sipas saj “ende vazhdon të mbetet shqetësuese bartja e numrit të madh të lëndëve nga viti në vit, ku vetëm në vitin 2020 ishin bartur gjithsej 267 lëndë të korrupsionit nga viti paraprak”, tha ajo.

Norma e zgjidhjes së lëndëve të korrupsionit në të gjitha Prokuroritë e Republikës së Kosovës për vitin 2020 është arritur 87 %. Ky rezultat ka ardhur si rrjedhojë e faktit se numri i lëndëve të zgjidhura gjatë kësaj periudhe ishte më i ulët se numri i lëndëve të reja – të krijuara gjatë vitit 2020.

Sipas metodologjisë, “354 ditë i nevojiten Prokurorit të Shtetit për ti zgjidhur të gjitha lëndët e korrupsionit që kanë mbetur të pazgjidhura në vitin 2020” tha Hasani.

Me fluksin më të madh të lëndëve të korrupsionit gjatë kësaj periudhe është përballur Prokuroria Themelore e Prishtinës, e cila në punë ka pasur gjithsej 221 lëndë, 115 prej të cilave i ka zgjidhur. Ndërsa, me fluksin më të ulët të lëndëve të korrupsionit gjatë vitit 2020 është përballur Prokuroria Themelore e Gjakovës, e cila në punë ka pasur gjithsej 27 lëndë të korrupsionit, 15 prej të cilave i ka zgjidhur.

Sa i përket performancës, “Prokuroria që ka arritur rezultatet më të mira në trajtimin e lëndëve të korrupsionit gjatë vitit 2020, është Prokuroria Themelore e Gjilanit e cila gjatë kësaj periudhe ka arritur normën më të lartë të qarkullimit të lëndëve, dhe indeksin më të ulët të lëndëve të grumbulluara”, tha ajo. Nga 41 lëndë të korrupsionit sa ka pasur në punë, kjo prokurori ka arritur të zgjidh 33 prej tyre, ndërsa vetëm 8 i ka bartur për vitin 2021.

Gjithmonë duke ju referuar statistikave të Këshillit Prokurorial të Kosovës, prokuroria me rezultatet më të ulëta në trajtimin e lëndëve të korrupsionit gjatë vitit 2020 është Prokuroria Themelore e Mitrovicës, e cila nga 100 lëndë sa ka pasur në punë gjatë viti 2020, ka arritur të trajtoj vetëm 17. Pra kjo prokurori gjatë kësaj periudhe ka arritur normën më të ulët të qarkullimit të lëndëve, si dhe indeksin më të lartë të lëndëve të grumbulluara.

Duke u bazuar në gjetjet e lartëpërmendura, FOL jep këto rekomandime:

• Të rritet numri i prokurorëve në Departamentin e Krimeve të Rënda, që merren me rastet e korrupsionit;
• Lëndët e korrupsionit, e veçanërisht ato të profilit të lartë të trajtohen me prioritet absolut;
• Të respektohen në përpikmëri obligimet në trajtimin e rasteve të korrupsionit sipas afateve dhe obligimeve të përcaktuara në ligj;
• Të rritet vazhdimisht transparenca e Prokurorit të Shtetit dhe e Këshillit Prokurorial të Kosovës në lidhje me ofrimin e qasjes në dokumente publike në pajtim me obligimet që dalin nga ligji;
• Të publikohen në vazhdimësi raportet statistikore në ueb-faqen zyrtare të Sistemit Prokurorial në lidhje me numrin e lëndëve të zgjidhura dhe në trajtimin e rasteve të korrupsionit.