Monitorimi i procesit të përzgjedhjes së anëtarëve të rinj të KPM-së

Shpërndaje në:

Gjatë muajit prill 2026, Lëvizja FOL ka monitoruar procesin e përzgjedhjes së anëtarëve të rinj të Komisionit të Pavarur të Mediave (KPM), të zhvilluar nga Komisioni ad-hoc i Kuvendit të Republikës së Kosovës. Monitorimi është fokusuar në zhvillimin e fazave kryesore të këtij procesi, përfshirë konstituimin e Komisionit ad-hoc, shqyrtimin e aplikimeve dhe dokumentacionit të kandidatëve, përcaktimin e kritereve dhe mënyrës së intervistimit, si dhe zhvillimin e intervistave me kandidatët.

Në kuadër të procesit, Komisioni ad-hoc ka shqyrtuar gjithsej 30 aplikime dhe ka diskutuar për përmbushjen e kritereve administrative dhe ligjore nga kandidatët. Për intervistim është përcaktuar një strukturë e njëjtë për të gjithë kandidatët, me pesë pyetje dhe kohëzgjatje prej 15 minutash për secilin intervistim.

Gjatë procesit të intervistimit janë trajtuar çështje që lidhen me funksionimin dhe sfidat e KPM-së, digjitalizimin, monitorimin e mediave, mbrojtjen e fëmijëve, transparencën, pavarësinë institucionale dhe harmonizimin e punës së KPM-së me legjislacionin e Bashkimit Evropian. Nga kandidatët e ftuar, gjithsej 23 janë intervistuar.

Në përfundim të procesit të intervistimit, Komisioni ad-hoc ka rekomanduar 12 kandidatë për votim në seancë plenare, prej të cilëve 8 nga komuniteti shqiptar dhe 4 nga komunitetet joshumicë.

Ky monitorim paraqet në mënyrë kronologjike zhvillimin e procesit të përzgjedhjes, nga konstituimi i Komisionit ad-hoc deri te rekomandimi i kandidatëve për votim në Kuvend, me fokus në procedurat e ndjekura dhe çështjet e evidentuara gjatë secilës fazë.

Mbledhja e parë e Komisionit ad-hoc – 10 prill 2026

Më 10 prill 2026, Lëvizja FOL ka monitoruar mbledhjen e parë të Komisionit ad-hoc për përzgjedhjen e kandidatëve për anëtarë të KPM-së.

Kjo mbledhje shënoi fillimin formal të procesit të përzgjedhjes së kandidatëve për anëtarë të KPM-së. Në rend dite ishte konstituimi i Komisionit dhe shqyrtimi i çështjeve të ndryshme që lidhen me fillimin e procesit.

Mbledhja e dytë e Komisionit ad-hoc – 14 prill 2026

Më 14 prill 2026, ishte paraparë të mbahej mbledhja e dytë e Komisionit ad-hoc, e cila do të trajtonte listën e kandidatëve të propozuar për anëtarë të KPM-së.

Mbledhja nuk u zhvillua për shkak të mungesës së kuorumit. Si rrjedhojë, shqyrtimi i kandidatëve u shty për mbledhjen e ardhshme.

Mbledhja e tretë e Komisionit ad-hoc – 17 prill 2026

Më 17 prill 2026, Lëvizja FOL ka monitoruar mbledhjen e tretë të Komisionit ad-hoc, gjatë së cilës u shqyrtua lista e kandidatëve për anëtarë të KPM-së.

Në proces ishin gjithsej 30 aplikime. Komisioni shqyrtoi dokumentacionin e kandidatëve dhe diskutoi çështjet që lidhen me plotësimin e dokumentacionit administrativ.

Në këtë mbledhje u përcaktua edhe struktura e intervistimit. Komisioni vendosi që kandidatëve t’u parashtroheshin të njëjtat pesë pyetje dhe që secili intervistim të zgjaste 15 minuta.

Gjatë shqyrtimit, disa kandidatë u eliminuan për shkak të mospërmbushjes së kritereve ose papajtueshmërisë me pozitën.

Procesi i intervistimit të kandidatëve – 20 prill 2026

Më 20 prill 2026, Lëvizja FOL ka monitoruar procesin e intervistimit të kandidatëve për anëtarë të KPM-së.

Nga kandidatët e ftuar, disa nuk morën pjesë në intervistë, ndërsa gjithsej u intervistuan 23 kandidatë.

Gjatë intervistave u trajtuan tema të ndryshme që lidhen me funksionimin dhe përgjegjësitë e KPM-së, përfshirë:

  • sfidat me të cilat përballet KPM-ja;
  • digjitalizimin;
  • monitorimin e mediave;
  • mbrojtjen e fëmijëve;
  • transparencën;
  • pavarësinë institucionale;
  • harmonizimin me legjislacionin e Bashkimit Evropian.

Në përfundim të procesit të intervistimit, Komisioni ad-hoc rekomandoi 12 kandidatë për votim në seancë plenare: 8 nga komuniteti shqiptar dhe 4 nga komunitetet joshumicë.

Përfundimi i procesit të përzgjedhjes

Procesi i monitoruar përfundoi me rekomandimin e 12 kandidatëve për votim në seancë plenare të Kuvendit të Republikës së Kosovës. Sipas të dhënave të monitorimit, kandidatët e rekomanduar përfshinin 8 kandidatë nga komuniteti shqiptar dhe 4 kandidatë nga komunitetet joshumicë.

Në këtë mënyrë, procesi i përzgjedhjes kaloi nga faza e konstituimit të Komisionit ad-hoc dhe shqyrtimit të aplikimeve në fazën e intervistimit dhe, përfundimisht, në rekomandimin e kandidatëve për votim nga Kuvendi.

Monitorimi i procesit të përzgjedhjes së anëtarëve të rinj të KPM-së është mbështetur nga Rockefeller Brothers Fund. Përmbajtja e këtij publikimi, si dhe pikëpamjet e shprehura në të, janë përgjegjësi e autorëve dhe nuk përfaqësojnë domosdoshmërisht pikëpamjet e Rockefeller Brothers Fund.